Austurvöllur
Úr Wikipediu, frjálsa alfræðiritinu
Austurvöllur er lítið torg (aðrir segja lítill garður) í miðborg Reykjavíkur. Hann afmarkast af Vallarstræti, Pósthússtræti, Kirkjustræti og Thorvaldsensstræti. Síðastnefnda gatan er einmitt nefnd eftir Bertel Thorvaldsen, en stytta af honum stóð lengi á miðjum Austurvelli. Nú stendur stytta af Jóni Sigurðssyni þar sem hún stóð áður. Í kring um Austurvöll standa margar af merkari byggingum borgarinnar, þar á meðal Alþingishúsið, Hótel Borg og Landssímahúsið (en þar voru höfuðstöðvar Póst og síma lengst af) og Dómkirkjan í Reykjavík. Austurvöllur er vinsæll meðal ungra Reykvíkinga á góðviðrisdögum. Ástæða þessa er sú að nokkur kaffihús, sem eru í byggingunum við Vallarstræti og Pósthússtræti, hafa borð og stóla utandyra þegar veður leyfir. Einnig er mikið setið á grasinu á Austurvelli sjálfum þegar þannig stendur á.
Austurvöllur var öllu stærri áður fyrr. Í upphafi 18. aldar náði Austurvöllur vestan frá Aðalstræti og austur að læk, norðan frá Hafnarstræti og suður að Tjörn.
[breyta] Óeirðir á Austurvelli 30. mars 1949
- Sjá aðalgrein Óeirðirnar á Austurvelli 1949.
Miklar óeirðir áttu sér stað á Austurvelli miðvikudaginn 30. mars 1949, þegar stóð til að samþykkja þingsályktunartillögu um inngöngu Íslands í NATO.
[breyta] Tenglar
- Austurvöllur - 75 ár síðan hann var friðaður; grein í Lesbók Morgunblaðsins 1950
- Í kjölfar brunans 1915 risu mörg stórhýsi; grein í Morgunblaðinu 1995