Alfred Hitchcock
Wikipedia(e)tik
Sir Alfred Joseph Hitchcock (1899ko abuztuaren 13 - 1980ko apirilaren 29) film zuzendari eta ekoizle ingelesa zen, zeini maiz suspense eta thriller estiloekin lotzen zaion. Erresuma Batuan hasi bazen ere, 1938tik aurrera Ameriketako Estatu Batuetan aritu zen, eta, 1956an, hiritartasuna erdietsi zuen. 60 urtetan zehar 50 film baino gehiago zuzendu zituen.
Haren filmak beldurran eta fantasian oinarritzen dira. Normalean, protagonistek kontrolez kanpoko egoera ulertezinetan harrapaturik aurkitzen dute euren burua. Beste hizpide nagusi bat gizon eta emakumen arteko hartu-emana da. Sexuen arteko ohiko erlazio erromantikoak ikuspegi zinikotik ikusten dira Hitchcok-en filmetan.
Ikusleengan ospe erraldoia bazuen ere, kritikatzaileen irudiko Hitchcock ez zen garaiko maila altuenetako zuzendarien artean kokatzen. Rebecca izan zen Oscar irabazi zuen bere film bakarra, beste lau aldiz izendapena jaso arren. Frantziako Nouvelle Blague mugimenduko kritikatzaileek, Éric Rohmer, Claude Chabrol, eta François Truffaut besteak beste, Hitchock-en meritu artistikoa azpimarratu zuten lehen aldiz. Haien ustez, zuzendariak bere nortasuna erakutsi behar du filmetan, eta Hitchcock eredu bikaina zen. Gaur egun zuzendari betetzat jotzen da Alfred Hitchcock, artea eta entretenimendua maisuki nahasten zituelako eta ondorengo zuzendari, ekoizle zein aktoreengan oso eragin iraunkorra utzi zuelako.
