Leon Nemea
Diwar Wikipedia, an holloueziadur digor
Leon Nemea (Henc'hresianeg: Λέων της Νεμέας (Léōn tēs Neméas); Latin: Leo Nemaeus) a oa un euzhvil drouk, ul leon spouronus, er vitologiezh c'hresian a oa o vevañ e Nemea. Lazhet e oa gant Herakles a-benn ar fin. Soñjal a rae ar C'hresianed e oa ur bugel da Tifon hag Ekidna, met skrivet eo bet ivez e oa kouezhet eus al loar hag e oa ur bugel da Zeus ha Selene. Hervez ur vojenn all e vije bet ganet gant ar Gimaera.
[kemmañ] Kentañ labour Herakles
An hini gentañ e oa eus an daouzek trevell a oa roet da Heracles gant e genderv Euristeüs, da lâret eo : diskar Leon Nemea ha degas e groc'hen en-dro.
Spouronet e oa bro Nemea gant al leon, ha ken kalet e oa e groc'hen ma ne c'halle ket bezañ treuzet gant an armoù. Pa oa taget gant Herakles, e armoù - e wareg, ur penn-bazh graet gant un olivezenn (en doa diframmet e-unan) hag ur c'hleze arem - a oa bet diefedus-naet. A-benn ar fin e taolas Herakles holl e armoù ha lammat a reas ouzh al leon gant e zaouarn hepken. Lazhañ a reas anezhañ o stardañ e vrec'h en-dro da c'houzoug al loen betek e vougañ. (E stummoù all eus ar vojenn e voug Herakes al loen pe e torr outañ e garvanoù).
Tremen a reas Herakles eurvezhioù o klask digroc'henañ al leon, hep dont a-benn. Tamm-ha-tamm e savas fulor ennañ o welet ne c'hallfe ket seveniñ e gefridi. En diwezh Atena, dic'hizet, a sikouras anezhañ da veizañ e oa skilfoù al loen o-unan a oa ar benvegoù gwellañ evit dispenn ar c'hroc'hen anezhañ.
Hiviziken e reas gant ar c'hroc'hen-se da hobregon. Ken spouronet e oa ar roue Euristeüs, gant doare spontus Herakles, ar c'hroc'hen dindanañ, ma'z eas da guzhat en ur jarl arem bras, ha ma tivizas difenn ouzh e genderv dont tre e kêr ha reiñ e urzhioù da Herakles dre hanterouriezh un harod.