Рака Заходні Буг

З Вікіпедыя.

ЗАХОДНІ БУГ, Буг (укр.: Захiдний Буг, польск.: Bug) — рака на Украіне, Беларусі і Польшчы, левы прыток Нарава. Даўжыня 772 км, у межах Беларусі 154 км. Вадазбор 39,4 тыс. км², у межах Беларусі 10,4 тыс. км². Сярэднегадавы расход вады на мяжы Беларусі з Украінай каля 50 м³/с, пры выхадзе за мяжу краіны 100 м³/с, каля г. Вышкаў (Польшча) 127 м³/с. Сярэдні нахіл воднай паверхні 0,3 ‰.

[правіць] Асноўныя прытокі

Справа: Луг, Капаёўка, Мухавец, Лясная, Пульва, Нурэц, Брок. Злева: Полтва, Салокія, Букава, Гужва, Угерка, Кшна, Лівец.

[правіць] На рацэ

Гарады: Буск, Каменка-Бужская, Сасноўка, Чырвонаград, Сокаль, Усцілуг, Брэст (порт), Уладава, Цярэспаль, Дарагічын, Вышкаў.

[правіць] Агульнае

Пачынаецца на заходніх схілах Падольскага ўзвышша каля в. Верхабуж Золачаўскага р-на Львоўскай вобл., упадае ў Загжынскае вадасховішча на р. Нараў (Польшча). Сярэдняе цячэнне праходзіць па Брэсцкім Палессі і Прыбугскай раўніне. Суднаходства ў ніжнім цячэнкі. Заходні Буг праз р. Мухавец, Дняпроўска-Бугскі канал і раку Піну злучаны з ракой Прыпяццю, а праз р. Нараў, яго прыток р. Бебжа, р. Нета і Аўгустоўскі канал — з р. Чорнай Ганчай, прытокам Нёмана).

У сярэднім цячэнні Заходні Буг з'яўляецца мяжой Польшчы з Украінай і Беларуссю. З 1 мая 2004 з'яўляецца ўсходняй мяжой Еўрапейскага Саюза. Памежныя пераходы на мяжы Беларусі і Польшчы: Клейнікі—Кукурыкі, Брэст—Цярэспаль, Дамачава—Славатычы, Тамашоўка—Уладава; на мяжы Украіны і Польшчы: Любамль—Хэлм, Усцілуг—Хрэбешаў.

Веснавое разводдзе (працягласць 1—2 месяцы) звычайна ў пачатку сакавіка, найбольшы ўзровень разводдзя ад 3 м да 6 м. Летам і ўвосень назіраюцца дажджавыя паводкі, зімой мяшаныя (ад раставання снегу пры адлігах і ад дажджоў). Межань кароткая, перарывістая. Замярзае ў канцы снежня, лёд трымаецца да 2-й паловы сакавіка.

Даліна ракі шырынёй 3—4 км. Пойма нізкая, шырокая, часта зліваецца з прылеглай мясцовасцю. Шырыня ракі 50—75 м, на асобных участках 200—300 м.

[правіць] Галерэя

у ваколіцах Уладава	у Дарагічыне	у ваколіцах Дарагічына	Від на Заходні Буг з дарагічынскай Замкавай гары
каля Вышкава	каля Нура	у ваколіцах Волі Угрускай	у ваколіцах Горнай Малкіні
у Магільніцы	Надбужскі краявід

[правіць] Крыніцы

• Ресурсы поверхностных вод СССР. Описание рек и озёр и расчёты основных характеристик их режима. Т. 5. Белоруссия и Верхнее Поднепровье. Ч. 1–2. –Л., 1971.

• Природа Белоруссии: Попул. энцикл./ БелСЭ; Редкол.: И.П. Шамякин (гл.ред.) и др. –Мн.: БелСЭ, 1986. –599 с., 40 л. ил.

• Блакiтная кнiга Беларусi: Энцыкл. / БелЭн; Рэдкал.: Н.А. Дзiсько i iнш. –Мн.: БелЭн, 1994.

• Государственный водный кадастр: Водные ресурсы, их использование и качество вод (за 2004 год) / М-во природных ресурсов и охраны окружающей среды. –Мн., 2005. –135с.