Sikhismo
De Biquipedia
O sikhismo ye una relichión d'orichen indio que se desarrolló en o contesto d'o conflito entre as dotrinas d'o induismo e l'islam. Os seguidors d'o sikhismo se dizen sikhs.
O termín sikh senifica en penyabí "disziplo fuerte e zerrino". A dotrina alazetal d'o sikhismo pende d'a creyenzia en un unico dios e en as amostranzas d'os Diez Gurús d'o sikhismo, replecatas en o libro sagrato d'os sikhs, o Guru Granth Sahib. O sikhismo combina o monoteísmo estrito, d'orichen musulmán, con tradizions indús.
O numero de sikhs en o mundo ye d'alto u baxo bels 23 millons, o cualo fa que o sikhismo sía la zinquena relichión mundial. Bels 19 millons biben en India, e a mayor parti d'istos, en o estato de Penyab. A rechión de Penyab encluye tamién una parti de Pakistán, pero a mayor parti d'os sikhs que bibiban en o territorio autual de Pakistán emigroron ta India dezaga d'a dibisión d'a India britanica en 1947 ta ebitar as persecuzions relichiosas. Existen numerosas comunidaz sikhs en o Reino Unito, en Estatos Unitos e en Canadá. Tamién son una minoría important en Malaisia e Singapur.
A forma literaria d'a luenga penyabí, escrita en alfabeto gurmukhi, ye mui ligata á la relichión sikh. Os fablants de penyabí indús u musulmanes emplegan cheneralment l'indi e l'urdu, respeutibament, como luengas escritas, e son prenzipalment os sikhs quí escriben en penyabí.
