Flora kommune

Frå Wikipedia – det frie oppslagsverket

**Flora kommune**
Våpen	Kart

Grunnleggjande opplysningar
Kommunenr:	1401
Fylke:	Sogn og Fjordane
Administrasjonssenter:	Florø
Flatevidd:	693 km²
Folketal:	11 408 (2008)
Målform:	Nynorsk
Internettside:	www.flora.kommune.no
Politikk
Ordførar:	Bente Frøyen Steindal (Ap) 2007-2011

Flora er ein bykommune i Sogn og Fjordane fylke. Han inneheld fleire øyar, halvøyar og fjordar som Eikefjorden og Norddalsfjorden.

Florø, som er administrasjonssenter i kommunen, er òg Noreg sin vestlegaste by. "Havet sitt sølv", silda, var lenge hovudnæringa for Flora og Florø, og ein finn igjen fisken i kommunevåpenet.

Kommunen har eit aktivt og variert kulturliv med kulturskule og musikk-, kor- og revymiljø. Kinnaspelet vert framført kvart år på sagaøya Kinn. Sildebord og rockefestival er andre trivelege aktivitetar å få med seg. I tillegg har Flora idrettshall, symjehall, fotballbanar, løkker og eit mylder av idretts- og fritidsorganisasjonar.

Helleristingane i Ausevika og Kystmuseet i Sogn og Fjordane gjev eit historisk perspektiv. Flora er fleire gonger kåra til den trivelegaste bykommunen i landet, og fekk utdelt Miljøbyprisen i 1998.

Næringslivet i kommunen er eksportretta og hovudnæringane er fiskeindustri, skipsbygging, forsyningsbase for oljeindustrien og servicenæring. Innbyggjarane i kommunen skapar verdiar som ligg fleire gonger over landsgjennomsnittet.

Flyplassen Florø lufthamn ligg i kommunen.