Pianeta nano
Da Wikipedia, ła ençiclopedia libara.
Un pianéta nano el xe un corpo celeste de tipo planetario che l'gira torno na stéła e che 'l ga bastanzsa masa da aver fórma sferoidałe, ma che no l'è mìa stà bon de "netar fora" ła só zona orbitałe da altri corpi de łe só stése dimension.
Nonostante el nome, un pianéta nano no'l xe mìa necesariamente piasè picenin de un pianéta e in teoria no ghe xe miga łìmiti a łe dimension dei pianiti nani. Fra l'altro ła clase dei pianiti nani no ła fa mìa parte de queła dei pianiti, ma łe xe dó robe diverse.
Ła definizsion de pianéta nano ła xe stà introdóta uficialmente 'nte ła nomenclatura astronòmica da n'asenblea de l'Union Astronòmica Internazsionałe el 24 de agósto del 2006, in mezo a un saco de discusion: fra l'altro xe stà notà che ła definizsion no l'è mìa ojetiva (nesun corpo cełeste el pol netar fora ła só zona orbitałe e no gh'è gnanca un łìmite obietivo par definir quando che un corpo l'è sferoidałe o nò). D'altra banda, na definizsion de sto tipo de clase qua ła ghe vołéa propio, par distìnguarla da ła clase dei pianiti tradizsionłi, e donca xe probàbiłe che el nome el reste.