Naru (AG)
Di Wikipedia, la nciclupidìa lìbbira.
| Naru | |
 |
|
| Muttu: | |
| Nomu ufficiali: | Naro |
|---|---|
| Pruvincia: | Girgenti (AG) |
| Superfici: | 207 km² |
| Abbitanti: | 8.770 |
| Dinzitati: | 42 ab./km² |
| Cumuni cunfinanti: | Girgenti (AG), Nissa (CL), Camastra, Campubbeddu (AG), Caniattì (AG), Castrufilippu (AG), Delia (CL), Favara (AG), Licata, Parma di Muntichiaru, Rivinusa, Summatinu (CL) |
| CAP: | 92028 |
| Prifissu telefònicu: | +0922 |
Naru è un cumuni di 8.770 abbitanti dâ pruvincia di Girgenti; è situatu ncapu a na cullina di 596 metri sùpira lu liveddu dû mari. Dô paisi si pò vìdiri lu mari di mpacciu, ma macari lu Muncibeddu e li Madunìi; sutta a lu paisi c'è na vallata ca si chiama Val Paradisu
Ìndici |
[cancia] Storia
La storia di Naru si cunfunni cu la liggenna, nnû sò tirritoriu si tròvanu tracci di abbitanti già dâ pristoria; la liggenna dici ca Naru vinni funnata dî Gicanti, antichi abbitatura di l'ìsula, mentri arcuni l'idintìficanu cu l'antica "Camico", mìtica cità funnata pi Cocalo di Dedalu, l'architettu dû labbirintu di Crita; àutri vonnu attribbuiri la sò funnazzioni ê fìnici, mentri arcuni fonti pàrranu dâ funnazzioni di Naru comu na culonia dâ cità greca di Gela, cu lu nomu di "Agragas Jonicum" nnû 680 a.C., ottu anni doppu la funnazzioni dâ stissa Gela e cent'anni prima dâ funnazzioni di Girgenti, numinata "Agragas Doricum". Facirmenti, puru siddu era già abbitata nnâ pristoria e nnî sèculi pricidenti, lu paisi attuali fu funnatu di l'àrabbi ntô sèculu IX doppu Cristu e sutta lu duminiu di li Chiaramunti; nnû mediuevu, addivintau una di cità cchiù mpurtanti dâ Sicilia, tantu di èssiri una di tri cità, nzèmmula a Palermu e Missina, a putiri fari liggi. Centru mpurtanti dû mediuevu vinni chiamatu Fulgentìssima di lu mpiraturi Fidiricu II di Svevia.
La storia ricenti arricorda n particulari l'òpira di Rusariu Ferracani, farmacista nasciutu a Naru ntô 1883 e murutu ntô 1936, appartinenti â massunarìa e appaltaturi, custruìu la cunnuttura ìdrica c’asisti ancora oi, la via Archeologica e la via Dante, ancora oi visìbbili n quantu rializzata cu petra làvica e cu pinnenzi latirali, suluzzioni a l'èbbica cunzidirata a l'avanguardia e ca risistìu pirfinu a un bummardamentu aèriu dâ secunna guerra munniali. Li sidili n ferru chî quali avìa arriccutu la chiazza di San Calòjiru ancora oi sunnu usati nta l'atriu dû cumuni. Di ricenti lu cumuni fu curputu di na frana ca metti n pirìculu granni parti dû centru stòricu. Di l'avvinimentu si stannu ntirissannu la Prutezzioni Civili e li principali forzi pulìtichi riggiunali e nazziunali.
[cancia] Naru oi
Oi Naru è un paisi chinu di munumenta suprattuttu d'età barocca tra li quali spìccanu lu Casteddu di Chiaramunti e lu Vecchiu Domu dû 1100, ca fu custruiutu 'n capu na vecchia muschea: tutti dui sti munumenta foru numinati munumenta nazziunali.
Lu paisi è visitatu abbituarmenti di tanti turisti ca vèninu videmma pi tanti àutri munumenta, tipu la Chiesa Matri, la Chiesa dû SS. Sarvaturi, la Chiesa di San Francì, la Chiesa di Sant'Agustinu, la Chiesa di San Nicola, la Chiesa di Santa Catirina, lu Municipiu ca era un vecchiu cummentu, oltri ê grutti suttirrànii, ê catacommi e ô Castiddazzu ca è un pocu fora paisi.
Nnû 2005 la cresia di San Francì fu numinata di l'UNESCO munumentu sìmmulu di paci e patrimoniu munniali di l'umanitati.
Lu paisi di Naru è unu dî centri cchiù mpurtanti dû baroccu sicilianu, stili ca dòmina intra quasi tutti li cresî dâ citati.
Lu sìnnacu dû cumuni attuarmenti è Marìa Grazzia Brandara, già diputatu riggiunali.
[cancia] Naru e la Sicilia
Naru fu ô centru dâ storia siciliana antica nzinu a quannu, isulatu dî vìi di cumunicazzioni principali fu a picca a picca abbannunatu. Riccu di cresi, cunventi e di rasti archiològgici tannu fu lu locu unni tantìssimi famigghi nubbiliari attruvaru nzidiamentu. A città di Naru fu a capu di l'omonima cumarca ca cumprinnia, oltri au stessu paisi di Naru, capucumarca, i paisi di Caniattì, Delia, Camastra, Summatinu, Rivinusa, Castrufilippu e pi un certu piriudu videmma Campubbeddu di Licata, contesa cu Licata.
[cancia] Giografìa
Naru è na citatina situata a 596 metri supra lu liveddu dû mari ô centru d’un cumprinzoriu fèrtili, unni la natura offri un clima friscu e timpiratu, na natura multiculuri e sulari. Sutta a cullina unni c'è u paisi, a sud-ovest, si grapi n'ampia vaddrata cultivata, a val paradisu unni nascì, nnu 1934, a sagra dû miennulu n' ciuri, poi spustata a Girgenti. A nord-ovest scurri u ciumi Naru, n'u cursu d'u quali fu criata nna diga artificiali, a diga San Giuvanni, granni bacinu di raccolta di l'acqui ca viennu utilizzati poi suprattuttu p'abbrivirari i campagni. U territoriu di Naru è u secunnu cchiù ranni dâ pruvincia di Girgenti, secunnu sulu a chiddru dâ stessa città capoluogu.
[cancia] Lu casteddu
Custruutu ntô Triccentu dâ famigghia putenti dî Chiaramunti e pi chistu cumunimenti notu comu «casteddu chiaramuntanu», sta furtalizza n tufu dâ furma irrigulari, ntô 1912 fu dichiarata monumentu nazziunali. Lu cumplessu cumprenni un muru di cinta cu caminu di ronda, la turri quatrata vuluta di Fidiricu III d'Aragona ntô 1330 e la moli. Tra l’ambienti nterni cummigghiati di volti a vutti si signala lu saluni beddu, o sala dû principi, ntô quali si trasi di na porta triccintisca e na jisterna anchia graputa ca vinìa usata a li voti comu priggiuni. Lu casteddu fu ristauratu pi sarvari l'edificiu, e pi nzirìrilu ntâ rialtati lucali cu la distinazzioni a museu di dui liveddi di l'ala sud-est e dâ Turri Aragunisa, nunchì câ criazzioni d’un labburatoriu di ristàuru nta l'ària sud-ovest. Attuarmenti u castieddru ospita a mostra permanenti di l'abitu anticu ed è usatu videmma pi celebrari i matrimoni civili.
[cancia] Tradizzioni
Veru mpurtanti pû paisi di Naru è la festa dû patronu, San Calò, viniratìssimu 'n tutta la Sicilia e 'n particulari a Naru unni cc'è lu sò santuariu cchiù mpurtanti e unni ogni annu lu 18 di giugnu si fa la festa 'n sò unuri cu la tìpica prucissioni dâ "stràula", na speci di slitta ca veni trascinata dî fideli longu li strati dû paisi cu na corda di ducentu metri.
La festa di S. Calò attira a Naru ogni annu fideli di tutti li parti dâ Sicilia e macari di àutri nazzioni, suprattuttu li mmigrati a l'èstiru ca ogni annu tòrnanu pi rènniri umaggiu ô santu.
D'arricurdari è lu fattu ca la sagra dû miennulu 'n ciuri, ca attuarmenti si fisteggia a Girgenti, nascìu a Naru, nnu 1934, comu festa dû paisi lijata a l'arrivu dâ primavera e sulu succissivamenti si nni mpussissaru li giurgintani.
Attualmenti a Naru si cèlibbra l'accussiditta Primavera narisi, ca àutru nun eni ca la vecchia festa dû miènnulu 'n ciuri.
Àutra tradizzioni particulari è l'A' Sguondru, tìpica prucissioni ca si fa pâ festa di Pasqua unni si vannu a ncuntrari lu Signuri risortu câ Madunna addilurata ca ntô mumentu stissu unni lu vidi, perdi lu mantu nìuru e arresta cu nu tìpicu mantu cilesti.
[cancia] Econumìa
Oi Naru campa d’agricultura e n parti nica di turismu; tantìssimi sunnu li citatini espatriati n Girmania e cchiù n ginirali a l'èstiru.
[cancia] Riliggiuni
Lu santu patronu è San Calò (o Caloiru), ca la festa si svorgi lu 18 di giugnu d’ogni annu. Assai cummuventi è la prucissioni tradizziunali duranti la quali lu santu veni tiratu supra na straula (slitta enormi), cu cordi, dî fideli supra un pinninu pi circa un chilòmitru e menzu. Nortri ntâ cresia lucali di San Franciscu sunnu cunzirvati li riliqui di Santu Domizziu e Santa Culumma, morti ntê Cruciati. Sempri ntâ stessa chiesa si trova nna statua dâ Madonna 'mmaculata fatta tutta d'argentu massicciu ad eccezzioni dâ testa e dî manu ca fuoru tagliati e arrubbati duranti a secunna guerra munniali. Moltu intensa e sintita dî narisi è a nuvena in onuri dâ 'mmaculata, duranti a quali si canta un tipicu cantu â Madonna e ca curmina l'8 dicemmiru cu a prucissioni dâ statua pî strati dâ città.
[cancia] Pirsunaggi illustri
Giuseppi Messina, giurista tiurizzaturi eminenti dî cuntratti di tariffa e dî cuntratti cullittivi.Unu dî màssimi studiusi dû drittu dû travagghiu e dû drittu sinnacali.
Fonziu Gaetani, conte, ideaturi dâ sagra dû miennulu 'n ciuri.
Ciccu da Naru, pitturi 'mportanti in ambitu regionali, affriscà tra l'antri cosi u palazzu Steri di Paliemmu, storica residenza dâ famiglia Chiaramunti e u stessu castieddru di Naru.
[cancia] Sport
Pi chiddru ca riguarda l'ambitu sportivu di ricurdari è sicuramenti u svolgimentu ntô 1991 dî campionati europei di canottaggiu ntâ diga San Giuvanni, ai quali pigliaru parti videmma i fratelli Abbagnale e ca fuoru commentati di Giampieru Galiazzi.
A squatra di cauciu dû paisi, l'A.S. Naru, milita attualmenti in terza catigoria e po vantari u record assolutu di punti, tra tutti i categorii dû cauciu italianu, intra un campionatu a du punti pi vittoria e un puntu pi pareggiu, aviennu fattu, intra un campionatu di l'anni ottanta, tutti vittori e un pareggiu. Chissu risultati ci permetti di aviri anchi u record di l'imbattibilità intra un campionatu.
