Es erschde Buch Mosi
Aus Wikipedia
Es erschde Buch Mosi
Kapiddel 1.
1. Im Anfang schuf Gott de Himmel un die Erd. 2. Un die Erd war wiescht un leer, un es war finschter uff de Diefe; un de Geischt Gottes iss uffm Wasser gschweebt. 3. Un Gott sproch: Es werdde Licht. Un es iss Licht gwordde. 4. Un Gott hot gsehe, dass es Licht gut war. Do unnerschied Gott des Licht vun de Finschternis. 5. Un hot des Licht Daach gnannt, un die Finschternis Nacht. Do wurdd aus'm Owed unnem Morge de erschde Daach.
6. Un Gott sproch: Es werd' e Befeschtigung im Wasser, die des Wasser deile soll. 7. Do hot Gott die Befeschtigung gmacht, und schied des Wasser unna derre Befeschtigung vum Wasser iwwa derre Befeschtigung. Un so isses gschehe. 8. Un Gott hot die Befeschtigung Himmel gnannt. Do wurdd aus'm Owed unnem Morge de zwedde Daach.
9. Un Gott sproch: Es sammle sich es Wasser unna'm Himmel an bsunnare Bletz, dass mer's Drockene sicht. Un so isses gschehe. 10. Un Gott hot es Drockene Erd gnannt, un die Ansammlunge vum Wasser hot er Meer gnannt. Un Gott hot gsehe, dass es gut war. 11. Un Gott sproch: Es soll Gras un Graut uffgehe in de Erd, des sich besame soll, un fruchtbare Beem, die Fricht drage solle nach ihrer Art un bei sich selwa en eigene Same hawwe solle uff de Erd. Un so isses gschehe. 12. Un die Erd liess uffgehe Gras un Graut, des sich selwa besamt hot, e jegliches nach sennari Art. Un Gott hot gsehe, dass es gut war. 13. Do wurdd aus'm Owed unnem Morge de dridde Daach.
14. Un Gott sproch: Es werdde Lichter am Himmel, die de Daach und die Nacht vun ananner scheide solle und Zeiche, Zeide, Daach und Yohr ogewwe solle. 15. Un es seie Lichter am Himmel, die uff die Erd scheine solle. Un so isses gschehe. 16. Un Gott hot zwee grosse Lichter gmacht, ee grosses Licht, des de Daach beherrsche soll, un ee kleens Licht, des die Nacht beherrsche soll. Do dezu aach Stern. 17. Un Gott hot se an de Himmel gsetzt, damit se uff die Erd scheine, 18. un de Daach un die Nacht beherrsche un des Licht vun de Finschternis unnascheide. Un Gott hot gsehe, dass es gut war. 19. Do wurdd aus'm Owed unnem Morge de vierdde Daach.
20. Un Gott sproch: Es soll sich es Wasser mit waabande und lebendiche Viecher fille, un Veggl unna'm Himmel flieche. 21. Un Gott schuf grosse Walfisch un allerlei Viecher, die do leewe, die sich im Wasser dummle, e jegliches nach sennari Art, un allerlei gfidderde Veggl, en jeglicher nach sennari Art. Un Gott hot gsehe, dass es gut war. 22. Un Gott hot se gsegnet un sproch: Seid fruchtbar un mehrt aich, un fillt es Wasser im Meer; un die Veggl solle sich uff de Erd vermehre. 23. Do wurdd aus'm Owed unnem Morge de finfde Daach.
24. Un Gott sproch: Die Erd soll lebendiche Diere hervorbringe, e jegliches nach sennari Art, un die Viecher, e jegliches nach sennari Art: Vieh, Gwerm und Diere uff de Erd nach sennari Art. Un Gott hot gsehe, dass es gut war. 25. Un Gott hot die Diere gmacht uff de Erd, e jegliches nach sennari Art, un es Vieh nach sennari Art, un allerlei Gwerm uff de Erd nach sennari Art. Un Gott hot gsehe, dass es gut war.
