Hasiera (Biblia)

Wikipedia(e)tik

Hasiera liburua (grezieraz genesis) Bibliako Itun Zaharreko lehen liburua da. Tradizio judu-kristauaren arabera, Moisesek idatzi zuen, nahiz eta egungo ikerketek askoz geroago idatzi zela adierazten duten. Zehazki, K. a. 1000 urte inguruan idatzi zen, aurretik idatzita eta, batez ere, ahoz belaunaldiz belaunaldi zabaldutako istoriotan oinarrituta.

Hasiera liburuak gizadiaren lehen aroetako historia kontatzen du alegorien bidez. Liburuaren lehen ataletan Jainkoak mundua eta gizakia nola sortu zituen kontatzen du. Bibliaren arabera, Jainkoak lurra eta bertako bizidun guztiak ezerezetik sortu eta paradisu batean jarri zituen (Edengo paradisua izenekoa). Gizakiak egindako bekatuak Jainkoarekin zuen harreman zuzena eten zuen eta Paradisutik kanporatu zituen Jainkoak.

Behin Paradisutik irtenda, Hasiera liburuak Noe, Abraham, Isaak, Jakob eta Jose aitalehenen historia kontatzen du. Abraham Jainkoak aukeratu zuen herri handi baten aita izateko. Horren ondorengoak Egipton eta Kanaango lurraldean ezarri ziren, garai hartan Egiptoko faraoien eraginpean.

Hasiera liburuko pasarteak historian zehar askok hitzez hitz hartu izan dituzte; hala ere, gaur egun talde erlijioso gehienen arabera bertako istorioak (batez ere lehen ataletakoak) alegoriak dira, ez testu zientifikoak, eta beraz beraien irakurketa teologikoa egin behar dela adierazten dute.