Sistèma Solar

Un article de Wikipèdia, l'enciclopèdia liura.

Vision artistica del Solelh, de las planetas del Sistèma Solar e sas orbitas, la cencha d'Asteroïdes e una cometa.

Lo Sistèma Solar es l'ensems de totes los astres qu'orbitan a l'entorn del Solelh e que i son ligats gravitatòriament. Es format de uèch planetas, d'almens 162 satellits naturals o lunas e de centenats de milierats de planetas menoras o planetoïdes, d'asteroïdes, de meteorits e de cometas. A mai, i a tanben çò que se sona lo mitan interplanetari, format per de gases e de polsa. Aquel ensems tot es situat dins un dels braces de la galaxia de la Via Lactèa, que vira a l'entorn del sieu centre a 26 000 ans lutz de distància e a una velocitat de 220 km/s.

[Modificar] Composicion e estructura del Sistèma Solar

Aquestes imatges qu'illustran l'orbita de Sedna, porgisson una idèa clara de l'estructura del Sistèma Solar. Dins los sens de las agulhas del relòtge començant amont a esquèrra: lo Sistèma Solar interior, las planetas exterioras e la Cencha de Kuiper, l'orbita de Sedna e la nívol d'Oort.

[Modificar] Còrses

En tèrmes generals, lo Sistèma Solar es estructurat de la manièra seguenta.

• A son centre trobam lo Solelh, una estela.
• A son entorn viran los uèch còrses màgers, sonats planetas, que son (ordenats del mai pròche al mai luenchenc del Solelh): Mercuri, Vènus, la Tèrra, Mart (o Mars), Jupitèr, Saturne, Uranus e Neptun.
• Las planetas nanas coma Pluton, Èris e Cères. Pluton, dempuèi lo 24 d'agost de 2006, es pas mai considerat coma una planeta, mas coma una planeta nana.
• Tanben a l'entorn del Solelh viran de centenats de milièrs de còrses mai petits que, segon lor talha, composicion e orbita se classifican en planetas menoras o planetoïdes, meteorits e cometas.
  • Las planetas menoras se dividisson en dos grops: los asteroïdes e los objèctes transneptunians, encara que de còps quand se parla d'asteroïdes se fa referéncia a tot l'ensems de las planetas menoras. Las podèm trobar escampadas per tot lo Sistèma Solar mas principalament se concentran dins doas regions: la Cencha d'Asteroïdes o cencha principala, situada entre las orbitas de Mart e Jupitèr e la Cencha de Kuiper, que se tròba delà l'orbita de Neptun.
  • Los meteorits son de ròcas petitas de mens de 50 m de diamètre que son escampadas per tot lo Sistèma Solar.
  • Las cometas son de blòts enòrmes de glaç e de ròca amb d'orbitas fòrça excentricas. Se crei que poiriá existir una region fòrça alonhada del Solelh nomenada nívol d'Oort que seriá la font d'ont provenon las cometas.

[Modificar] Donadas dels principals còrses del Sistèma Solar