Operation Weserübung
Frå Wikipedia – det frie oppslagsverket
Operation Weserübung var det tyske kodenamnet på invasjonen av Noreg og Danmark i april 1940. Kodenamnet kan omsetjast til norsk som Weser-øving. Weser er ei elv i Tyskland. Operasjonen vart delt inn i Weserübung-Nord i Noreg og Weserübung-Süd i Danmark. Dei militære måla med invasjonen var å få tilgjenge til norske hamner. I tillegg ville ein sikra tilgangen på jernmalm frå Kiruna i Sverige, frakta ut via Narvik.
Operasjonen byrja for den tyske marina (Kriegsmarine) sin del den 7. april 1940. I operasjonen deltok mellom anna slagskipa «Scharnhorst» og «Gneisenau» i tillegg til kryssarane «Admiral Hipper», «Blücher» og «Lützow». Kriegsmarine måtte tåla svære tap i Noreg, mellom anna «Blücher», «Königsberg», «Karlsruhe» og 10 destroyarar. I tillegg gjekk ei mengd ubåtar tapt.
Den britiske marina byrja krigen med HMS «Warspite» og H-gruppen av jagarar, mellom anna HMS «Hunter» og HMS «Hardy». I tillegg kom mindre marinestyrkar frå Frankrike og Polen: jagarane ORP «Gorm», ORP «Blyskawica» og ubåten ORP «Orzel».
Den tyske regjeringa fryktet at motstandarane England og Frankrike skulle invadera dei nordiske landa og så truga det indre av Tyskland derifrå. I alle høve ville det kunne ha vorte laga til ei havsblokade av Tyskland. I tillegg kom at den tyske marina gjerne ville ha basar for ubåtar i Noreg. Frå Noreg ville dei lettare kunna koma ut i Atlanterhavet og truga konvoiane med forsyningar til Storbritannia.
