സംസ്കാരം
വിക്കിപീഡിയ, ഒരു സ്വതന്ത്ര വിജ്ഞാനകോശം.
ഒരു സമൂഹത്തിന്റെ സ്വഭാവരീതികള്, ജീവിതരീതികള്, കലാചാതുര്യം, വസ്ത്രധാരണം, ഭാഷ, ആചാരങ്ങള്, വിനോദങ്ങള് വിശ്വാസരീതികള് തുടങ്ങിയവയെല്ലാത്തിന്റെയും ആകെ തുകയെ ആ പ്രത്യേക സമൂഹത്തിന്റെ സംസ്കാരം എന്നു പറയുന്നു. ദേശഭേദത്തില് ഓരോ പ്രദേശത്തേയും ജനങ്ങളുടെ സംസ്കാരം വേറിട്ടിരിക്കുന്നു.
[തിരുത്തുക] ചരിത്രം
ലോകത്തില് മനുഷ്യന് സമൂഹമായി ജീവിക്കാന് തുടങ്ങിയ കാലം തൊട്ടെ അവര്ക്കൊക്കെ പ്രത്യേകം സംസ്കാരങ്ങളുണ്ടായിരിക്കാം. ആദിമമനുഷ്യര് താമസിച്ചിരുന്നിടത്തു നിന്നു കിട്ടിയിട്ടുള്ള തെളിവുകളും അവരുടെ ഗുഹകളില് കണ്ടുവരുന്ന ചിത്രങ്ങളും ഇതാണു തെളിയിക്കുന്നത്. എങ്കിലും ഇന്നു പരിപൂര്ണ്ണ സംസ്കാരം എന്നര്ത്ഥത്തില് കാണുന്ന ഏറ്റവും പഴയ സമൂഹം മെസപ്പൊട്ടേമിയയിലായിരുന്നു ജീവിച്ചിരുന്നവരേയാണ്. അക്കാലത്ത് സിന്ധു നദിതടത്തിലുണ്ടായിരുന്ന ഹാരപ്പാ സംസ്കാരം, മോഹന്ജൊദാരോ സംസ്കാരം മുതലായവയേയും പഴയ പൂര്ണ്ണസംസ്കാരങ്ങളായി കാണാവുന്നതാണ്.
[തിരുത്തുക] പ്രത്യേകതകള്
സംസ്കാരം എന്നുള്ളത് ആപേക്ഷികമാണെന്നാണ് നരവംശശാസ്ത്രജ്ഞന്മാരുടെ അഭിപ്രായം. ഒരു സമൂഹത്തിനെ പുറത്തു നിന്നു വീക്ഷിക്കുന്നവര്ക്ക് അനുഭവപ്പെടുന്നതു പോലെയാകണമെന്നില്ല സമൂഹത്തിനകത്തുള്ളവര്ക്ക് അതനുഭവപ്പെടുന്നത്. സംസ്കാരം സമൂഹങ്ങള് തമ്മിലും ഒരു സമൂഹത്തിനുള്ളില് ഉപസമൂഹങ്ങള് തമ്മിലും ചിലപ്പോള് വീണ്ടും ഉപസമൂഹങ്ങളായും വ്യത്യാസപ്പെട്ടിരിക്കും. ഉദാഹരണത്തിന് ഇന്ത്യന് ഉപഭൂഖണ്ഡത്തിലെ സംസ്കാരം പുറമേ നിന്നു നോക്കുന്ന ഒരാള്ക്ക് ഒരു പോലെയായിരിക്കും, ഇന്ത്യന് ഉപഭൂഖണ്ഡത്തില് വസിക്കുന്നവര്ക്ക് അത് രാജ്യഭേദത്തില് വ്യത്യാസപ്പെട്ടിരിക്കുന്നു. ഇന്ത്യയിലാണെങ്കില് സംസ്ഥാനാടിസ്ഥാനത്തില് ആള്ക്കാരുടെ അഭിരുചികള് വ്യത്യസ്തമാണെന്നു അവര്ക്കനുഭവപ്പെടുന്നു. ജാതീയമായും പിന്നീടീ സംസ്കാരങ്ങള് വേര്പിരിഞ്ഞിരിക്കുന്നതായി കാണാം.
മതത്തിലധിഷ്ഠിതമായും സംസ്കാരത്തിനേ വേര്തിരിക്കാറുണ്ട്. ഉദാഹരണമായി ലോകത്തെമ്പാടുമുള്ള ക്രിസ്ത്യാനികളെയും അവരുടെ ആചാരവിശ്വാസങ്ങളേയും ക്രിസ്ത്യന് സംസ്കാരമെന്ന് വിശേഷിപ്പിക്കാറുണ്ട്.
വിശാലാര്ത്ഥത്തില് ലോകത്തിലെ സംസ്കാരങ്ങളെ പ്രധാനമായും നാലായി തരംതിരിച്ചിട്ടുണ്ട്. പാശ്ചാത്യസംസ്കാരം(പടിഞ്ഞാറന് സംസ്കാരം), പൗരസ്ത്യസംസ്കാരം(കിഴക്കന് സംസ്കാരം), അറബ്യന് സംസ്കാരം,ആഫ്രിക്കന് സംസ്കാരം എന്നിങ്ങനെയാണവ.
[തിരുത്തുക] സാംസ്കാരികാധിനിവേശം
ഒരു സ്ഥലത്തെ ജനങ്ങള് തങ്ങളുടെ സംസ്കാരത്തെ ഉപേക്ഷിച്ച് മറ്റു സംസ്കാരത്തെ സ്വീകരിക്കുന്നതു അപൂര്വ്വമല്ല. ജനത സ്വയം സ്വീകരിക്കുന്നതുമൂലമോ, അധിനിവേശസംസ്കാരം ബലംപ്രയോഗിക്കുന്നതുമൂലമോ ഇങ്ങിനെ സംഭവിക്കാറുണ്ട്. അമേരിക്കന് ഭൂഖണ്ഡങ്ങളിലെ ഇന്കാ, മായന് മുതലായ സംസ്കാരങ്ങളും, ഓസ്ട്രേലിയയിലെ ആദിവാസികളുടെ സംസ്കാരവുമെല്ലാം യൂറോപ്യന് കുടിയേറ്റത്തോടു കൂടി നാമാവശേഷമായവയാണ്. കോളനി വത്കരണ കാലഘട്ടത്തോടു കൂടി പലപ്രാദേശിക സംസ്കാരങ്ങളും യൂറോപ്യന് സംസ്കാരങ്ങള്ക്ക് പൂര്ണ്ണമായോ ഭാഗീകമായോ വഴിമാറിയതായാണ് കണക്കാക്കപ്പെടുന്നത്.