കോല്ക്കളി
വിക്കിപീഡിയ, ഒരു സ്വതന്ത്ര വിജ്ഞാനകോശം.
കോല്ക്കളി കേരളത്തിലെ വിവിധ സമുദായക്കാരുടെ ഇടയില് പ്രചാരത്തിലുള്ള ഒരു നാടന് വിനോദമാണ്. കോല്ക്കളിക്ക് കോലടിക്കളി കമ്പടിക്കളി എന്നിങ്ങനെ പല പേരുകള് ഉണ്ട്. എന്നാല് മലബാറിലെ മുസ്ലീങ്ങളുടെയും ഹിന്ദുക്കളുടെയും ക്രിസ്ത്യാനികളുടെയും കോല്ക്കളികല് തമ്മില് പ്രകടമായ വ്യത്യാസങ്ങളുണ്ട്. വന്ദനക്കളി, വട്ടക്കോല്, ചുറ്റിക്കോല്, തെറ്റിക്കോല്, ഇരുന്നുകളി, തടുത്തുകളി, താളക്കളി, ചവിട്ടിച്ചുറ്റല്, ചുറഞ്ഞു ചുറ്റല്, ചിന്ത്, ഒളവും പറവും തുടങ്ങി അറുപതോളം ഇനങ്ങള് കോല്ക്കളിയില് ഉണ്ട്. പ്രധാനമായും പുരുഷന്മാര് ആണ് കോല്ക്കളിയില് പങ്കെടുക്കാറുള്ളതെങ്കിലും സ്ത്രീകളും പെണ്കുട്ടികളും ഇതില് പങ്കു ചേരാറുണ്ട്. ഇതിനെ “കോലാട്ടം“ എന്നു പറയുന്നു. നൃത്തം ചെയ്യുന്നവര് (കോല്കളിക്കാര്) വട്ടത്തില് ചുവടുവെച്ച് ചെറിയ മുട്ടുവടികള് കൊണ്ട് താളത്തില് അടിക്കുന്നു. നൃത്തം പുരോഗമിക്കുന്നതനുസരിച്ച് കോല്കളിക്കാരുടെ ഈ വൃത്തം വലുതാവുകയും ചുരുങ്ങുകയും ചെയ്യുന്നു. അകമ്പടിഗാനം പതിയെ ഉയര്ന്ന് നൃത്തം തീരാറാവുന്നതോടേ ഉച്ചസ്ഥായിയിലാവുന്നു.
കഥകളി, കോല്കളി, വേലകളി, തച്ചോളികളി, തുടങ്ങിയ കേരളത്തിലെ പല രംഗകലാരൂപങ്ങളും അവയുടെ പരിണാമത്തില് കളരിപ്പയറ്റില് നിന്ന് പലതും കടം കൊണ്ടിട്ടുണ്ട്. കഥകളിയില് കലാകാരന്റെ ശരീരത്തിന് മെയ്വഴക്കം വരുത്തുന്ന സമ്പ്രദായം കളരിപ്പയറ്റില് നിന്ന് കടം കൊണ്ടതാണ്. കോല്കളിയിലെ പല വടിവുകളും നൃത്തച്ചുവടുകളും പദവിന്യാസവും കളരിപ്പയറ്റില് നിന്ന് കടംകൊണ്ടതാണ്.
[തിരുത്തുക] ഇവയും കാണുക
|