Benedictus XVI
Van Wikipedia
Dit artikel is gesjreve in 't Mestreechs. 't Weurt gewaardeerd óm in dit artikel 't Mestreechs aan te hauwe of aan te gaeve welk anger dialek gebroek is.
Benedictus XVI, gebore Joseph Alois Ratzinger (Marktl-am-Inn, Duitsland, 16 april 1927) is sins 19 april 2005 paus en Bisjop vaan Roeme.
Ratzinger woort gebore in 1927 in Beiere es zoon vaan 'ne politiemaan dee sterk antinazistisch gezind waor. In 1941 mós heer evels bij de Hitlerjugend, umtot de wet dat veursjreef. In 1943 mós heer in deens, meh heer deserteerde 't volgend jaor en vlöchde nao Hongarije. Na vaan april tot juni 1945 verpliechde lesse denazificatie gevolg te höbbe gónge heer en zie broor Georg Ratzinger nao 't seminarie. In 1953 kaom zien dissertatie, euver Sint-Augustinus, veerdeg. Vaanaof 1959 doceerde heer aon versjèllende universiteite achterein theologie en bij 't Twiede Vaticaans Concilie adveseerde heer kardinaal Joseph Frings dee in naom vaan Duitsland deilnaom.
In 1972 riechde heer mèt 't magazine Communio op, tot oet zouw greuje tot officieus spreekorgaan vaan de Kattelieke Kèrk. In 1977 woort heer eertsbisjop vaan Muunsje en dao-op ouch kardinaal. In 1981 beneumde paus Johannes Paulus II häöm es prefect in de Conkergatie veur de Gluifslier (de aw Inquisitie), en in 1982 lag heer zien functie es eertsbisjop nier. In 2002 woort heer deke vaan 't Collezje vaan Kardinale. Volges ingewijde waor heer intiemer betrokke bij paus Johannes Paulus II es einegen aandere.
Wie Johannes Paulus II op 2 april storf, woort heer dèks es sjansmaker geneump, allewel tot neet ederein dao einstummeg euver waor: väöl lui verwachde 'nen Italiaanse paus, aander 'ne Zuid-Amerikaanse. Wie 't conclaaf op 18 april begós, woort heer in weineg stumroondes de volgenden daag um zes oor tot paus oetgerope.
Wie ziene veurgenger steit Benedictus XVI bekind es pacifistisch en conservatief. Heer gèlt es hiel erudiet (heet ummers es professor gedoceerd) en heet 'n passie veur Beethoven.
Op 25 januari 2006 gaof heer zien ierste encycliek oet: Deus Caritas est.
[bewirk] Externe link
 |
Commons: Benedictus XVI – Media gerelateerd aan dit óngerwerp |
