Benedikt XVI.
Aus Wikipedia
Da Påpst Benedikt XVI., mid wöitlichm Nåm Joseph Alois Ratzinger (* 16. Abrui 1927 in Màrktl am Inn, Bistum Båssa, aufgwachsn in Aschau am Inn, Tittmoning und Traunstoa), is as Owahàp fo da remisch-katholischn Kircha und fom Vatikàn. Sei Woi zum Påpst wår am 19. Abrui 2005 schå im fiartn Woigång; mid 26 Stund is des Konklàve oiso fagleichsweis gschwind furbeigweng. Sei Forgànga wår da Johannes Paul II., bei dem wos da Joseph Ratzinger scho a wichtige Stöi ois Beråta eignumma ghod hod.
Gborn worn is da Ratzinger Sepp am 16. Abrui 1927 in Marktl, am boarischn Derfe ned weid vo Oideding. Gtauft worn issa glei am gleichan Dåg, wås a Karsåmstag gweng is, mit am Taufwasser, was fiers Osterfestl gånz nei gweiht war - drum hoda spada a oiwei wiader gsågt, dassa a gånz bsundernes Vahejdnis zu deram Gheimnis vo dem Osterfestl hod. Wiara zwoa Jåhr oid gweng is, is sei Fåmij nach Dittmoning zong, wås a ånderne kloane Stadt an da Soizach is, und drei Jåhr spader nach Traunstein. Då hat der Ratzinger Sepp an greßtn Teil vo seiner Kindheit zuagbråcht.
1951 issa nachherd in Freising zum Priester gweiht worn und is boid drauf aa Doktor gworn. 1958 håda an Lehrstui fier Dogmatik und Fundamentoitheologie in Freising kriagt. Spada håda aa in Bonn, Münster, Tibingen und Rengsbuarg glahrt, åbå 1977 hot des ois a End ghåbt, nå hod nemli da Båbst, da Paul da Sechste, gsågt, dass da Ratzinger Sepp Erzbischof vo Minger und Freising wern soi. Ois a soichaner issa aa scho boid Kardinal gworn und håd 1978 zwoamoi an neian Båbst wejn derfa - bam zwoatn Moi is da Wojtyla Karol da Gwinner gweng, der wo dann an Naman Johannes Paul da Zwoate ognomma hod und dem sei engster Vatrauter da Ratzinger Sepp spada gworn is. Des hod 1981 ogfanga, ois a da Präfekt vo da Glamskongregation gworn is und hod 2002 san Hehepunkt areicht, wiara da Dekan vo de Kardinäle gworn is. In dera Zeit hods vui Leid gem, wo eahm ned meng håm, weila a recht konservative Eistellung ghåbt hod. Zum Beispui hoda de Bfreiungstheologie varurteilt, er hod gsågt, dass de Priester weiterhin ned heiråtn derfa, dass de Proteståntn koa wirkliche Kirch ned san und so weida. Des ois moanta jetzat no genauaso, åba jetzat, wora Båbst is, redta aa sovui ieber anderne Sachan, wo de Leid liaber hern, dass sei Image, varoim dahoam in Deitschland, vui besser gworn is.
Ois Båbst hoda a scho a pår wichtige Såchan gmåcht: Zwoamoi wåra scho in Deitschland, oamoi affm Wejdjungddåg in Kejn, s'åndermoi in Bayern, des hoaßt in Minger, Rengsbuarg, Oideding und gånz kurz in Mårktl. In Regnsbuarg håda a Ren ghoitn, de wo vui Muslime ned gfoin hod, weila då an oidn ostremischn Kaiser zitiert hod, der wo gsågt had, da Islam hätt nix Guats ned gbråcht. Bislang hoda Benedikt zwoa Enzyklika gschriam, d'oine iaber d'Liab (Deus caritas est = Da Herrgott is d'Liab), und d'ander iaber d'Hoffnung (Spe salvi = Auf'd Hoffnung hin samma grett). 2007 hoda as Motu Proprio Summorum Pontificum rausbrocht, wo er an oidn, tridentinischn Messritus wiada offiziej zuaglåssa hod.
[dro werkln] Weblink
- Buidln vom Ratzinger Sepp
- Rezension vo Ulrich Karger zu Joseph Ratzinger: Salz der Erde in seina Biachanochles - des is a Buach, in dem da Ratzinger in am Gspräch ausfialiche Antwoatn gibt, no bvoara Pobst woan is.
