Jup Weber
Vu Wikipedia, der fräier Enzyklopedie.
De Joseph (Jup(p)) Weber, gebuer de 15. Juni 1950 an der Stad Lëtzebuerg, ass e lëtzebuergeschen Expert fir Bëscher a fréiere Politiker.
De Jupp Weber ass zu Stroossen grouss ginn an huet no sengem Sekundärstudium am Koléisch e Studium fir Forstingenieur op der Universität für Bodenkultur Wien gemaach. Duerno huet hien e Stage an der Forstverwaltung zu Lëtzebuerg gemaach, an ass awer no deem Stage bei eng Lëtzebuerger Bank schaffe gaang. Fir méi Zäit ze hu fir seng politesch Aktivitéit huet en déi Plaz awer kuerz duerno opginn.
De Jup Weber war 1983 e Matgrënner vun Déi Gréng. Virdru war en ee vun den Animateure vum Radio Grénge Fluessfénkelchen, engem "Pirateradio" vun Arel (zu deeër Zäit hat RTL de Monopol fir Radiosprogrammer zu Lëtzebuerg). 1985 ass e mat Aneren aus der Partei Déi Gréng ausgetrueden an huet eng eege Lëscht, d'Gréng Lëscht Ekologesch Initiativ (GLEI) gegrënnt. 1989 hunn déi zwou Parteien awer nees zesummefonnt. 1994 gouf de Jup Weber fir Déi Gréng an d'Europäescht Parlament gewielt; 1995 huet en awer déi Gréng Fraktioun verlooss an ass der Europäescher Radikaler Allianz bäigetrueden.
1999 koum et och zu Lëtzebuerg nees zu enger Ofspléckung: de Jup Weber huet d'Gréng a Liberal Allianz gegrënnt, déi bei de Chamberwale kee Sëtz am Lëtzebuerger Parlament krut.
