Ptolemeo
De Wikipedia, le encyclopedia libere
Ptolemeo (Claudius Ptolemaeus; ca. 90 - ca. 160) esseva un astronomo e geographo qui viveva e travaliava in Alexandria, Egypto.
Ptolemeo esseva le autor del tractato astronomic cognoscite como le Almagesto (in greco hè megalè syntaxis, le grande tractato). Isto esseva preservate, como multe obras grec classic de scientia, in manuscriptos arabe (su nomine veni del lingua arabe) e solmente disponibile in traduction latin (de Gerardo de Cremona) in le dece-secunde seculo. Su theorias astronomic influentiava le pensamento astronomic e mathematic usque al 16te seculo.
Ptolemeo applicava su studios de trigonometria al construction de astrolabios e horologios solar. Ille anque applicava le studio de astronomia a astrologia, creante horoscopos. Tote iste theorias e studios esseva scribite in su obra Tetrabiblon.
Ptolemeo anque esseva un bon optico. In le campo de optica ille explorava le proprietates de lumine, super toto de refraction e reflexion. Su obra Optica es un bon tractato super le theoria mathematic de lumine.
Le mundo de musica anque non esseva ignorate per Ptolemeo. Ille scribeva un obra de theoria musical appellate Harmonicos.
Un altere grande obra es su Geographia, in le qual ille describe le mundo de su epocha. Ille utilisa un systema de latitude e longitude que serviva como exemplo al cartographos durante multe annos. Un del locos describite in iste obra es Makoraba in le Peninsula Arabe, que forsan es le citate Mecca.
