Wolfgang Amadeus Mozart
De Vichipedie, la enciclopedie libare dute in marilenghe.
Wolfgang Amadeus Mozart, (Salisburc, ai 27 di Zenâr 1756 - Viene, ai 5 di Dicembar 1791), al è stât un compositôr che al à creât oparis musicâls di straordenari e universâl valôr artistic. Al è considerât un dai gjeniis de musiche. Musicist di gran e râr talent di piçul in su, al murì zovin a nome trente cinc agns, lassant pagjinis che no si puedin dismenteâ di musiche sinfoniche, di cjamare, musiche sacre e operistiche. Il so non Wolfangus al jere in onôr dal so nono materni; Amadeus, in ricuart dal fradi Carl Amadeus, muart trê agns prin. Il frut al fo clamât cun afiet "Wolferl".
Indis |
[cambie] Biografie
[cambie] La infanzie a Salisburc
In famee cul piçul Wolfgang a jerin il pari Leopold, om dal caratar suturni, plen di ideâi dal Iluminisim, straneôs e spreçant, compositôr, violinist di cort e insegnant di musiche (so une Violinschule dal 1756) al servizi dal arcivescul Anton Firmian; la mari Anna Maria Pertl, femine semplice, dal caratar viert e pronte al scherç; la sûr Maria Anna Mozart, clamade Nannerl, nassude cinc agns prin di lui, tal 1751, e a sô volte un grum dotade pe musiche. I Mozart, si erin maridâts ai 21 di Novembar dal 1747, vevin za vût altris cinc fiis, ducj muarts in fassis. Al è dât par sigûr che al tacà cu la musiche adore di piçul, cuant che il pari al scomençà a insegnà a sô sûr il clavicembal e il piçul Wolfgang, di trê agns, incuriosît al passave oris a zuiâ cu la tastiere. Leopold al metè adun i esercizis che al de di studiâ a sô fie intun librut titulât Pour le clavecin, ce Livre appartient à Mademoiselle Marie-Anne Mozartin (1759). Da une note dal pari Leopold si ven a savê che Wolfgang al jere za bon di sunâ cheste racuelte di esercizis. Il fat al è confermât ancje di une letare scrite di sô sûr: «Cuant Wolfgang al à vût cuatri agns, nestri pari al à tacât a insegnai cierts minuets. A Wolfgang i coventave nome mieze ore par sunâju a la perfezion. Al faseve pas indenant cussì straordenaris che za a cinc agns al componeve curts tocs par sunâju al pari cussì che lui al podès scriviju». Altris personis che cognosserin il piçul Wolfgang a restarin maraveadis da lis sôs capacitâts. Cuant che al scomençà a componi il piçul Wolfgang al sunave i soi tocs al clavicembal o li cjantuçave, in maniere che il pari, plui espert, al podès scriviju. Al scomençà a scrivi di bessôl de etât di vot agns. Tra il 1763 e il 1766, la famee Mozart si movè par l'Europe. Tra lis fermadis: Munic di Baviere, Francfuart, Bruxelles, Paris, Londre, dulà che, al so prin conciert public, Wolgang Amadeus al sunà cun esecutôrs famôs tant che il talian Giovanni Battista Cirri.
[cambie] Mozart in Italie
 |
«La nestre musiche di glesie e je un grum difarent di chê italiane, e simpri di plui, che une Messe cun dut il Kyrie, Gloria, Credo, la Sunade a la Epistole, l'ofertori cul so Motet, Sanctus ed agnus Dei e ancje la plui Solene, cuant che al dîs la Messe il Princip stes non à di jessi plui lungje di trê cuarts di ore. I vûl un studi particolâr par cheste sorte di composizion, e che à di jessi però une Messe cun ducj i struments - Trombis di vuere, timbals e vie indenant »
|
|
(Giovanni Battista Martini, da une letare par talian di Amadeus al "molto Rev.do Mestri", spedide di Salisburc a Bologne ai 4 di Setembar 1776 )
|
A Bologne (in dôs voltis, da Març a Otubar dal 1770) al fo ospit li dal cont Gian Luca Pallavicini, al cjatà musiciscj e studiôs (dal celebri cjastrât Farinelli ai compositôrs Vincenzo Manfredini e Josef Myslivek, fin al storic de musiche inglês Charles Burney e pari Giovanni Battista Martini). A Parme al assistè a un conciert dal sopran Lucrezia Agujari, clamade la Bastardella. Amadeus al cjapà lezions di cuintripont da pari Martini e si presente al esam par la Academie Filarmoniche di Bologne. Il dificil esam dal zovin Mozart nol fo tant brilant, e il stes Martini al à scugnût judâlu e sburtâlu par promovilu. Il Pape i de la onorificence dal spiron di aur. Al visite ancje Napoli, Mantue, Trent. Mozart al voleve restâ a Milan come compositôr di cort, ma Marie Terese d'Austrie no jere propite contentone e cussì e scriveve: «No capis parcè che o vês bisugne di un compositôr o di int inutil ... A avilìs il servizi cuant si trate di int che e viaze ator pal mont come peçotârs; Mozart cun di plui al à une grande famee» (Marie Terese d'Austrie).
Inamorât de cantante Aloysia von Weber al sposà la sûr Costanza.
[cambie] La malatie e la sô muart
La malatie e la muart di Mozart a son stadis e a son ancjemò un argoment di studi pai musicolics e pai storics un grum dificil, par vie di liendis romantichis e riplen di teoriis strambis. I studiôs no van dacuardi ni sul moment dal impenzisi de malatie ni sul scomençâ dal cors pal piês de salût di Mozart, cun di plui al è inciert il moment là che Mozart al à capît di sei dongje a murî e no si sa se il savêlu al à sburtât in part lis sôs ultimis oparis. La interpretazion romantiche e cjacare di un decadiment graduât cuntune spiete di vite che à pleât al scûr lis sô ultimis composizions intune misure compagne al so patiment. Al opuest cualchi savint de sô ete al sotlinie che Mozart tal ultin an al fos di bon umôr e che la muart e rivà no spietade ancje pai amîs e pe stesse famee. La tombe di Mozart e reste discognossude; la so musiche e je il so monument.
Seont la liende, Mozart al murì dismenteât di ducj. In veretât al à vût a cort fin tal ultin un lavôr ben paiât e a vê comessis des plui bandis de Europe, soredut di Praghe E son restadis sôs letaris. Dulà che al domande un jutori economic che testemonein il fat che al fos di manie plui che largje puartât a spindi dut ce che al cjapave. Nol fo sepulît intune fuesse comun, cemût che al è stât scrit, ma in une normâl tombe comunâl conformi a la regule dal 1783. Ancje se al cimitieri di St. Marx la tombe origjinarie e je lade pierdude, li che e veve di jessi stade, e intal Zentralfriedhof, a son stadis metudis in memorie lis lapidis. No je clare nancje la cause de muart. Il so certificât al puarte “hitziges Frieselfieber” (“fuarte fiere miliâr”,che in chê volte si pensave che e des infet), une definizion che te medisine dal dì di vuê no je vonde clare par la cause de muart. Cualchidun al à pensât a un invelenament da mercuri, a la fiere reumatiche, o ancje a peste. In chê volte si doprave il salàs, come che al è documentât, che po vê sburtât a la muart un om za debul. Al è probabil che al sedi muart di nefrite.
Mozart al murì inte gnot dal 5 di dicembar dal 1791, pôc prime de une, tant che al steve daûr al so ultin lavôr: il Requiem ordenât dal cont Fritz Von Walsegg, che al voleve fâlu passâ par so al funerâl de sô femine. Al zovin compositôr Franz Xaver Süssmayr, arlêf e amì di Mozart, i derin il compit di puartâ insom il Requiem. Intal 1809 Constanze Weber Mozart, la vedue, si je tornade a maridâ cul diplomatic danês Georg Nikolaus von Nissen (1761–1826), gran amiratôr di Mozart che al publiche plui di cualchi toc slavraçât dalis letaris dal compositôr e al scrivè la sô biografie.
[cambie] Mozart e Salieri
Si cjacare di ripics e fuarte rivalitât jenfri Mozart e Antoni Salieri che in veretât no jere propite. Il poete e scritôr rus Aleksandr Sergeevic Puskin crodint a chestis vôs, e a la interpretazion romantiche, intal 1830 al scrivè “Mozart e Salieri” une drame in viars, là che Salieri roseât de gjelosie al comissione al odeât rivâl un Requiem, cu la intenzion di robâilu, dopo vêlu invelenât, e fasintlu passâ par so. De opare di Puškin a àn dit: "Se Salieri nol à copât Mozart, dal sigûr Puškin al à copât Salieri". Ai 25 di novembar dal 1898, al Teatri Solodovnikov di Mosca, e va in sene la prime de opere Mozart e Salieri dal compositôr rus Rimskij-Korsakov fondade su la tragjedie di Puškin. Intal 1978 un adatament al va in sene cun grant sucès a Londre: al è Amadeus, dal dramaturc Peter Shaffer: une rileture dal lavôr di Puškin salacor ancjemò plui fuart. Reste la invidie di Salieri e il Requiem domandât a Mozart di un om vistît di neri (Salieri mascarât), il dut contât di Salieri stes. Intal 1984 dal drame di Shaffer al ven fat un cine da Miloš Forman clamât Amadeus, (tornât a editâ intal 2002). Il Salieri dal cine (un brâf F. Murray Abraham) al è mancul piês di chel teatrâl di Shaffer.
[cambie] Mozart e Haydn
Grande e fo la amicizie e la stime tra Mozart e Haydn ancje se chest al fo di vincjecuatri agns plui vecjo. Nol è pussibil savê cuant che Mozart al jentrâ in rapuarts cun Haydn ma di sigûr o savìn che intal 1785 i doi musiciscj a jerin amigons, si devin dal tu, e a àn vût plui di cualchi incuintri in cjase dai fradis Storace, sunant ancje insieme musiche di cjamare. Mozart al jere prin ami dal fradi Michael Haydn e si sa che Haydn, de residence dai Esterházy dulà che al lavorave, al leve no di râr a Viene dulà che Mozart al jere a stâ dal 1781. Haydn al à subite capît la grandece di Mozart e alc al à imparât di lui. Mozart al à ricognossût la impuartance di Haydn, plui di ducj chei altris musiciscj, dedicant a lui ben sîs cuartets (K 387, K 421, K 428, K 458, K 464 e K 465), scrits tra il 1782 e il 1785. I cuartets vignirin scrits "inte gnove e speciâl maniere" bandonant i principiis de composizion dal sietcent, fondade di une melodie cun compagnament par meti in mostre dutis lis cuatri vôs che cussì si cjatin a fevelâ tra di lôr in maniere compagne. La stime di Haydn par Mozart e reste intes peraulis al pari di Wolfgang Leopold: "Ûs dîs prin di dut denant di Diu, di galantom, che vuestri fi al è il plui grant compositôr che jo o vedi cognossût, di non e di persone. Al à gust e il plui grant sens de art dal componi".
[cambie] Il catalic
Lis oparis di Mozart a son metudis adun intal famôs catalic de metât dal votcent di Ludwig von Köchel. Dutis lis oparis a àn un numar progressîf cun prin la sigle KV che e sta par Köchelverzeichnis, ven a stâi Catalic Köchel. Il catalic al met adun 626 oparis. Il numar un, il KV 1 al è un minuet scrit cuant che al veve sîs agns. Il KV626 al è il famôs Requiem in Re minôr. Tal so catalic e je tratade dute interie la leterature musicâl in ducj i gjenars. Il teatri musicâl al è la sô vocazion parcè che al è dulà che al po meti insieme ducj i gjenars. Lis sô oparis plui famosis a son il "Don Giovanni" e il "Flauto magico".
