William Shakespeare
Dendi Güiquipeya
William Shakespeare (April, 1564 - 23 d'abril, 1616) hue un escrebiol inglés. P'abonda henti que hue el mehol escrebiol inglés de tolos tiempus i unu e los más grandis en heneral. Escrebió puerosas traheyas i risórias comeyas. La su puesía i labutus de teatru son al tentu la condición umana, con sentimientus talis cumu el querel, los celus, la rabiña, la valentía, i tal i más. Los dagalis deprendin con él enas escuelas arreol tol mundu. Shakespeare escrebió los sus labutus entri arreol 1585 i 1613.
[eital] Vía
Shakespeare tuvu nacéncia en Stratford-upon-Avon, Inglaterra, en abril de 1564, el ihu e John Shakespeare i Mary Arden. El pairi e Shakespeare era ricu cuandu el su ihu tuvu nacéncia, peru endispués perdió la su emportáncia pol mé de nu sabemus lo qué. Duranti esti tiempu hue churruchel (vendeol de lanas), que estaba huera e la lei.
Shakespeare embó con Anne Hathaway, quien era ochu añus mayol que él, el 28 e nobiembri e 1582. Anne estaba en estau e tres mesis. Tuvun tres dagalis: Susanna, Hamnet i Judith. Endispués del su matrimoñu, el nombri e Shakespeare nu apaició enos documentus estóricus hata qu'encetó a escrebil, en Londris.
En 1596 Hamnet espenó. Pol mé lo apaiciu del su nombri, p'angunus que la su muerti hue la idea el labutu e teatru e Shakespeare La Tráhica Estória e Hamlet, Préncipi e Dinamalca.
Arreol 1598 Shakespeare vivió en St. Helen, Bishopsgate, i estaba ena cimera e las lista d'atoris nel labutu "Every man in his Humour", pol Ben Jonson.
Shakespeare se gorvió escrebiol i alogu tuvu la su própia balburda, hucheá "Los ombris de Lord Chamberlain". La balburda agarró esti nombri, cumu algotrus del su tiempu, del ombri que los ayuaba con dineru: Lord Chamberlain. La balburda se gorvió tan populal que, endispués la muerti e la réina Elizabeth I, deque Haimi I hue rei (1603), chambun el nombri e la balburda a "Los ombris del Rei".
En Londris, Shakespeare tuvu abondu ésitu. Mercó una nueva casina en Blackfriars, Londris, i tamién hue el dueñu e la segundera casa más grandi e Stratford: New Place.
Shakespeare ehó de labutal arreol 1611 i espenó en 1616. Estuvu emboau con Anne hata la su muerti. El su nichu idi: "Benidiu seya el ombri que ponga estas piedras, i malidiu seya el que mueva el mi calavernu (los güesus)." Estu senifica qu'el ombri que cuaharingó el nichu era güenu, i si angunu moviesi el su cuelpu, tendríe mala suerti. P'angunus que algotrus labutus de Shakespeare podríen estal endrentu el su nichu, peru naidi l'á comprebau enhamás, quidiá pol estal acagazau e las parabrinas c'ain nel nichu.
[eital] Labutus popularis de Shakespeare
Velaquí una lista e angunus labutus de teatru e Shakespeare:
- Traheyas de Shakespeare
- Romeu i Hulieta
- Macbeth
- Rei Lear
- La Tráhica estória e Hamlet, Préncipi e Dinamalca
- Otelu
- Titu Andrónicu
- Huliu Césal
- Antoñu i Cliupatra
- Coriolanu
- Troilu i Crésia
- Timón de Atenas
- Comeyas de Shakespeare
- La comeya e los marrus
- A güen acaberu, güen prencípiu
- Cumu vos peti
- Sueñu duna nochi e veranu
- Abondu ruiu i poquinas nuedis
- Miía pol miía
- La tempestá
- El mercael de Venécia
- Las alegris comairis de Windsor
- Labutus perdius de querel
- Los dos caballerus de Verona
- Periclis préncipi e Tiru
- Cimbelina
- Cuentu d'ibielnu
- Estórias de Shakespeare
- Ricardu III
- Ricardu II
- Enriqui VI, parti 1ª
- Enriqui VI, parti 2ª
- Enriqui VI, parti 3ª
- Enriqui V
- Enriqui IV, parti 1ª
- Enriqui IV, parti 2ª
- Enriqui VIII
- El Rei Horhi
