Mai

Us der alemannische Wikipedia, der freie Dialäkt-Enzyklopedy

Technische Yschränkung:
Dr koräkt Titel wär: »Mäie«

Der Titel vu dem Artikel isch mehdütig. Witteri Bedütige findet mer under Mai (Begriffsklärung).

Historische Jôhrestag
April - Mai - Juni

1	2	3	4	5	6	7
8	9	10	11	12	13	14
15	16	17	18	19	20	21
22	23	24	25	26	27	28
29	30	31

Dialäkt: Züridütsch (See)

Dr Mai is dr föifti Monet vom Jahr im Gregorianische Kalender.

Er hät 31 Tääg und isch nach dr Göttin Maia benännt. Nach andere Quelle leitet er sich vo Iupiter Maius ab, em Wachstum bringende Jupiter.

De Karl dr Grossi hät im 8. Jahrhundert de Name Wonnemond iigfüehrt, wo uf di warme Temperature und die wiedererwachti Vegetation hiiwiist. D Bezeichnig Blumenmond hät dr Mai wege dr Hauptblüeteziit vo de meischte Pflanzen überchoo. Dr Mai heisst au Weidemond, wil i dem Monet s Vieh uf d Weide bracht wird (im Gebirge: Alpuuftrieb). Nach alter Überlieferig dörf mer sich aber dr Wärmi erscht nach de so genannte Iisheilige vom 11. Mai bis zum 15. Mai sicher sii.

Ungefähr sit em 13. Jh. wird dr Mai in Europa mit Maifiire, -umgäng und -ritte (z.B. Leonhardiritt, Georgiritt) gfiiret, in viile Gegende vo Düütschland und Öschterriich isch s Uufschtelle vo oft imposante Maibäum gwachses Bruuchtum. I dr Schwiiz kennt mer das nöd oder nur sehr sälte.

Im römische Kalender isch dr Mai uurschprünglich dr dritti Monet gsii. Im katholische Chilejahr isch dr Mai bsunders dr Verehrig vo dr Gottesmuetter Maria gwidmet (Maiandachte), drum wird er i dem Umfeld au als Marienmond bezeichnet.

Dr erschti Mai isch dr internationali Fiirtag (in Düütschland: gsetzl. Fiirtag) vo dr Arbeiterbewegig.

Am 2. Sunntig im Mai isch in düütschschprachige Länder Muettertag.

Dr Mai fangt mit em gliiche Wuchetag wie dr Januar vom Folgejahr aa.
Aber kein andere Monet vom gliiche Jahr fangt mit em gliiche Wuchetag wie dr Mai aa.