Kithairon
Vu Wikipedia, der fräier Enzyklopedie.
Kithairon (gr. Κιθαιρώνας) ass de Numm vun engem Bierg a Griicheland. Säin héchste Punkt ass op 1.410 m wou och d'Flëss Asopos a Kephisos entsprangen.
An der Antikitéit huet de Kithairon déi westlech Grenz tëscht Attika a Böotien gemaach, déi duerch Wuechttierm a Kastellen (z.B. Panakton, Drymos, Phyle) befestegt waren. Am Süde loung Eleutherai, dee mythischen Uert wou den Dionysos hierkoum. Um Nordhang huet sech d'Schluecht vu Plataeae ereegent.
A verschiddene Kulte goufen um Bierg den Dionysos, den Zeus, d'Hera an d'Nymphe veréiert. De Numm vum Kithairon geet op e böotesche Kinnek zréck. Der So no hate sech den Zeus an d'Hera mol erëm eng Kéier an d'Hoer kritt wéinst dem Zeus senge Säitespréng. De Kinnek Kithairon huet dunn dem Zeus geroden eng hëlze Statu maachen ze loossen, hier Fraekleeder unzedoen a mat hier an engem Won ronderëm ze fueren fir se als séng nei Fra ze presentéieren. Wou d'Hera dovu gewuer ginn ass, ass si an enger Roserei op de Won duergaang an huet der Statu d'Kleeder erofgerappt. Wéi si gemierkt huet dat se ugeschmiert gi wor, huet si missten häerzlech laachen an war bereet sech erëm mam Zeus ze verdroen. Zu deem Gedenken ass all Joër d'Fest vun den Daidale gefeiert (Daidalen war d'Bezeechnung fir déi hëlze Statuen) ginn.
Och aner griichesch Mythen hun sech zum Deel hei ofgespillt: den Herakles huet hei Ranner gehitt an de sougenannte Kithaironesche Léiw ëmbruecht, den Ödipus as hei ausgesat ginn, den Apollo an d'Artemis hunn hei d'Kanner vun der Niobe ëmbruecht, an och d'Mythe vum Pentheus, Aktaion an Antiope hate mat dësem Bierg ze dinn.
 |
Griichesch Mythologie – All d'Artikelen op der Wikipedia zu der griichescher Mythologie. |
