Leo Van Paemel
Uit Wikipedia
Leo Van Paemel (Blanknberge, 15 januoari 1914 - Brugge, 28 januoari 1995) was een West-Vlamsche kunstschilder.
[bewerkn] Leven
Leo Van Paemel is geboren in Blanknberge tegoare me z'n twillingbroere Willy. Je verteldege zelve dat 'n altyd getêkend et vo zoverre dat 'n z'n kinderjoarn koste erinnern. D'r bestoan nog têkeningen van em gemakt in Lissewege, Uutkerke en Blanknberge van 1927. Je was ton 13 joar oud. Als lêerling van de RMS in Blanknberge mocht 'n z'n Nederlandsche ipstellen met eigen têkeningen illustreern. Die werksjes wierdn ton uutg'angn ip de overdekte speelplatse. Die steun ip schole was een duwtje in de goeie richtinge moa nie den ênigstn stimulans. Je vergezelde geregeld z'n nounkel Jules, die ton nog schilderde, deur 't polderlandschap round Uutkerke, Lissewege, Zuunkerke of Dizzêle. Doar et Leo Van Paemel z'n êeste lessen in 't schildern gekreegn.
Loater et 'n gestudeerd an de Keuninklike Academie vo Schône Kunstn in Antwerpn van 1929 tout 1934 en wierd doa verschillige kêren bekrôond. In 't êeste joar an den academie krêegt ’n al een êeste prys en d’r volgdn d’r nog vele.
In 1934 ist ’n achter een exoamn toegeloatn an ‘t Nationaal Hoger Instituut vo Schône Kunstn in Antwerpn woa dat 'n tout 1940 een deur Isidoor Opsomer styf geweirdeerd lêerling was.
Je was een generoatiegenôot van Paul Boudry, Jan Cox, Jack Godderis, René de Coninck, Mark Macken, Mark Mendelson, Luc De Jaegher en Luc Peire, moa j'is een totoal eigen weg ipgegoan. Leo Van Paemel was een persôonlike vertolker van de Nôordzêe en alles wat d'r mee verband oudt: 't strangeleven, de sfeer ip de zêedyk, de gezellige drukte in de visschers-en jachtoavetjes, de Polders...Je schilderde ook in Frankryk (Provence, Normandië, Bretagne), Ingeland (Lancashire), en Olland. Z'n specialiteit was wel 't schilderen van portretfigeurn. J'ist er in gesloagd een moderne interpretoatie te geevn an een klassiek genre, met de techniek van d'oude mêesters.
In 1942 - 1946 ad 'n z'n atelier in Brussel. In 1946 kwamt 'n were noa Blanknberge. Vanof de joaren '60 et 'n ton van de kunst z'n beroep gemakt.
In 1968 ist 'n noa Brugge goan weunn woa dat 'n z'n atelier ad vlak by d'alletorre. J'is ook in Brugge gestorvn moa je ligt begroavn in Blanknberge lik dat 'n 't altyd zelve gewild et.
[bewerkn] Werk
- Prentnkabinet van de Keuninklike Bibliotheke, Brussel
- Museum, Ostende
- Geprimeerd in de vuufjoarlikse Prys vo Schilderkunst van de Provincie West-Vloandern (1950)
- Schilderyen in Stads-en Stoatsbezit
- Vier van de grôte officiële portrettn van Blanknbergsche burgemêesters in de fêestzoale van 't staduus in Blanknberge: L.Nuytemans (1961), G.Dhondt (1962), M.Devriendt (1964), S.Declerq (1995)
- Grand Prix du Président gewonn ip de joarlikse tentôonstellinge van de Académie Internationale des Arts Contemporains in Enghien (Edingen) (1989)
- Retrospectieve tentôonstellinge georganiseerd deur 't Stadsbestier van Blanknberge in 't Stedelik Casino: "Leo Van Paemel 75 jaar"
- Festival international de peinture d' Aix en Provence (1991)
- Privé verzoamelingn in België, Olland, Ingeland, Frankryk, Duutsland, Canada en de Verênigde Stoatn
[bewerkn] Varia
- De etser Jules Van Paemel was z'n nounkel.
- D'r is een monografie over em geschreevn deur de Brugsche schryver Paul Vanderschaeghe met foto's van z'n werk: Leo Van Paemel, verheerlijker van leven.