Jules Van Paemel
Uit Wikipedia
Jules Van Paemel (Blanknberge 23 februoari 1896 - 3 januoari 1968) was een West-Vlamschn architect en groafisch kunstnoare die surtout gekend is vo zyn etsen.
[bewerkn] Leven
Je was de joungstn van tien joungers. Je ging noa de loagere en middelboare schole in Blanknberge. Z'n medelêerlingen verteldn da zyn boekn ton al vul stoundn me têkeningen. Achter de middelboare schole gingt 'n noa de Keuninklikke Academie vo Schone Kunstn in Gent woa dat 'n de cursussen architecteure en têeknen volgde. Doar krêegt 'n lesse van George Minne, een poar joar vo den Êestn Weireldoorloge. In 1914 on de Duutschers arriveerdn gingt 'n weg uut Blanknberge en an z'n 18 joar wierd 'n vrywilliger in 't Belgisch leger vo vier joar. In 1919 erbegost 'n z'n studies architecteure an de Keuninklikke Academie van Brussel. In 1922 is 't 'n getrouwd me de dochter van de schryver Grégoire Le Roy die ton conservator was van 't Wiertzmuseum in Brussel. In 1928 begost z'n lange en vruchtboare carrière als etser. Van 1927 toet 1935 was 't 'n ook architect in Blanknberge en Brussel en van 1951 toet 1965 lêroare têeknen en graveure an de "Académie Royale de Mons".
[bewerkn] Werk
Z'n oeuvre omvat 285 nummers, surtout etsen, en vor een grôot dêel landschappn. Z'n enorme verbeeldienge inspireerde em toet composities die krioelen van fantastische bêestn en eigenoardige personages. Jules Van Paemel is een kunstnoare met internationale bekendheid. Werkn van em wordn bewoard in Brighton, Boedapest, Buenos-Aires, Caïro, New York, Parys, Warschau...
Jules Van Paemel is ook styf goed vertegenwoordigd in 't Prentnkabinet van de Keuninklikke Bibliotheke in Brussel.
Een poar werkn:
- De toren van Babel -1933 (zink 595x764 mm)
- Het mounster van de Schelde -1935 (koper 600x760 mm)
- Jezus verdrijft de kooplieden uit de Tempel -1947-48 (koper 554x610 mm)
- U.N.O. -1947 (koper 554x610)
- Visioenen
- Apotheose van James Ensor
- Het laatste oordeel
- De zeven hoofdzonden
- Relativiteit en bijgeloof
- Noa's ark
- Kolentijdperk
[bewerkn] Varia
- In Blanknberge is 't er een stroate noa Jules Van Paemel vernoemd.
- Je was bevriend met de kunstschilder en etser James Ensor. Ip een etse van Ensor (La Cathédrale), met d'and ingekleurd, et 'n geschreven: "Pour Jules Van Paemel graveur magnifique en souvenir de son apothéose". Gesigneerd James Ensor 1933.
- Je was de nounkel van de Blanknbergsche kunstschilder Leo Van Paemel.
