Republiche marinare
Da Wikipedia, ła ençiclopedia libara.
La definizion de Republiche marinare la se dopara in relazion a zerte sità costiere (de la penisola italiana ma anca no), che tra el X e el XII secolo le ga godesto de un periodo de prosperità economica par via de la so atività comercial, in te un quadro de larga autonomia politica. In genere, la definizion la se riferise in particolar a quatro sità italiane: Amalfi, Genoa, Pisa e Venexia.
Oltre a ste quatro chi, che le xe le pi famose, ghe xera anca altre sità che le godea a la stessa maniera de l'indipendenza (con un goerno autonomo soto forma de republica oligarchica, un so scheo, un so esercito, etc.), le gavea partesipà a le Crociate, le gavea na flotta de navi e la gavea fònteghi (cioè boteghe-magazini dove vendar le merci) nei vari porti del Mediteraneo, e par tuti sti motivi le pode esar ritegnue anca lore republiche marinare. Fra ste chi, ghe xe Gaeta, Ancona, Trani, Ragusa e Noli.
Indice |
[modifica] Origini
La ripresa economica che se ga vu in Europa intorno a l'anno mille, conpagnà con l'insicurezza de le vie de comunicazion interne par via de tera, la ga fato sì che le rotte comerciali prinsipai le se svilupése longo le coste del Mar Mediteraneo. In sto contesto, l'indipendenza senpre pi granda assunta da alcune sità de mar la le ga portà a verghe un ruolo de primo piano nel senàrio europeo.
Ste sità qua, che le jera esposte a le incursion dei pirati, soratuto i Saraceni, le sà atrezà in maniera autonoma par la so difesa, costruendo dele grande flotte da guera, e le xe sta bone nei secoli X e XI de passar a l'ofensiva, sfrutando le rivalità tra la potenza maritina bizantina e quela islamica, con le quali le sà messo in lotta par el controllo del comercio con l'Asia e l'Africa e de le rotte mediteranee.
[modifica] Sviluppo
Par quel che riguarda le istituzioni, le sità le ga formà dei goerni autonomi republicani, espression de la classe mercantile che l'era la ciave de la so potenza. La storia de le Republiche marinare la se fa su sia col scuminsio de l'espansion europea verso Oriente, sia co le origini del moderno capitalismo, inteso come sistema mercantil e finanziario. I marcanti de le republiche marinare italiane i doparava schei conià in oro, in disuso da secoli, e i ga messo a punto nove operazion de canbio e de contabilità. I ga inoltre incorajà i progressi tecnologici ne la navigazion, che la jera el suporto fondamental par la crésita de la richeza mercantil.
Le Crociate le ga oferto l'ocasion par le so mire espansionistiche. Venezia, Amalfi, Ancona e Ragusa le jera zà inpegnà nei tràfici col Levante, ma con le Crociate el fenomeno l'è aumentà: mijari de italiani de le Republiche i è 'ndà in Oriente, metendo su basi, scali e stabilimenti comerciali. Sti sentri mercantili italiani i gavea anca na granda influenza politica a livel locale: difati i marcanti i metea su, do che i gavea i so afari, dele asociazion de caratere corporativo, che zercava de farse dar dai goerni stranieri dei privilegi giurisdizionai, fiscali e doganali, dentro de un preciso quadro politico: xe nato cussita varie signorie personali.
La storia de le varie Republiche marinare la xe molto varia, e se pol capirlo se se pensa a quanto le xe ndà vanti: Venexia, Genoa, Noli e Ragusa le ga vu na vita longa asè, che superando el periodo medieval, la riva fin a le soglie de l'età contenporanea, quando tuto el sistema dei stati italiani e europei l'è sta butà par aria da le guere de Napoleon. Altre republiche le ga vu anca quele na vita 'bastanza longa, restando lìbare fin al Rinasimento: le xe Pisa, che la xe passà soto el dominio de Firenze nel 1406, e Ancona, che la xe passà soto el Stato de la Cesa nel 1532. Amalfi e Gaeta inveze la ga perdesto la so indipendenza presto asè: la prima nel 1131 e la seconda nel 1140; entranbe conquistà dai Normanni.
[modifica] Amalfi
Amalfi, fòrsi la prima de le Republiche marinare che xe rivà a verghe n'inportanza de primo piano, la gavea svilupà scanbi intensi con Bisanzio e co l'Egito. I marcanti amalfitani i ga tolto ai Arabi el monopolio dei comerci mediteranei e i ga fondà nel X secolo basi mercantili ne l'Italia meridional e in Medio Oriente. Ad Amalfi i ga inventà anca la bussola, strumento fondamental par la navigazion e che el se dopara 'ncora desso.
Tra le testimonianze piasè inportanti de la grandeza de Amalfi, ghe xe le Taole Amalfitane, un codice che el rancurava le norme del dirito maritimo, restà valido par tuto el medioevo.
Amalfi nel 1137 la xe stà sachegià dai Pisani, in un momento in cui l'era indebolìa da catastrofi naturali (gravi inondazioni) e da l'annession al regno normanno. Dopo la conquista da parte dei Normanni, xe scuminsià na rapida decadenza e la xe stà sostituìa nel so ruolo de potenza mercantile da Napoli.
[modifica] Genoa
Genoa la jera risorta ai scuminsi del X secolo, quando - dopo la distruzion de la sità par mano dei Saraceni - i so abitanti i ga ripreso la via del mar. L'inportanza de la so flotta la gato fato guadagnar el riconosimento, da parte del sacro romano inperador, de le rivendicazion autonomiste in materia legislativo-consuetudinaria ed economica.
L'aleanza con Pisa la ga parmesso la liberazion del toco osidental del Mediteraneo dai pirati saraceni, con la riconquista de Corsica, Sardegna, Isole Baleari e Provenza.
Na nàsita del goerno genovese la xe avegnù con la costituzion de la "Compagna Communis", riunion de tuti i consorzi comerciali de la sità (ciamà apunto Compagne), a cui ga aderìo anca i nobili feudatari de le val limitrofe e de le riviere.
Le fortune del comune le xe aumentà un bel po' grazie a la partesipazion a la prima crociata: le comunità genovesi che s'avea piazà in tante località de la Tera Santa la ga aquisìo grandi privilegi. L'apice de la fortuna genovese el se ga vu nel XIII secolo con la stipula del Tratato de Ninfeo (1261) con l'inperador bizantin Michele VIII Paleologo, con cui ai Venexiani ghe vegnea inpedìo l'accesso ai stretti che porta al Mar Nero. Póco dopo vien sconfita na olta par tute Pisa ne la batalia de la Meloria, nel 1284.
Nel 1298, i Genovesi i ga inoltre batùo la flotta venexiana rente l'isola dàlmata de Curzola: durante el scontro vien ciapà prigioniero el venexian Marco Polo, che durante la so prigionia a palazzo San Giorgio a Genova el ghe detta a Rustichello da Pisa, so conpar de cella, el resoconto dei so viai. El dominio dei mari el xe restà ne le mane de Genoa par zirca setant'ani, fin al seconda e ultimo grande scontro con Venexia, la Guera de Ciosa nel 1372, finìa co la vitoria dei venexiani, che cussita i ga riconquistà definitivamente el dominio sui commerci par l'oriente.
Dopo la trista parentesi quatrozentesca, segnà da pestilenze e dominazion straniere, la sità la ga vissùo el so momento de massimo splendor a partir da la liberazion par man de Andrea Doria nel 1528 e par tuto el secolo seguente, finché la vecia aristocrazia la ga mantegnesto na sostanziale vitalità in ànbito sopratuto economico. La Republica, su la quale gavea butà l'ocio le pi grande potenze vizine come la Francia e el ducato de Savoia, la xe sta sotomessa da l'arivo de Napoleon nel 1805 e unìa nel 1815 al Regno de Sardegna, che el ghe n'a desfà definitivamente l'economia e el ga provocà l'emigrazion de le mejo maestranze e de gran parte de la popolazion rurale verso le Meriche.
[modifica] Pisa
Nel 1016 Pisa e Genoa, aleà tra de lore, la ga sconfito i Saraceni ciapando la Corsica e la Sardegna, oltre a tor el controlo del Mar Tireno. Un secolo dopo le ga delibarà le Baleari; sta spedizion la xe sta zelebrà nel "Gesta Triumphalia per pisanos" e in te un poema epico, el "Liber Maiorichinus", conposti nei ani 1113-1115.
Pisa, che a chel'epoca la se afaciava sul mar, a la foce de l'Arno, la xe rivà a l'apice del so splendor tra el XII e il XIII secolo, có le so navi le controlava el Mediteraneo osidental.
La rivalità tra Pisa e Genoa l'è aumentà nel XIII secolo fin a sfogar ne la batalia naval de la Meloria (1284), che la ga segnà el scuminsio del declino de la potenza pisana, che la ga dovesto rinunciar a la Corsica e darghe a Genoa un toco de la Sardegna (1299).
[modifica] Venexia
 |
Par savérghene piesè, varda ła vóxe Republica de Venezsia. |
La potenza de Venezia, dita anca la Serenissima, la xe nata dal svilupo dei raporti comerciali con l'Inpero Bizantin, de cui formalmente la fasea inizialmente parte, anca se in realtà la jera sostanzialmente indipendente. Venexia la xe restà anca in seguito aleà de Bisanzio ne la lotta contro Arabi e Normanni.
Intorno all'anno Mile la ga scuminsià la so espansion ne l'Adriatico, batendo i pirati che i ocupava le coste de l'Istria e de la Dalmazia e metendo la region e le so sità prinsipai soto el so dominio.
La xe rivà al massimo de la so potenza ai primi del Dosento, dominando i trafici comerciali nel Mediteraneo e con l'Oriente.
Durante la quarta crociata (1202-1204) la so flotta la xe sta determinante ne la conquista de le isole e de le località maritime comercialmente piasè inportanti de l'inpero bizantin. La conquista dei porti de Corfù (1207) e de Candia (1209) la ga garantìo un comercio che se stendea a Levante, e el rivava fin a la Siria e a l'Egito. A la fine del XIV secolo, Venexia la xera devegnùa uno dei stati piasè siori d'Europa.
El so dominio nel Mediteraneo oriental nei secoli sucessivi el xe sta menazà e conpromesso da l'espansion de l'Inpero Otoman in quele stesse aree, nonostante la granda vitoria naval ne la batalia de Lepanto del 1571 contro la flotta turca, conbatùa insieme a la Lega Santa.
[modifica] Le altre republiche
Ancona la xe deentà libaro comune a la fine de l'XI secolo, e la ga dovù scontrarse pi olte co i inperadori de Germania, che i volea sotométarla. Nel 1174 l'inperador Federico Barbarossa, aleà coi venexiani, el ga asedià la sità, che però la ga resistìo gajardamente. Xe tacà cussita un gran periodo de flòridi comerci co l'Oriente, durà fin al Zinquezento, durante el quale la sità la ga mantegnesto senpre la forma republicana, trane un periodo de ocupazion da parte dei Malatesta de Rimini dal 1348 al 1383. L'indipendenza anconitana la xe finìa nel 1532 con la conquista da parte de papa Clemente VII.
La Republica de Noli (che la se fasea ciamar Quinta Republica Marinara) la xe nata nel 1192, e fin da subito la xe stà aleà coi Genovesi, seguendo senpre le sorti de Genova fin al 1797.
A Gaeta inveze xe nato zà nel 917 un Dogado autonomo, nominalmente sotoposto al Sacro Romano Inpero e goernà da la fameja dei Gaetani o Caetani. El periodo de splendor de la sità el xe durà par do secoli, fin a la conquista normanna nel 1140.
Ragusa, fondà dai bizantini nel VII secolo, la xe stà soto i venexiani nel periodo dal 1205 al 1358, quando la sà goadagnà l'indipendensa profitando de na guera tra Venexia e l'Ongaria. Nei secoli XV e XVI la xe rivà al so apogeo, garegiando coi venexiani par el controlo dei trafici ne l'Adriatico, dopodiché xe scuminsià la decadenza, e Ragusa le xe restà indipendente ma come vassallo de l'Inpero Otoman, fin a l'ocupazion austriaca nel 1798.
[modifica] Raporti tra le Republiche marinare
Le relazion tra le Repubbliche marinare le tolea origine da la so natura de Stati orientà al comercio. Ste relazioni le riguardava de olta in volta acordi de natura economica e politica, par verghe reciprocamente goadagno da na rotta comerciale o par metarse dacordo par no ostacolarse una co l'altra.
Spesso, parò, la concorenza par el controlo de le rotte comerciali con l’Oriente e nel Mediteraneo la scadenava dele rivalità che no se podea risolvar sul piano diplomatico e diversi xe sta i scontri armati tra le Republiche marinare.
[modifica] Pisa e Venexia
Verso la fine del XI secolo xe tacà la prima crociata in Terasanta par iniziativa del pontefice Urbano II, sostegnesta da le predicazion de Pietro l'Eremita. Venexia la xe intervegnùa ne le vicende de la crociata quasi simultaneamente a Pisa e le do Republiche le xe entrà subito in concorenza tra de lore. Ne le aque de Rodi se ga quindi scontrà l’armata naval venexiana del vescovo Eugenio Contarini con quela pisana de l’arcivescovo Daiberto.
Pisa e Venexia le ga entranbe jutà l'esercito comandà da Gofredo de Buglione a vénzar l’asedio de Gerusaleme. La spedizion pisana, dopo sto fato, la xe restà in Terasanta: l’arcivescovo Daiberto el xe devegnesto el primo patriarca de Gerusaleme e el ga incoronà Goffredo primo re cristian de Gerusaleme. Al contrario de quanto ga fato Pisa, la partesipazion de Venexia a la prima crociata la xe finìa in pressia, probabilmente parché a lori ghe interesava pi che altro controbilanciar l’influenza pisana e genovese ne le terre del Levante.
Ma i raporti tra Pisa e Venexia no i xe senpre sta caraterizà da l’antagonismo. Difati le do republiche, nel corso dei secoli, le ga stipulà diversi acordi coi quali vegnea stabilìe le zone de influenza e de azion de Pisa e de Venexia, in modo tale da no intralciarse una co l'altra. El 13 otobre 1180 el doxe de Venexia e el rapresentante dei consoli pisani i ga firmà un acordo per la non ingerenza reciproca i tei afari adriatici e tirenici e nel 1206 Pisa e Venexia le ga concludesto un tratato in do che se ribadea le rispetive zone de influenza.
Nel 1494-1509, durante i avenimenti relativi a l’asedio de Pisa da parte de Firenze, la Serenissima, seguendo la so politica che volea asicurar la “libertà d’Italia” con l’eliminazion de ogni intervento straniero ne le tere italiane,[1] l'era corsa in socorso dei Pisani che i zercava de salvare la so republica da l’agression de Firenze, che no l'era sta osteggià da Carlo VIII, sovrano de Francia, presente in Italia col so esercito.
[modifica] Venexia e Genoa
I raporti tra Genova e Venezia i xe sta squasi senpre de forte ostilità e concorenza, sia economica sia militare. Ai primi del XIII secolo le ostilità le se limitava a singoli atti de pirateria e a conbatimenti isolà. Verso el 1218 le Republiche de Venexia e de Genoa le se metea dacordo par far finir le atività de pirateria con la garanzia de tutelarse una con l'altra, mentre ai Genovesi ghe vegnea garantìa la libartà de trafico ne le tere de l’inpero oriental, un marcà novo dove se ciapava ben.
[modifica] La guera de San Saba
La crisi tra le do Republiche la xe s-ciopà co na violenza inpresionante con le vicende avegnùe a San Zuàni d’Acri par el possesso del monastero de San Saba che i Genovesi i ga ocupaà nel 1255, inviando subito dopo le ostilità col sachegio del quartier venexian e la distruzion de navi fèrme nel porto. La Serenissima prima la se ga messo dacordo con Pisa stipulando n’aleanza a difesa dei comuni intaressi ne la region, dopo la xe passà al contrataco butando zo el monastero fortificà de San Saba. I Genovesi e el regente del Principato cristiano de Siria, el baron Filipo de Montfort, i xe dovui scapar via da de lì.
N'ano pi tardi le tri potenze maritime le sa scontrà de novo ne le aque davanti San Zuàni d’Acri. Squasi tute le galee genovesi le xe sta afondà, e milesetezento fra conbatenti e marinai i ga perso la vita. I Genovesi i ga risposto fasendo nove aleanze ne la region. Sul trono de Nicea regnava Michele VIII Paleologo, che el volea riconquistarse co le arme le tere che le jera apartegnùe a l’Inpero Bizantin. Donca el so disegno espansionistico e quelo genovese i se catava a maraveja. La flotta e l’esercito niceni i ga 'sedia e conquistà Costantinopoli, fasendo cascar l’Inpero Latin d’Oriente che l'era nato gnanca sesant'ani prima par opera dei venexiani e dei crociati. La Republica de Genova la ga quindi sostituìo quela de Venexia nel monopolio dei comerci coi teritori del Mar Nero.
Sto periodo de guere tra Genova e Venexia el sa sarà con la Batalia de Curzola nel 1298 (venta da Genoa), durante la quale xe sta ciapà prigioniero, oltre al doxe venexiano Andrea Dandolo, anca Marco Polo. I prigionieri i xe sta incadenai ai remi come se fase a quei tenpi, ma el doxe par no vegner umilià rivando a Genoa messo cussita, el ga preferìo coparse batendo la testa pi olte sul remo. Un ano dopo le do Republiche le ga firmà la pase a Milan.
[modifica] La guera de Ciosa
Verso la fine del XIV secolo, la granda isola de Cipro, goernà da la signoria de Pietro II de Lusignano, la jera sta ciapà dai Genovesi, e Andronico Paleologo el gavea dato a Genova l'isoleta de Tenedo, inportante scalo longo la rotta del Bosforo e del Mar Nero, non rispetando la precedente concesion fata da so pare a favor de Venexia. Ste do robe le ga fato sì che tachese de novo le ostilità tra le do Republiche marinare.
El conflito el xe sta dito guera de Ciosa, parché i Venexiani, dopo na prima vitoria, i xe sta batui a Pola dai Genovesi, che i ga ocupà Ciosa e messo l'asedio a Venexia. I Venexiani, però, i xe sta boni de metar in pié na nova flotta e de asediar a so volta i Genovesi a Ciosa, finché sti qua no ghe tocà aréndarsi (1380). La guera la sa concluso quindi a favor de Venexia con la pase de Torin de l’8 aprile 1381.
[modifica] Genoa e Pisa
Ste do Republiche marinare le ga vu molti scanbi, par via de la so posizion nel Tireno. A l'inizio, i 'ndasea dacordo e i xera aleà insieme par afrontar l'espansion araba, senpre pi minazosa. In seguito, però, sà scadenà le rivalità par dominar ne la parte osidental del Mediteraneo.
[modifica] Amalfi e Pisa
Amalfi, zà da la metà dell'XI secolo, la gavea perso la conpleta autonomia, anca se la continuava i propri scanbi comerciali godendo de na anpia (almanco in sto periodo) autonomia 'ministrativa. Soto de la protezion del normanno Guglielmo, terzo Duca de Puglia, i aministratori de Amalfi i ga ragiunto un bon acordo comerciale, ne l’otobre 1126, con la vizina Pisa, con el scopo de laorar insieme ne la tutela dei comuni interessi nel Tireno. Sto acordo l'era fruto de n'amicizia, con la Republica toscana, che la durava ormai da decenni. Amalfi, però, non la gavea un esercito suo che el defendesse i intaressi dei comercianti amalfitani. Par sto motivo le navi de Amalfi no le xe inpegnà tanto spesso in azioni militari contro altre Republiche marinare. A un zerto punto Pisa la ga roto l’accordo con Amalfi e la ga atacà la sità de la costiera el 4 agosto 1135, nel contesto de la guera che vedea inpegnà el papa Innocenzo II e el novo inperador Lotario II (e con lori le Republiche de Genoa e de Pisa) contro el normanno Ruggero II d’Altavilla che el controlava el teritorio de Amalfi. Sta guera la xe finìa favorevolmente par Ruggero II, che el sa visto riconossiùi i so diriti sui teritori de l’Italia meridional. Amalfi la ga perdesto anca la so autonomia politica.
[modifica] Venexia, Ancona e Ragusa
La competizion comerciale tra Venexia, Ancona e Ragusa la jera ciossa, parché le se affaccia tute tri sul mar Adriatico. In pi de na ocasion le xe rivà a uno scontro aperto. A Venexia, che la savea de èsar pi forte economicamente e militarmente, no ghe piasea verghe la concorenza de altre sità marinare proprio ne l'Adriatico. Tanti porti adriatici i xera soto el dominio de la Serenissima, ma Ancona e Ragusa le mantegnea la so indipendenza. Ste due republiche, par no darghela vinta a la republica veneta, le ga streto ripetute e durevoli aleanze.
[modifica] Note
- ↑ G. Benvenuti - Le Repubbliche Marinare. Amalfi, Pisa, Genova, Venezia - Newton & Compton editori s.r.l., Roma 1989, pag. 255
