Kikuyu
Da Wikipedia, ła ençiclopedia libara.
I kikuyu i xe el grupo etnico pi grande del Kenya. Co 6 milioni de poplazsion, i xe el 22% de i kenyani. I abitava i altopiani centrali ntorno al Monte Kenya. Ancò i se cata en tuto el paexe, e tanti i vive fora dal Kenya.
[modifica] Storia
I kikuyu i xe on grupo bantu. I xe rivà en Kenya da l’ovest, anca se el xe dificile dir da doe en particolare. Co i xe rivà rente al Monte Kilimanjaro, on grupo el xe andà a sud, e n’altro a nord. I primi kikuyu i xera caciatori e racoglitori, i vivea de quelo ch ei riusiva a cater su. Na olta rivà su i altipiani rente al monte Kenya, i xe diventà agricoltori.
La mitologia kikuyu la conta che Dio – Ngai – el gha creà Kikuyu e so mojer Mumbi e el la mesi sul monte Kirinyaga. La prima fameja la gha vù nove fiole: Wanjiku, Wanjiru, Njeri, Wamboi, Wangari, Wacera, Watheira, Wairimu e Wangoi. Co le xe diventà done, le gha sposà de i omeni che vegnea da lontan. N’altro mito dixe che i omeni i xe stà creà da Ngai e che i xe vegnù fora da on Mugumo (figo). Ancora deso, tute le done kikuyu le gha ono de i nomi de le prime nove fiole de kikuyu e Mumbi.
I kikuyu i sa stabilio ntorno al monte Kenya e i gha inglobà grupi pi pecenini. La tribù la xe reusida a cresar e a organizsar na produzsion agricola pi grande de el bisogno interno. L’ecedenzsa la xe stà usà par el marcà co le tribù contigue: maasai, kamba, meru e embu. I kikuyu i gha scominzsià a espandarse. El colonialismo el gha fermà sta spansion e ridoto i kikuyu a vivar en te le riserve, dando la tera pi bona a i colonialisti inglexi.
En tel 1920, i kikuyu i gha scominzsià a organizarse par resistar i colonialisti. El primo grupo che i gha fondà el xe stà la Asociazsione Sentrale de i Kikuyu (Kikuyu Central Association), tra i fondatori se cata anca Jomo Kenyatta, che el diventarà el primo presidente del paexe. El movimento volea on cambiamento politego, senzsa rivar a la violenzsa. Da el 1952 al 1958 el Kenya el gha visù l’emergenzsa. El grupo Mau-Mau el gha scominzsià a usar la violenzsa e el terorismo par rivar a l’indipendenzsa. Bisogna anca dir che i inglexi i gha amplificà l’importanzsa de i Mau Mau par poder reprimere la zente. Migliara de kikuyu inocenti i xe morti ne i cami de concentramento. I Mau Mau i gha copà pochisima zente.
Dopo l’indipendenzsa, i kikuyu i xe stà boni de tor el control de el paexe. Questo el xe stà posibile parché i xera la majoranzsa, i xera pronti a lasar da parte le tradizsioni e asetar le idee ocidentali, i gavea vù el privilegio de le scole de i misionari (i misionari no gavea costruio tante scole tra i altri grupi bantu e i no podea laorar tra i grupi pastoralisti par divieto governativo). El primo presidente del Kenya el xera on kikuyu, e anca el terzo – Mwai Emilio Kibaki – el xe on kikuyu. I kikuyu i domina anca el setor comerciale. Tanti kikuyu i xe marcanti, anca se tuti i rimane de i bacani en tel cor.
- Portałe Africa: varda łe altre voxe de Wikipedia che łe parla de Africa