Claude Monet
From Wikipedia
|
Ch't' articl'ye fut c'menchie en Jèrriais
 |
Claude Monet (1840-1926) 'tait un peintre, iun des preunmié Împressionnistes.
I' fut né à Paris l'14 dé Novembre 1840 et fut êl'vé au Hâvre d'pis l'âge dé chînq ans. Dans chutte ville coumme êcolyi i' rencontrit Eugène Boudin tchi l'întroduîsit à la peintuthe des paysages en d'houors. Monet acatit des flieurs împrînmés du Japon tchi l'înfluencîtent étout. En 1859 i' s'en fut à Paris pouor êtudier et rencontrit Camille Pissaro. I' soudardait en Algérie coumme enrouôlé 1860-1862 et r'vînt à Paris où'est qu'i' rencontrit Alfred Sisley et Pierre Renoir, en 1864 i' rencontrit Gustave Courbet et en 1865 Édouard Manet.
En 1870 il allit s'abrier à Londres d'la dgèrre Franco-Preussienne et fit bein des portraits d's êffets d'la bliâse dé Londres - sustout d'la Riviéthe dé Londres et du Bâtisse du Parlément - et êtudyit l'travas d'J. M. W. Turner.
En 1872, i' r'tait en Nouormandie et fit des portraits d'la cauchie du Hâvre. Ch'fut iun d'ches portraits tch'avait nom "Împression" tchi fut crititchi à eune exhibition en 1874 et donnit ainchîn l'mênom Împressionnistes à la dgaîngue d'artistes dans tchi Monet travaillait.
Sa preunmié femme mouothit d'la conseunmtion en 1879. I' s'èrmathyit en 1892.
D'vièrs 1890 i' c'menchit la peindrie d'séthies d'portraits - des vieillottes dé fain et des peupièrs - s'lon les heuthes d'la journée et l'temps. 1892-1895 i' fit des séthies d'la Cathédrale dé Rouën et acouo d'la Riviéthe dé Londres 1899-1905 et V'nise en 1908.
Mais ch'est les séthies d'lis dg'ieau dans la mathe qu'i' fit dans san gardîn à Givèrny en Eure où'qu'il avait d'meuthé d'pis 1883 tchi sont les pus populaithes dé ses portraits. Nou dit qu'la manniéthe dé peindre quâsiment sŷmbolique qu'i' faîthait sèrvi dans ches portraits înfluenc'sait l'Expressionnisme Abstrait pus tard.
I' mouothit l'5 d'Dézembre 1926.
