Kristopher Schau

Frå Wikipedia – det frie oppslagsverket

Kristopher Hugh Martin Schau (fødd 12. august 1970 i Oslo) er ein norsk musikar og humorist. Han er son åt skodespelaren Finn Schau og bror åt programleiaren Aleksander Schau.

[endre] Biografi

Kristopher Schau har ved ei rad høve vekt åtgaum for sine uredde røyne på menneskjekroppen. Her frå prosjektet Forfall.

Kristopher Schau har vore med på mange meir eller mindre musikalske tiltak gjenom Duplex records sidan slutten på 1980-talet (sjå bandi nedan). Han har dertil med vore programleiar og medverka i ei rad radioprogram, so som Kvegpels på Radio Nova (1993-), Karate (1995-2003), Hybel (1996-1998), XL (1996-1999), Herreavdelingen (1997), Holger Nielsens metode (1999-2000) og Et Norge i krig (2004) på NRK Petre og Jeg hater svensker på Kanal 24 (2004).

På fjernsyn har me sett Kristopher Schau i programmi XLTV (1998-1999), Oppgang B (1998), TVTV (1999) Topaz (2002), Team Antonsen (2004) og De syv dødssyndene, alle på NRK. Annameir har han spela i reklamefilm for avisa VG.

Kristopher Schau har gjeve røyst til figuren Kronk i filmen Mitt kongerike for en lama (2000) og Marius i Slipp Jimmy fri (2006).

Som biletkunstnar hadde Kristopher Schau kortvarig suksess under namnet Hugh Martin i 1994.

Kristopher Schau har vekt åtgaum ved nokre høve for sine uredde røyne og usedvanlege forskingsprosjekt, der han har testa ut menneskjekroppen. Han budde til dømes éi veke i ein Opel Rekord stasjonsvogn, 1981-modell, i prosjektet En mann, en bil, en uke (1998) på programmet XL, og på Karate sat han ei veke i eit butikkvindauga på Karl Johans gata, der han skulle freista forfalla mest mogeleg, både fysisk og åndeleg, i prosjektet Forfall (2001). I programserien De stv dødssyndene lét han seg mellom anna omskjera

Som forfattar har Kristopher Schau gjeve ut kokeboki Tendenser (2001), og saman med Morten Ståle Nilsen og Øystein Karlsen gav han i 2006 ut Et Norge i krig - ei samling av innslag frå radioprogrammet med same namnet, i bokform. Han skreiv teksti til teikneserien Margarin, som Øystein Runde teikna, og som kom ut som teikneseriealbum i 2006. Han har elles meldt teikneseriar i bladet Mute, radioprogrammet Ordfront og fjernsynsprogrammet Stereo (alle i 2002).

Kristopher Schau har stått for dådi å vinna VM i Rock i Bilbao (2002) med bandet The Cumshots, og hev dessutan yverprøvt Spellemannskommitéen sine avgjerder, då han gav Spellemannsprisen til Black Debbath (2000).

Til stortingsvalet i 2001 var Kristopher Schau kandidat for Det Politiske Parti i Aust-Agder og Sogn og Fjordane.

Sume av Kristopher Schau sine gjerningar er dokumentera på DVD-en Kristopher Schau - Ti år med juling - på tide å få betalt! frå 2004.