Ansgar (Bremen)
Vun Wikipedia
Ansgar vun Bremen (* 8. oder 9. September 801 bi Amiens; † 3. Februar 865 in Bremen; ok Anskar oder Anschar) weer en Mönk in den Oorden vun de Benediktiners un Arzbischop för Skandinavien. Veel vun dat, wat een vundage över Ansgar weten deit, steiht in de Vita sancti Ansgari. Dat is en Book över Ansgar sien Leven. Sien Nafolger Rimbert hett dat schreven.
Inholtsverteken |
[ännern] Leven
[ännern] Vun Frankriek na Westfalen
Ansgar is bi de Benediktiners in Corbie in Frankriek na School gahn. 823 is he as Schoolmester un as Prediger na Corbie siene düütsche Dochter henschickt wurrn. Dat weer Corvey in Westfalen. Vördem, as en twintigjöhrigen Lehrer in Corbie, harr he en Vision harrt. Dor harr he en Stimm höört, de sä to em: „Gah man hen! Mit de Kroon vun dat Martyrium schaßt du to mi torüchkamen“. Dat warrt seggt, he harr düsse Vision jummers vör Ogen harrt.
[ännern] Eerste Misschoon in Däänmark
826 föhr Ansgar en Grupp vun Missionaren an, de an den Hoff vun den König vun Däänmark kemen. De Dänen ehr König Harald Klak harr sik üm düsse Tiet rüm mit 400 Mackers in Ingelheim döpen laten. He harr sik utrekent, dat dat Riek sik nu woll achter em stellen dö, wenn he König vun Däänmark weer. Nu konn Ansgar sik upmaken un de Mischoon in'n Noorden bedrieven. He güng mit Harald up sien Feldtog, man de güng nich goot. Harald keem nich togange un ut de eerste Misschoon in Däänmark is nix wurrn.
[ännern] Eerste Misschoon in Sweden
829 is Ansgar vun den sweedschen König Björn inlaadt wurrn. In Birka is denn de eerste christliche Kark vun Skandinavien boot wurrn. Birka weer en bedüdenden Platz för den Hannel in de Wikingertiet un lä 27 km westlich vun dat hüdige Stockholm.
[ännern] Arzbischop vun Hamborg
831 hett de düütsche Kaiser Ludwig de Frame em torüchropen. He scholl sien wiedere Misschoon vun den Noorden vun de Hammaborg ut bedrieven, wat de Wuddel vun de latere Stadt Hamborg weer. Dor is he denn vun to’n Bischop maakt wurrn.
För Ansgar weer dat klaar, dat he mit sien Arbeit in Skandinavien wietermaken woll. 832 reis he na Rom. Dor möök de Paapst Gregor IV. em to’n Arzbischop un to’n Päpstlichen Legaten (d.h.: Afordenten) för Skandinavien, Däänmark un de Slaven. Bi düsse Gelegenheit is Hamborg denn to’n Arzbisdom rupböört wurrn. Dor is denn ok bi klaarmaakt wurrn, dat de Nafolgers vun Ansgar vun de kaiserlich Kapell inwieht weern schollen. Dat bedüüd, dat Hamborg nich vun en annern Metropoliten afhüng, man up de annere Siet konn nu dat Riek in Hamborg sien Angelegenheiten rinsnacken.
As Ansgar nu wedder in Hamborg weer, grünn he mit den Kaiser sien Hülp en School un en Klooster. Bavenhen leet he de holten Marienkark upboen.
[ännern] Arzbischop in Bremen
Midderwielen weer Horik I. König vun dat vereente Däänmark. Ünner sien Schutz füng Ansgar wedder mit sien Wark in dat Hartogdom Sleswig an. Man bloß en paar Johr later sturv Kaiser Ludwig, de sik jummers achter em stellt harr. De Wikingers plünnern Hamborg, wat midderwielen to en lüttje Stadt anwussen weer, in dat Johr 845. De Statschonen vun de Misschoon in Sweden sünd in’n Dutt haut wurrn, Sweden un Däänmark sünd eerst mol wedder an dat Heidendom fullen. As de Bremer Bischop Leuderich ok 845 storven weer, hett Ansgar sik dor för insett, dat he Bischop vun Bremen weern scholl. 848 weer dat sowiet. In datsülvige Johr harr de Synood to Mainz beslaten, dat Bisdom Bremen ünner dat Arzbisdom Hamborg ünnertoornen, so dat en Dubbelbisdom Bremen-Hamborg rutkeem. Dorgegen harr man Hilduin, de Arzbischop to Köln, wat. Ok sien Nafolger Gunthar weer dor stracks gegen. Se wullen dat Bisdom nich an Hamborg afgeven. So keem dat, dat eerst vun 870 an, as Paapst Nikolaus I. en Machtwoort spraken hett, de beiden Bisdömer Bremen un Hamborg tohoophören. Ansgar verstunn de Saak avers so, datt he nu Arzbischop vun Bremen weer. Dat Arzbisdom heet to de Tiet Arzbisdom vun Hamborg un Bremen. Ansgar grünn in de junge Stadt Bremen dat eerste Armenspital ööstlich vun den Rhien un maak sik dor för stark, dat Bremen sien eersten Bischop Willehad to'n Hilligen verklaart wurrn is. He süms schreev twuschen 860 un 865 en Schrift över de Wunner an dat Graff vun Willehad.
[ännern] Nochmol in Skandinavien
851 glück noch mol en Misschoon in Sweden un ok de däänsche König Horik II. nehm den Christengott an. 853 reis Ansgar noch mol persönlich na Sweden. Dor hett he den Bo vun Karken tostannbröcht, just so, as in Sleswig. Storven is Ansgar in Bremen.
