Felix vu Bourbon-Parma
Vu Wikipedia, der fräier Enzyklopedie.
De Felix Marie Vincent Prënz vu Bourbon-Parma, (28. Oktober 1883 zu Schwarzau an Éisträich - 8. Abrëll 1970 zu Fëschbech) war dat sechste Kand vum Robert I. vu Parma an deem senger zweeter Fra, der Maria Antónia vu Bragança. Hie war och de klenge Brudder vun der Keeserin Zita vun Éisträich.
De 6. November 1919 huet hie seng Kusinn, d'Groussherzogin Charlotte vu Lëtzebuerg bestuet. Den Dag virdrun hat d'Chamber, mat knapser Majoritéit, seng Naturaliséierung gestëmmt. Doduerch gouf hie Prënz vu Lëtzebuerg. D'groussherzoglech Koppel krut sechs Kanner.
Am Éischte Weltkrich war hie Leutnant a Capitaine an der éisträichescher Arméi. Hie war och Colonel vun der Lëtzebuerger Fräiwëllegenarméi an Inspecteur-Général vun der Lëtzebuerger Arméi vun 1945 bis 1967.
Tëschent 1923 an 1932 an dann nees tëschent 1947 an 1969 war hie President vum Lëtzebuerger Roude Kräiz.
