Donau

Vu Wikipedia, der fräier Enzyklopedie.

Donau
Statut	{{{14}}}
Längt	2 857 km
Héicht vun der Quell	678 m
Duerchschnëttsdebit	7 000 m³/s
Fläch vum Baseng	817 000 km²
Leeft duerch	10 europäesch Länner a véier Haaptstied: Wien, Bratislava, Budapest, Belgrad
Mündung	Schwaarzt Mier
Breet vun der Mündung	Donaudelta
Floss - Hydrologie

D'Donau ass no der Wolga den zweetlängste Stroum an Europa. No Däitschland an Éisträich fléisst si nach duerch aacht weider europäesch Staaten a leeft am Donaudelta an d'Schwaarzt Mier.

Inhaltsverzeechnis 1 Etymologie 2 D'Donau aus geowëssenschaftlecher Siicht 2.1 Hydrografie 2.2 Geologie 2.3 Geografie 3 Geschicht 3.1 Kulturgeschicht 4 Laf vun der Donau 4.1 Däitschland 4.2 Éisträich 4.3 Slowakei 4.4 Ungarn 4.5 Kroatien 4.6 Serbien 4.7 Rumänien 4.8 Bulgarien 4.9 Moldawien 4.10 Ukraine 5 Liewensraum Donau 6 Wirtschaftsraum Donau 7 Literatur zum Thema 8 Linken 8.1 Kuckt och 8.2 Um Spaweck

[Änneren] Etymologie

Op Rumänesch heescht d'Donau Dunărea, op Bulgaresch, Serbesch a Kroatesch heescht si Dunav, op Ungaresch Duna, op Slowakesch Dunaj, op Englesch a Franséisch Danube an op Türkesch Tuna. All dës Nimm stame vum Laténgeschen Danubius of, dem Numm vun engem réimesche Flossgott. D'Endung au kënnt aus dem germaneschen ouwe (Aue, Floss), den däitschen Numm gëllt zanter 1763. A méi fréien Texter gëtt d'Donau och „Tonach“ genannt, spéider och „Donaw“.

Donieft gouf et virun allem fir d'ënnescht Donau d'laténgesch Bezeechnung Hister, Ister vum griicheschen Ἴστρος (Ístros), dësen Numm gëtt beim Hesiod als Jong vum Okeanos an der Thetys bezeechent (Theogonie 339).

[Änneren] D'Donau aus geowëssenschaftlecher Siicht

[Änneren] Hydrografie

D'Donau ass deen eenzege groussen europäesche Floss, dee vu Westen no Oste fléisst, an erreecht no ca. 2857 km a Rumänien an der Ukraine den Donaudelta a leeft do an d'Schwaarzt Mier. Am Géigesaz zu anere Flëss ginn d'Kilometere vun der Mündung bis zu der Quell eropgezielt, offiziellen Nullpunkt ass de Liichttuerm vu Sulina um Schwaarze Mier. D'Donau huet en Anzuchsberäich vun ca. 817.000 km².

D'Nieweflëss, déi am Verhältnis am stäerksten zu der Waasserquantitéit vun der Donau bäidroe, sinn:

• d'Iller, mat 89,6 Prozent
• de Lech, mat 75 Prozent
• d'Isar mat 35 Prozent
• den Inn
• d'Drau mat 40 Prozent
• d'Theiss mat 30 Prozent
• d'Save, mat 35 Prozent

[Änneren] Geologie

Och wann den ieweschte Laf vun der Donau haut verhältnisméisseg méi kleng ass, ass d'Donau geologesch méi al wéi de Rhäin, mat deem hiert Anzugsgebitt am haitege Süddäitschland konkurréiert. Dëst féiert zu e puer besonneschen Aspekter.

De Rhäin ass deen eenzege Floss vun den Alpen, deen nërdlech a Richtung Nordséi fléisst. Dobäi hëllt hien déi Gewässer vun der europäescher Waasserscheed déi nërdlech ooffléissen op. Dëst deelt wéi eng onsichtbar Linn Deeler vu Süddäitschland.

Nach virun der leschter Äiszäit huet de Rhäin eréischt un der südwestlecher Spëtzt vum Schwarzwald ugefaangen. D'Waasser vun den Alpen, wat haut an de Rhäin fléisst, gouf deemools vun der Urdonau no Oste gedro, déi bis zu der Saale-Äiszäit weider nërdlech am Dall vun der haiteger Altmühl an dem Wellheimer Dréchendall laanscht d'Linn Wellheim–Dollnstein–Eichstätt–Beilngries–Riedenburg gefloss ass. D'Schluchten (haut ouni Waasser) an der haiteger Landschaft vun der Schwäbescher Alb sinn Deeler vum Bett vun dësem fréiere Floss, deen e gudd Stéck méi grouss war wéi déi haiteg Donau. Nodeems d'Uewerrhäinesch Sank oofgefriess war, huet e groussen Deel vum Alpewaasser seng Richtung geännert, a fiddert haut de Rhäin.

Et fléisse bis haut Deeler vum Donauwaasser duerch de poréise Kalleksteen vun der Schwäbescher Alb an de Rhäin, dee méi déif läit. Well dëse grousse Montant un ënnerierdeschem Waasser sech zugläich méi a méi an de Kalleksteen frësst, gëtt ugeholl, dass d'iewescht Donau enges Dags komplett zu Gonschte vum Rhäin verschwanne wäert.

Bei Immendingen kënnt et am Flosslaf zu der Donauversickerung. Hei versickert e groussen Deel vum Donauwaasser am Buedem a kënnt iwwer Hielen am Karststeen an den Aachtopf, deen iwwer 14 Kilometer wäit ewech läit, vu wou d'Waasser an de Bodenséi a spéider an de Rhäin kënnt. Bei wéineg Waasser kann et zäitweis och zu enger kompletter Versickerung kommen; d'Donau gëtt dann nëmmen nach vun de Flëss Krähenbach an Elta gefiddert. Wëll dat an de leschte Joerzéngten immens zougeholl huet, gëtt een Deel vum Donauwaasser duerch e Stollen laanscht Versickerungsplaz geleet.

Bis kuerz hanner Wien huet de Stroum éischter de Charakter vun engem Biergfloss, eréischt duerno wandelt en sech lues a lues zu engem Déiflandfloss. Fakteure wéi d'Schmëlze vum Schnéi a staark Néierschléi am Alperaum begënschtegen d'Uschwelle vum Floss an och Héichwaasser. Well de Floss ëmmer méi reguléiert gëtt, an Auen zerstéiert ginn, huet dat am 20. Joerhonnert weider zougeholl. D'Héchststänn vum leschte Joerhonnert waren d'Héichwaasser vun 1954, 1988 an 2002.

[Änneren] Geografie

Zéng Länner hunn Zougang zu der Donau. Op enger Längt vun 1070,9 km (37% vun der Totallängt) ass de Floss Staatsgrenz, woubäi 4 Länner (Kroatien, Bulgarien, Moldawien, Ukraine) nëmmen Zougang zu enger Flosssäit hunn.

Lag vun de Staate vun der Quelle bis zur Mündung

rietst Ufer		Donau- kilometer	lénkst Ufer
Land	Undeel u km		Undeel u km	Land
Däitschland	658,6	2888,77	687,0	Däitschland
		2230,20
Éisträich	357,5
		2201,77
			321,5	Éisträich
		1880,26
			172,1	Slowakei
		1872,70
Slowakei	22,5
		1850,20
Ungarn	417,2
		1708,20
			275,2	Ungarn
		1433,00
Kroatien	137,5		358,0	Serbien
		1295,50
Serbien	449,9
		1075,00
			940,9	Rumänien
		845,65
Bulgarien	471,6
		374,10
Rumänien	374,1
		134,14
			0,6	Moldawien
		133,57
			53,9	Ukraine
		79,63
			79,6	Rumänien
		0,00

Undeel vun de Staaten

	no Stroum kilometer	rietst Ufer		béidsäiteg		lénkst Ufer
Land		km	%	km	%	km	%
Däitschland	687,00	658,6	23	658,6	36	687,0	24
Éisträich	357,50	357,5	12	321,5	18	321,5	11
Slowakei	172,06	22,5	1	22,5	1	172,1	6
Ungarn	417,20	417,2	14	275,2	15	275,2	10
Kroatien	137,50	137,5	5	0,0	0	0,0	0
Serbien	587,35	449,9	16	220,5	12	358,0	12
Rumänien	1075,00	374,1	13	319,6	18	1020,5	35
Bulgarien	471,55	471,6	16	0,0	0	0,0	0
Moldawien	0,57	0,0	0	0,0	0	0,6	0
Ukraine	53,94	0,0	0	0,0	0	53,9	2

(Quell: Donaukommissioun, Budapest, Januar 2000-März 2004)

[Änneren] Geschicht

Am siwente Joerhonnert viru Christus sinn d'Griichen, déi vum Schwaarze Mier iwwert Tomis, haut Constanţa, komm sinn, de Floss eropgeseegelt. Hir Erkundungsrees huet un der Eisener Dier, enger fielseger Kataraktestreck voller Ondéiften, opgehalen, well de geféierleche Verlaf de griichesche Schëffer eng Weiderrees iwwert d'Linn Südkarpaten a Serbesch Erzbierger, un der heiteger Grenz vu Rumänien a Serbien, onméiglech gemaach huet.

Ënnert de Réimer huet d'Donau bal vun der Quell bis zur Mündung d'Grenz zu den heednesche Vëlker am Norde markéiert, a war och d'Route fir den Truppentransport, souwéi fir d'Versuergung vun de Siedlungen. Zanter 37 a bis zu der Regierungszäit vum Keeser Valentinian I. (364-375) war den Donaulimes mat geleegentlechen Ënnerbriechungen, wéi zum Beispill am Joer 259, d'nordëstlech Grenz vum Räich. D'Iwwerschreide vun der Donau an Dakien ass dem Imperium Romanum eréischt no zwou Schluechten 102 an 106 an nom Bau vun enger Bréck am Joer 101 bei der Garnisounsstad Drobeta gelongen. Dës Victoire iwwert d'Daker ënnert Decebalus huet aus Dakien d'provënz Dacia gemaach, déi awer 271 nees verluere gouf.

Am 9. Joerhonnert war d'Donau e Wanderwee fir d'asiatescht Hiertevollek vun de Magyaren, déi donauopwäerts iwwert d'Tëschestatioun vum Chasareräich bis an dat heitegt Ungarn komm sinn, an do zesumme mat der slawescher Bevëlkerung an den 150 bis 200 Joer dono ënnert dem Stephan I. déi heiteg ungaresch Natioun gegrënnt hunn.

Och d'Route Charlemagne, déi schonns tëscht 1096 an 1099 beim Éischte Kräizzuch vun der Arméi vum Godefroy vu Bouillon benotzt gi war, huet sech vu Regensburg bis Belgrad laanscht d'Donau gezunn. Ronn 340 Joer méi spéit war d'Route fir d'tierkesch Arméi d'zentral Strooss fir den Transport vun den Truppen. De Floss huet hinnen erméiglecht, séier virun ze kommen, scho 1440 hu si 2000 Kilometer hannert der Mündung déi éischt Schluechten ëm Belgrad geschloen. Eruewere konnte si d'Stad awer eréischt 1521. Schonn e puer Joer méi spéit, 1526, huet d'osmanesch Arméi an der éischter Schluecht vu Mohács d'ungarescht Kinnekräich zerstéiert. Well de Kinnek Lajos II. an der Schluecht gefall war, goung Ungarn un Éisträich. Dëse Moment gëllt als Keim vun der Donaumonarchie.

D'Donau war an dëser ganzer Zäit net nëmme militäresch a kommerziell Haaptschlagoder, mee och eng politesch, kulturell a reliéis Grenz tëscht Okkzident an Orient.

Nom Zweete Weltkrich gouf 1946 eng nei Regeleung fir de Flossverkéier an Ugrëff geholl, den d'Paräisser Ofkommes vun 1921 ofléise sollt. Zu der Belgrader Konferenz, déi 1948 ofgehale gouf, waren all Donaustaten ausser Däitschland an Éisträich zougelooss. Mat der Ënnerzeechnung vum fäerdegen Ofkommes gouf och en Unhang ënnerschriwwen, deen Éisträich an d'Donaukommissioun opgeholl huet. Däitschland konnt dem Ofkommes an der Donaukommissioun eréischt am Mäerz 1998 bäitrieden.

[Änneren] Kulturgeschicht

Den zweetgréissten europäesche Floss huet an de Kulture vu senge Länner vill Spueren hannerlooss. Niewt sëlleche Soen a Legenden hunn sech och Schrëftsteller mat him ausenanergesat, vum Ovid, deen an der Tristia 3,10 de staarken Androck beséngt, deen d'zougefrueren Donau bei him hannerlooss huet, bis zu Claudio Magris a Péter Esterházy, déi sech um Enn vum 20. Joerhonnert mam Thema beschäftegt hunn. De berühmteste kulturellen Echo huet d'Donau an der Musek fonnt, mam (ursprünglech mat engem aneren Text komponéierten an uropgefouerten) Donauwalzer aus der Fieder vum Johann Strauss.

[Änneren] Laf vun der Donau

D'Donau entsteet 1,4 km ëstlich vun Donaueschingen duerch den Zesummefloss vun den zwee Quellflëss Brigach a Breg, an dohier kënnt och d'Spréchwuert "Brigach und Breg bringen die Donau zu Weg".
Kuckt heizou och den Artikel Donauquell.

[Änneren] Däitschland

An Däitschland fléisst d'Donau vun hirer Quell bis zu der däitsch-éisträichescher Grenz iwwer 687 Kilometer an ass domadder den drëttlängste Floss vun Däitschland. Un hirem Ufer leien als gréisste Stied Tuttlingen, Sigmaringen, Ulm, Neu-Ulm, Ingolstadt, Regensburg, Straubing a Passau.

Vu riets lafen d'Iller, de Lech bei Marxheim (ëstlich vun Donauwörth) an d'Isar bei Deggendorf dran, souwéi zu Passau den Inn; op der lénker Säit d'Wörnitz zu Donauwörth, hanner Kelheim d'Altmühl, bei Regensburg Naab a Regen. Och eng grouss Partie kleng Flëss lafen an d'Donau, sou zum Beispill d'Riss, d'Rot, d'Große Lauter, d'Blau, , d'Günz, d'Brenz, d'Mindel, d'Zusam, d'Schmutter, d'Paar, d'Abens, d'Grouss Laber, d'Vils souwéi Ilz, Erlau a Ranna.

Zu Passau fléist fir d'éischt d'Ilz vu lénks an d'Donau a kuerz duerno vu riets den Inn. D'Waasser vum Inn, wat aus den Alpe kënnt, ass gréng, dat vun der Donau blo, an dat aus dem Muergebidd vun der Ilz schwaarz, sou dass d'Donau iwwert e längert Stéck nom Zesummefloss dräi Waasserfaarwen huet.

Bedeitend Bauwierker laanscht d'däitsch Donau si besonnesch d'Erzabtei Beuron, d'Fürsteschlass zu Hohenzollern-Sigmaringen, de gotesche Mënster zu Ulm (Ulmer Mënster), d'Abtei Weltenburg an d'Befreiungshal an der Géigend vu Kelheim, d'Bréck aus Steen an den Doum St. Peter zu Regensburg souwéi d'Walhalla bei Donaustauf eng 10 km ëstlich dovunner. Tëscht der Abtei Weltenburg a Kelheim läit de landschaftlech reizvollen a geologesch interessanten Donauduerchbroch bei Weltenburg.

[Änneren] Éisträich

Kaum e Land gëtt esou enk mat der Donau a Verbindung bruecht wéi Éisträich, ob wéinst dem Donauwalzer oder dem Numm Donaumonarchie, deen d'Duebelmonarchie Éisträich-Ungarn op Grond vun ca. 1.300 km Donaukilometer krut.

Dat haitegt Éisträich huet mat ronn 350 km nëmme méi e klengen Undeel um Stroum, bei alle Länner läit et op 6. Plaz. Allerdéngs entwässert bal d'ganzt Staatsgebidd an d'Donau (an domadder an d'Schwaarzt Mier). Nëmmen d'Gebidd vum Bundesland Vorarlberg entwässert gréisstendeels an de Rhäin (Nordséi) an e klengt Gebitt am Nordwesteck vun Nidderéisträich (Waldviertel) an d'Lainsitz (Moldau > Elbe > Nordséi). E puer Kilometer hannert Passau läit déi däitsch-éisträichesch Grenz a kuerz drop follegt d'Schlögener Schlinge, bei deeër de Floss säi Verlaf ëm 180 Grad ännert. No ca. 70 km hannert der Grenz kënnt Linz, déi drëttgréisste Stad vun Éisträich, zu béiden Ufere vun der Donau. Laanscht Mauthausen, Enns a Grein, wou d'Donau hier déifste Plaz an Éisträich opweises huet, erreecht de Stroum no ronn 90 Kilometer Melk mat sengem gewaltege Stëft a fléisst op de folgende knapp 35 Kilometer eng vun de schéinsten Donaulandschaften, d'Wachau, déi un Dürnstein laanscht bis Krems geet; duerno fléisst si duerch d'Tullnerfeld. No un der Staatsgrenz zu der Slowakei fléisst d'Donau duerch d'Haaptstad Wien. De Floss huet d'Stad zu engem wichtegen Handelszentrum gemaach, bis haut ass d'Donau eng wichteg Handelsstrooss tëscht Ost a West.

Wichteg Zouflëss vun der Donau an Éisträich sinn den Inn (riets; un der Grenz zu Däitschland), d'Aist (lénks), d'Traun (riets), d'Enns (rierts) d'Ybbs (riets), d'Traisen (riets), de Kamp (lénks), d'Wien (riets), d'Schwechat (riets) an d'ehemoleg Grenz zu Ungarn (bis 1921), d'Leitha (riets).

Wien ass och de Sëtz vun der Internationaler Kommissioun zum vun Schutz der Donau (IKSD).

[Änneren] Slowakei

Nëmme knapps 45 Kilometer vu Wien ewech, direkt hannert der éisträichesch-slowakescher Grenz, leeft d'Donau - Dunaj - duerch d'slowakesch Haaptstad Bratislava, wou d'March zoufléisst. D'Donau bild fir d'éischt kuerz d'Grenz zu Éisträich a fléisst dann duerch d'slowakesch Haaptstad a bild d'Grenz zu Ungarn.

Wichteg slowakesch Uertschaften nieft Bratislava déi un der Donau leien si virun allem Komárno, en Zentrum vun der ungarescher Minoritéit an der Slowakei, wou d'Waag, de gréisste slowakesche Floss no der Donau an dës münd a kuerz virun der Staatsgrenz déi lescht slowakesch Donauuertschaft Štúrovo, wou nach d'Hron an d'Donau fléisst.

[Änneren] Ungarn

Laanscht d'Donau als ungaresch-slowakesche Grenzfloss läit am Dräilännereck mat Éisträich als éischt bedeitend Stad Győr un hierem ufer. Hei münd d'Rába an d'Donau.

Net wäit ewech vun der Mündung vum Ipoly passéiert d'Donau bei Szob liicht d'Staatsgrenz an ass elo op béide Säiten ungaresch. Kuerz drop stéisst si op d'Börzsöny-Bierger a gëtt vun dësen tëscht de Gerecse- a Pilisbierger am Süde gedrängt. De Laf vun der Donau wend sech hei an engem spektakuläre Landschaftsabschnitt um Donauknéi bei Visegrád ëm ronn 90°, a si fléisst, net wéi bis elo vu West no Ost iwwer ronn 500 Kilometer strikt no Süden.

No ca. 40 Kilometer duerchfléisst d'Donau déi mat 1,8 Milliounen Awunner gréisste Stad vun hierem Laf, d'Haaptstad vun Ungarn, Budapest. Da verléisst d'Donau d'ungaresch Mëttelbierger an trëtt an d'Grouss ungaresch Déifebene, wouvunner si d'westlech Grenz selwer markéiert. Nodeems si duerch eng Partie kleng Stied wéi Dunaújváros, Baja, Paks a Kalocsa gefloss ass, verléisst si kuerz hanner Mohács d'ungarescht Staatsgebitt.

[Änneren] Kroatien

Mat 137 Kilometer Gesamtlängt huet Kroatien no Moldawien de kierzesten Undeel un der Dunav, déi am Dräilännereck mat Ungarn a Serbie bei Batina ufängt. De Floss bild déi natierlech Grenz tëscht Kroatien a Serbien. Déi bedeitendst kroatesch Stad un der Donau ass Vukovar, wat am Krich géint Serbie schwéier Schied dovunnergedroen huet, mee och Osijek läit no un der Donau, nëmmen 20 Kilometer vun der Mündung vun der Drau an d'Donau.

[Änneren] Serbien

Ufanks deelt sech Kroatie (rietst Ufer) mat Serbien (lénkst Ufer) d'Donau. Bei Bačka Palanka mécht d'Donau e Knick a fléisst dann a süd-ëstlecher Richtung duerch Serbien, ewech vun der kroatescher a Richtung rumänesch Grenz.

Nëmme 25 Kilometer nodeems d'Donau vun Ungarn hier d'Grenz an de Grenzrevisiounspunkt Bezdan vis-à-vis vu Batina hannert sech gelooss huet, läit déi bis zum Enn vum Zweete Weltkrich haaptsächlech vun Donauschwabe bewunnten Hafestad Apatin, déi éischt gréisser serbesch Stad un der Donau.

Weider de Stroum erof fléisst d'Donau duerch Novi Sad, wou d'Brécken 1999 am Laf vum Kosovo-Krich staark futti gemaach goufen. Iwwer sechs Joer gouf de Verkéier tëscht den zwou Halscheschte vun der Stad iwwert eng Pontonbréck ofgewéckelt.

No nacheemol 75 Kilometer kënnt d'Donau zu Belgrad un, déi mat knapp 1,6 Milliounen Awunner déi drëttgréisste Stad un der Donau ass, a mat enger Geschicht vu 7.000 Joer och eng vun den eelsten Donaustied.

Op hierem weidere Wee duerch Serbie fléisst d'Donau laanscht d'Industriestied Pančevo mat den Zouflëss Temesch a Smederevo, wou d'Morava an d'Donau fléisst, bevir si laanscht d'Ruin vun der serbescher Festung Golubac an d'Donauschlucht mat der Eiserner Dier fléisst. D'Donau fléisst als Grenzfloss tëscht Serbien a Rumänie bis zu den zwee Staudämm Djerdap 1 an 2. Op serbescher Säit befënnt sech den Nationalpark Đerdap.

[Änneren] Rumänien

Op ronn engem Drëttel vun hierer Gesamtlängt, op ca. 1.075 Kilometer, ass d'Dunărea, wéi d'Donau a Rumänien heescht, rumänesch. Domadder huet Rumänien dee bei wäitem gréissten Undeel um Stroum. D'Donau ass fir d'Land e Grenzfloss mat Serbien a Bulgarien, an der Géigend tëscht Baragan an Dobrudscha mécht si dann e Knick no Norden, fir spéider als Grenz zu der Ukraine an d'Schwaarzt Mier ze fléissen.

Nach virun de spektakulärer Eisener Dir, virun der Entschäerfung um Ufank vun de 70er Joren de geféierlechsten Deel vun der ganzer Streck, fängt hiere Verlaf südwestlech vun de Banater Bierger un, do mündet bei Izlaz den Olt an d'Donau. Nodeems d'Donau Orşova erreecht huet, stéisst si duerch de berühmten Donauduerchbroch a kënnt op Drobeta Turnu Severin. Elo mecht de Floss e Knick no Süden, a leeft laanscht Gruia, Pristol, Cetate a Calafat. Da fängt d'Donau hier 400 Kilometer laang Rees a Richtung Osten als Grenz zu Bulgarien un. Dobäi fléisst si laanscht d'Stied Dabuleni, Corabia, Turnu Magurele, Zimnicea, Giurgiu (direkt vis-à-vis op bulgarescher Säit läit d'Stad Russe), Oltenita, wou den Argeş an d'Donau fléisst, a Călăraşi. Lo begrenzt si d'Dobrudscha-Erhiewung no Westen hin, laanscht Cernavodă, Topalu, Hirsova, Giurgeni a Gropeni, bis si déi béid gréisser Stied Brăila a Galaţi erreecht. Kuerz duerno gëtt si nees e Grenzfloss zu der Ukraine, fir a Richtung Oste geschwënn den Donaudelta ze erreechen; virdrun beréiert si awer nach d'Stied Tulcea a Pardina.

[Änneren] Bulgarien

Fir Bulgarie bild de Floss d'Grenz tëscht Rumänien, nëmmen dat rietst Ufer ass also en Deel vu Bulgarien. Laanscht déi bal 500 Kilometer laang Streck existéiert nëmmen eng eenzeg Bréck; si verbënnt zanter 1954 déi gréisste bulgaresch Donaustad Russe mat dem rumänesche Giurgiu. Fir Bulgarien huet de Floss trotz senger Längt eng manner wichteg Bedeitung wéi fir aner Länner. Well et deen eenzege Floss vum Land ass, wou Schëffer kënnen drop fueren, an dësen awer am manner bewunnten nërdlechen Deel vum Land läit, huet de Floss verkéierstechnesch nëmmen eng regional Bedeitung fir d'Land. Nëmme fir déi kleng Handelsflott huet de Floss eng Wichtegkeet. Vun den 12 Donauhäfe si Swischtow, Russe, Widin, Nikopol, Lom a Silistra déi wichtegst; als Grenzrevisiounspunkt am Nordwesten ass och nach Orjachowo vu Bedeitung. An der Stad Swischtow erreecht d'Donau och hiere südlechste Punkt, vun hei un fléisst si lues a lues Richtung Norden a verléisst hanner Silistra de bulgareschen Territoire.

[Änneren] Moldawien

Den Undeel vu Moldawien un der Donau ass dee klengste vun alle Staaten. Nëmmen op enger Längt vun 340 Meter stéisst de südleche Wutz vum Land tëscht Rumänien an der Ukraine ursprénglech kuerz hanner Galaţi bei Giurgiulesti um Zoufloss vum Pruth an d'Donau. 1999 huet d'Ukraine Moldawien an engem Gebiddertosch weider 230 Meter iwwerlooss, sou dass d'heiteg Gesamtlängt vum moldaweschen Ufer 570 Meter ass. Moldawien huet wëlles, den Zougank zu der Donau fir de Bau vun engem Hafen ze benotzen.

[Änneren] Ukraine

Kuerz hannert dem Zoufloss vum Pruth gëtt dat lénkst Donauufer ukrainesch an de Floss bild d'Grenz tëscht Rumänien an der Ukraine. Déi bedeitendst ukrainesch Stied un der Donau sinn Ismajil, Kilija a Wylkowe, wou de Bystre-Kanal ufänkt. Hannert dem ukraineschen Deel vun der Donau gëtt si nees rumänesch a fléisst kuerz drop an d'Schwaarzt Mier.

[Änneren] Liewensraum Donau

Kuckt dozou den Haaptartikel Liewensraum Donau.

[Änneren] Wirtschaftsraum Donau

Kuckt dozou den Haaptartikel Wirtschaftsraum Donau

[Änneren] Literatur zum Thema

• Dieter Maier, Die Donau. Utting 2001, ISBN 3-89555-012-4
• Michael Weithmann, Die Donau. Ein europäischer Fluss und seine dreitausendjährige Geschichte. Wien 2000, ISBN 3-222-12819-7
• Manfred Fiala, Die Donau. 2004, ISBN 3-900323-79-8
• Günter Schödl (Hrsg.), Deutsche Geschichte im Osten Europas. Land an der Donau. 1995, ISBN 3-88680-210-8
• Herbert Lugschitz, Winfried Steininger, Am Strom entlang. Fahrradführer Donau. Wien bis Budapest. 1999, ISBN 3-89595-028-9

[Änneren] Linken

[Änneren] Kuckt och

• Donauquell
• Donaucity
• Donautuerm

[Änneren] Um Spaweck

• International Kommissioun zum Schutz vun der Donau
• Vill Informatioune vum WWF zur der Donau, dem Liewensraum an den Déieren- a Planzenzorten