Alex Bodry
Vu Wikipedia, der fräier Enzyklopedie.
Den Alex Bodry gebuer den 3. Oktober 1958 zu Diddeleng, ass e lëtzebuergesche Politiker.
No senger Première am Escher Jongelycée studéiert den Alex Bodry zu Paräis op der Sorbonne Droit a schléisst dës Studien 1981 mat enger Maîtrise of. Hien schreift sech als Affekot um Staadter Barreau an.
Vun 1982 bis 1989 ass hie Member vum Diddelenger Gemengerot. 1984 gëtt hien op der Lëscht vun der LSAP an d'Chamber gewielt (bis 1989), an 1999 an 2004 erëmgewielt. Tëschent 1989 an 1999 ass hie Minister an de Regierunge Santer-Poos II an III, an och Juncker-Poos, zoustänneg fir d'éischt fir Landesplanung, Ëmwelt, Energie a Kommunikatioun, da fir Landesplanung, Turnen a Sport, Arméi a Jugend.
Zanter 1999 ass den Alex Bodry Vizepresident vun der LSAP-Chambersfractioun. Hie gëtt am selwechte Joer Éischte Schäffe vun Diddeleng, an 2004, nodeems de Mars Di Bartolomeo Minister gëtt, Buergermeeschter vun deeër Stad.
Zanter 2004 ass hie President vun der LSAP.
Den Alex Bodry huet eng Rëtsch Publicatioune iwwer juristesch a verfassungsrechtlech Themen opweises.
Hien ass och President vun der Fédération Luxembourgeoise d'Athlétisme an Éierepresident vun der Association luxembourgeoise pour le droit de l'environnement.
Hien ass bestued a Papp vun 2 Kanner.
