Tarja Halonen
Wikipedia(e)tik
| Tarja Kaarina Halonen | |
 |
|
| Kargua: | Finlandiako presidentea |
| Agintaldiaren iraupena | 2000tik - gaur arte |
| Aurrekoa: | Martti Ahtisaari |
| Jaiotze eguna: | 1943ko abenduaren 24a (Helsinki) |
| Alderdi politikoa: | Alderdi Sozial-Demokrata |
| Lanbidea: | Abokatua |
Tarja Kaarina Halonen (1943ko abenduan Helsinkin jaioa), gaur egungo Finlandiako presidentea da. 2000. urtean aukeratua izan zen presidente eta 2006. urtean berriro aukeratua gertatu zen, agintaldiak 2012. urtean iritsiko da amaierara. Lehen emakumezko presidente finlandiarra da.
Nahiz eta familia langile batean jaio, oso pertsona kultua da. 7 hizkuntza menperatzen ditu: finlandiera, suediera, ingelesa, alemana, frantsesa, afrikaansa eta estoniera.
[aldatu] Biografia
1943ko abenduaren 24ean jaio zen Helsinkiko langile auzo batean. Zuzenbidea ikasi zuen Helsinkiko unibertsitatean eta segituan politika kontuetan sartu zen. 1971. urtean, gaur egun partaide den Alderdi Sozial-Demokratan sartu zen.
Gutxinaka-gutxinaka eta lan gogorraren ondoren, Helsinkiko kontseilutik Finlandiako parlamentura iritsi zen eta handik urte gutxi pasa ziren 2000. urtean presidente aukeratu zuten arte. Hauteskundeak baino lehenago, egunkariek, Tarja laugarren tokian kokatzen zuten presidentzia lortzeko hautagaien artean. Hala ere, bere pertsonalitate ireki eta liberalak eta emakume izanak bozka atsegin asko jasoarazi zizkion eta Finlandiako historiako lehen emakumezko presidentea bihurtu zen.
Tarja Halonenek 2003. urtean finlandiarren %88aren onespena zuen eta horrek 2006. urtean berriz presidente aukeratzea ekarri zuen. Izan ere, Finlandian, Frantzian bezala, bi erronda egiten dira. Lehenengoan hautagai guztiek parte hartzen dute, eta bigarrengoan lehenengoko bi hautagai bozkatuenak elkar lehiatzen dira presidentzia lortzeko. Bertan, Tarjak, bozken %51,6 lortu zuen 2000. urtean, eta 6 urteko presidentzia paregabeak, 2006. urtean bozken %74a lortu izanaren erakusgai dira. Oso pertsona maitatua da Finlandia osoan, errekurtso gutxiko familia batean hazi eta presidente liberal eta justua izatera iritsi delako.
[aldatu] Ikuspuntu politikoa
Hasieran, Finlandiako Ezker Batuan sartzeko puntuan egon zen, baina aukerak ikusirik, azkenik, Finlandiako Alderdi Sozial-Demokratan sartzea erabaki zuen, bertan, ezker muturraren lana egiten zuelarik. Honen erakusgarri, Ekialdeko Alemaniaren onarpen internazionala sustatu zuela da.
"Bakezaleen ama" deritzote, eta nahiz eta bere garaian SESBekin harreman estuak izan, betidanik gizakien eskubideak aldarrikatu izan ditu. Zin egin zuen ez zuela kanpo-politikan militarki parte hartuko eta gauzak elkarrizketa bidez konpontzea gustatzen zaio. Politika mota hau oso ohikoa da Finlandian, izan ere kontuan hartu behar da, Bigarren Mundu Gerra ondoren, naziarteko zigorra jaso zuela Finlandiak bere independentzia babestu nahi izan zuelako Alemania eta SESBekin ondoren bat egin zuela. Honen ondorioz, hainbat lur kenduak izan zitzaizkion Finlandiari, eta ordudanik begi-txarrez ikusi izan ditu herrialdeak nazioarteko erakundeak, hala nola NATO, bertan partaide izateko aldeko politikaririk ez baitago.
