Zelta

De Biquipedia

En azul as zonas d'influyenzia zelta en a Peninsula Iberica prerromana en o 200 aC. [1].

Cruz zelta

Os zeltas son os pueblos que charran u charroron as luengas zeltas, y que en o sieglo I aC bi yeran dende Turquía dica Portugal. Iste termino ye d'orichen grieco ("keltoi").

Os pueblos zeltas actuals son bretons, irlandeses, escozeses, maneses y galeses.

[editar] O termino zelta

O termino zelta s'ha feito serbir en diferens contestos y por ixo tién güé muitos y bariatos sinnificatos:

Os pueblos ditos zeltas por os autors clasicos greco-romans.
Os pueblos que se claman zeltas á ellos mesmos.
As luengas zeltas, formando un grupo definito por lingüistas modernos, drentro de as luengas indoeuropeyas.
A cultura de La Tene.
Un estilo artistico de a II Edat de Fierro.
L'arte irlandés de o sieglo I aC.
Balors autuals de a soziedat ozidental supuestamén eredatos de o erenzio zeltico.
A mosica zelta.

Bi ha problemas con toz estos sentitos de o termino zelta, porque son fruito de bellas obserbazions subchetibas de autors clasicos y de l'atraczión que exerzioron sopre os prerromanticos y romanticos europeyos de os sieglos XVIII y XIX.

Bels pueblos atlanticos autuals que charran lenguas zeltas se identifican como zeltas como efeuto d'ixe romantizismo de o sieglo XIX, pero no parixe que se clamasen asinas en o periodo meyebal y antigo.

[editar] Romanizazión

Chulio Zésar conquerió Galia en o S I A.C. A conquista de Britania estió más lenta, y nunca no estió total. O gubierno local d'os romanos n'istas rechions aprofitó a nobleza local que enantes teneban o gubierno en os estatos tribals. A istituzión de os druidas estió perseguita en os primers tiempos cuan yeran un periglo politico.

Os abitans natibos se romanizoron y adautoron parte de a forma de bida romana. O arte zelta incorporó elementos romanos, plegando á creyar-se un arte galo-román. A romanizazión estió más rapida en as ziudaz que en o meyo rural. Con a romanizazión o latín s'emplega más y más.

Lo mesmo se desbeniba con a cristianizazión. Se diz que cristianizazión forzata de o meyo rural por obra de San Martín de Tours favorexió a latinizazión de o meyo rural en os zaguers sieglos en o S IV.

[editar] Relichión zelta

A relichión zelta yera una relichión politeísta de carauters indoeuropeyos, con un sustrato que podeba remontar-se a la relichión astronomica de os pueblos atlanticos que costruiban megalitos.

O feito que os zeltas no tenesen chunidat politica, no tenesen una literatura en común y estasen muito estenditos a nibel continental fazió que a relichión zelta no tenese a omocheneidat d'atras brancas indoeuropeyas como os griegos.

Bi eba un calendario lunar de 13 meses con fiestas sagratas 40 días dimpués de os solstizios y equinozios, fiestas que o cristianismo ha conserbato.

Ye polemico, pero cuasi seguro, que os zeltas fesen sacrifizios umans. A nibel simbolico o lumero 3 y os multiplos suyos aparixen de forma cutiana en a literatura, a mitolochía, l'arte y a teolochía.

A mitolochía zelta ye complexa, poco conoxita pero muito rica y d'un carauter espezial, prou diferén de a griega.

Os zeltas de Galia, Britania e Irlanda desembolicoron l'istituzión relichiosa de os druidas en un periodo tardano de a cultura de la Tene, y continoron esistindo en o periodo román.