Chistén
De Biquipedia
 |
Iste articlo tien una bersión escrita con a grafía d'a SLA. Puede beyer-se aquí. |
|
Chistén |
|||
|---|---|---|---|
|
|
|||
 El lugar de Chistén. |
|||
| Comunidat autonoma |  Aragón |
||
| Probinzia | .svg/20px-Flag_of_Huesca_(province).svg.png){kind=small} Uesca |
||
| Redolada | Sobrarbe | ||
| Codigo postal | 22367 | ||
| Latitut Lonchitut |
{{Coor dd| lon=0.33|lat=42.67}} | ||
| Superfizie | 81,1 km² | ||
| Altaria | 1378 m. | ||
| Distanzia | 150 km enta Uesca | ||
| Poblazión | 187 ab. | ||
| Chentilizio | chistabín | ||
| Ríos | Zinqueta | ||
| Pachina web | {{{web}}} | ||
 |
|||
 Esta fuella ye escrita en chistabín. |
Chistén (Gistaín en castellán, Gisten en Grafía SLA) ye un monezipio situau en la probinzia de Uesca en la bal de Chistau. Es suyos abitants se dizen chistabins.
La poblazión suya ye de 161 abitants, e la superfizie d'el monezipio 76,14 km², con una densidat demografica de 2,11 ab/Km2. D'es 76,14 km² d'el termín monezipal, garra denguno ye per baixo dela cota d'es 1000 metros d'altitut, más d'el 50% son per alto d'es 2000 metros, e belas puntas (en el Pico dela Pez, la Bachimala ó la Culfreda) pasan t'alto d'es 3000. Ixo fa que el monezipio de Chistén siya un d'es más altos de tot el Perineu español.
Contenius |
[editar] El lugar
El lugar de Chistén se troba per alto de San Chuan, á 1378 metros d'altitut á la falda recuesta d'el Cuezo, poquet más d'un kilometro seguindo la carretera dela bal de Chistau t'alto en pasare San Chuan, que fa buenas curbas e tien tammién dos esbiaderas que ye la pista que puya ta Biadós e tammién ye d'un canto per á'n se baixa ta'l Puent d'es Pecadors que ye dintro d'el monezipio de San Chuan. Esta carretera, de San Chuan ta Chistén, la son adobando estes años (2007) ta fere que tienga dos carrils per cuentas de la uno solo que teneba. La billa mira ta la bal de Chistau, anque la más gran parte d'el termín monezipal ye abocau ta la bal de Biadós.
El nuclio de Chistén, que ye la unico que fa parte d'el monezipio, ye una billa chicota (ó mesmo un lugar gran) n'alto d'una faixa recuesta de la Peña d'el Cuezo (1926 m), e ixo el fa de sere la unico lugar de Chistau que no toca el Zinqueta, pos en ye bels zentenars de metros de leixos. De tot el patrimonio que este lugar tienei, s'abrí de fere menzión delas casas noples, belunas d'elas de tan antiguas que se ban fere d'es siglos XVI e XVII. D'ixes tiempos mos en trobem Casa de Rins, que hi tien la calendata en la portalada que diz que ye fecha d'el 1600, e que encara conserba el porte suyo tradizional e las formas tepicas de qu'abrí estau una delas casas más puyentas dela localidat pos n'el dezir d'es bezins de Chistén se recuerda que d'antes teneban ribalidat con els de Casa Tardán, qui yeban tammién bien prenzipals. Atras casas como Casa Palazín mos enseñan qué bien que n'han fecho suc d'es tiempos cuan que les n'ha calíu, e alabez, s'han adaptau ta fere negozio de cosas como ye el torismo que ye el que oi fa que la billa tienga economía buena.
El torismo e sobre tot, que s'han fechas prou segundas residenzias en la billa, l'han chuflato bida nueba pos anque el monezipio tienei buenas estibas e teneba buena cantidat de bestiar, con es años en eba marchau muchisma gente e ya no yeba Chistén la billa que eba síu n'atros tiempos.
[editar] Las torres
Chistén ye una billa que ba tenere importanzia istorica perque yeba el zaguer puesto d'á'n que se saliba ta pasar es puertos ta Franzia, e tammién cuan se tornaba d'allá t'aquí. Podrí estar que s'abés de pasare el puerto de Plan per el barranco dela Sallena, ó tammién que se remontás ta'l puerto dela Madera ó dela Pez per la bal de Taberners (de Biadós t'alto), e tammién, rematando, per Añes Cruzes. Ye per la suya ubicazión que Chistén ba tenere espezial negozio d'el contrabando con las bals franzesas á trabiés d'ixes puertos (ye important que mos queden puestos con nombres d'ixa epoca, como el paso d'es caballos en La Sallena) e asinas se fesen grans fortunas ta beluns d'el lugar. Asinas se ban alzare, sobre tot n'es siglos XVI e XVII, las torres que son es monumentos prenzipals dela billa, que n'eban síu más, pero que atualment mos en trobem nomás que dos.
De la construzión d'una d'estas torres, la más alta, en dizen es bezins de Chistén que ba sere bien curiosa, pos hi eba ya en el lugar una torre, la dita torre de Rins, per baixo dela il·lesia, (propiedat de Casa de Rins) que yeba l'argüello d'es amos suyos pos yera el costumbre d'ixes tiempos fer-se alzar torres t'amostrar qué diners se teneban en la casa, más que no ta defender-se guaire (anque, obiament, tammién yeran utils si nunca calerí ta ixe menister). Alabez, perque es amos de Casa de Rins se feban d'ire con despecho con d'els de Casa Tardán, e siempre les feban ranuca perque teneban una torre á'l canto dela il·lesia, diz que un diya que yeba uno de Rins redindo-se-ne le'n ba dezire á l'amo de Tardán: "¡Cosa no bales, que bales menos qu'un gran d'ordio!" e alabez le ba dezire l'amo de Tardán "Doncas ya te cal que mires bien... perque este gran d'ordio te foterá un pin debant 'la casa que ni el sol no tornarás á biyere". De tiempos dimpués, teneban els de Tardán una torre que yeba dos bezes d'alta la de Rins, e puesta debant de casa d'éstes ta quitar-les d'el sol. La dos torres encara las podem biyere á'l puesto, e l'antiguisma portalada de casa Rins dibaixo la uembra de la torre de Tardán en las oras zentrals d'el diya.
Á más, es casaches de la billa de Chistén tienen un puesto terzeno que repunta per alto, que ye la il·lésia de San Bizent el Martir, fecha d'es siglos XVI e XVII. Atros monumentos son la ermita de San Fabián, 1 u 2 Km leixos á par d'el barranco d'el Pazín, fecha d'el siglo XVIII, e tammién es conchuntos de bordas que hi eba per alto en Biadós e en Taberners, belunas que encara conserban es tellaus de palla que gosaban á tenere d'antes. l'Espital de Chistén e el santuario dela Vírgen Blanca, á'n que s'achuntan el Zinqueta dela Pez e la uno d'Añes Cruzes.
[editar] Fiestas
- 20 de chinero, romería ta la ermita de San Fabián.
- Un cabo de semana de frebero, "Las Aguedetas" (festibidat de Santa Águeda, fiesta delas mullers) e es famosos Carnabals de Chistau.
- 20 d'agosto, Fiesta Mayor fendo honor ta San Chuaquín, patrón d'el lugar.
