Jahr Null

Us der alemannische Wikipedia, der freie Dialäkt-Enzyklopedy

Dialäkt: Züridütsch

S Jahr Null gits in dr Chrischtliche Ära, also eusere gegewärtige Ziitrechnig, nö.

Inhaltsverzeichnis 1 Grundsätzlichs 2 S julianische Schaltjahr Null  (= 1 v. Chr.) 2.1 Vergliichstabelle zur Cassini-Chronologie 3 S gregorianische Schaltjahr Null  (≈ 1 v. Chr.) 3.1 Kritik a dr Norm ISO 8601 4 Lueg au:

[ändere] Grundsätzlichs

Di römische Zahle händ keis Symbol für d Null, di sogenannte arabische Ziffere dägege scho. Letschteri sind gege Endi vom 5. Jahrhundert in Indie entwicklet worde und so öppe ziitgliich zu Dionysius Exiguus,wo im Jahr 525 de Aafang vo dr chrischtliche Ära für s Jahr 754 nach dr Gründig vo Rom errechnet hät, em vermeintliche Jahr vo dr Geburt Christi. Es isch aber fascht föif Jahrhundert 'gange (cf. Gerbert von Aurillac), bis mer in Europa vom „Konzept vo dr Ziffere Null“ überhaupt Kenntnis gnaa hät – und erscht i dr Renaissance händ di arabische Ziffere in Europa allgemeini Anerchennig , Verbreitig und Verwendig gfunde.

Drum gits in dr Ziitrechnig vo de Hischtoriker keis Jahr Null. Das hät zur Folg, dass zwüsched em 1. Juni 500 v. Chr. und em 1. Juni 500 n. Chr. überraschenderwiis nur 999 Jahr lieged. Daas arithmetisch bedenkliche Ergebniss hät d Aschtronome vom 18. Jahrhundert zunere eigene, modifizierte Ziitrechnig verfüehrt. (Cf. Epocheschprung.)

Mit em Cassini isch sich di moderni Wüsseschaft hüt demit einig, dass e korrekti Chronologie eigentlich es Jahr Null bruucht. I de antike Chronike sind aber traditionell d Herrscherjahr, z.B. vo de Caesare 'zellt worde, unter Verwendung vo Ordinalzahle. So begründed d Jahre vo dr chrischtliche Ära, d Jahr nach Chrischtus – logisch richtig ohni Jahr Null – ebe au di „chrischtlichi Chronik“. D Jahr vor Chrischtus, d „Chronik vo dr vorchrichstliche Ziit“. Beidi zäme ergänd aber kein Chronologie, sondern zwei 'trennti Chronike.

Zwei verschiedeni Jahr Null sind bisher definiert und vorgschlage worde. Momentan wird aber nur s „julianische Schaltjahr Null“ tatsächlich aagwendet.

[ändere] S julianische Schaltjahr Null  (= 1 v. Chr.)

D Aschtronome rechned sit 1740 mit eme Schaltjahr Null (= 1 v. Chr.), dem sini Definition wird gmeinhin em Jacques Cassini zuegordnet; doch dörfti scho einigi Jahrzehnt früehner siin Kolleg Philippe de la Hire in siine aschtronomische Tafle mit eme Jahr Null grechnet händ. Jetzt hät mer e Chronologie ghaa, wo au ihre Name verdient, mit eme logisch zwingende Jahr Null. Dennoch isch die aschtronomisch Chronologie „kalendarisch unkorrekt“. Erschtens definiert si s Jahr Null als Schaltjahr, zweitens rechnet si für d Ziit vor em 15. Oktober 1582 in Julianische Jahre, aber nach em 4. Oktober 1582 i Gregorianische Date (cf. von Mädler). Dur daas chunnt en aschtronomische Kalenderirrtum zschtand, wo für di ferni Vergangenheit ein ganze Monet erreiche chan, und immerhin plus minus ein Tag für di jüngschti Vergangenheit und di nööch Zuekunft.

[ändere] Vergliichstabelle zur Cassini-Chronologie

Die traditionell gschichtlich Ziitrechnig entschpricht em römische Kalender vo dr chrischtliche Ziitrechnig, benutzt aber trotz fehlendem Jahr Null s arabische Zahlesyschtem. Di traditionell aschtronomisch Chronologie bsitzt daas Jahr Null. Dem Jahr 1 v. Chr. entspricht s Jahr 753 sit dr Gründig vo Rom.

Moderns Datum	Gschichtlichs Jahr	Aschtronomischs Jahr		Christum natum 1	ab urbe condita 2	Latiinisches Datum
31. Dezember	1 v. Chr.	0	=	I ante	DCC.LIII a.u.c	pridie Cal. Ian.
1. Januar	1 (n. Chr.)	1	=	I post	DCC.LIV a.u.c	Calendis Ianuariis
1 latiinisch: „vor bzw. nach dr Geburt Chrischti“    2 ab urbe condita (Antiki Ziitrechnigseinheit)|a. u. c. - latiinisch: „sit dr Gründig vo dr Stadt (Rom)“.

Aamerkig: De obeschtehendi Tabelle git de theoretische, richtig aagwendeti Julianische Kalender wieder. De Caesar hät siin neue Kalender am 1. Januar DCC.IX |a.u.c. (709 = 45 v. Chr. ) iigfüehrt. Daas Jahr isch au grad ei Schaltjahr gsii. S Jahr vorher wird als Verworres Jahr bezeichnet (wils 445 Tage ghaa hät). Nach em Caesar sim Tod sind aber 36 Jahr lang en falsche, missverstandene Schaltmodus aagwendet worde. S Jahr 709 a.u.c. isch sofort wieder als erschte Jahr verstande worde und im „vierten“ Jahr 712 hät mer abermals es Schaltjahr iigleit, also scho nach drüü Jahr. So sind di römische Jahr 715, 718, 721 etc. bis iischlüüsslich 745 a.u.c. (IX  v. Chr.) alli tatsächlich Schaltjahr. 36/3 = 12, aber 36/4 = 9.
S Jahr 745 wäär au bi richtig aagwändete Schaltregle römischs Schaltjahr gsii. Di eigentliche Schaltjahr 749 a.u.c. (= V  v. Chr.), 753 a.u.c. (= I  v. Chr.) und 757 a.u.c. (= IV  n. Chr.) sind aber uusgfalle – sind also Gmeinjahr gsii – um de Kalender z korrigiere.

Wiiterhii sött no beachtet werde, dass, obwohl s Neujahr vom Caesar eindüütig uf de 1. Januar feschtgleit worde isch, Datumsaagabe wie „pridie Kal. Ian.“ mit folgender Jahreszahl verschieden interpretiert werde chönd, will d Römer ab em 14. Dezember rückwärts zellt händ (XIX ante Kal. Ian.). Dr 30. Dezember ist der dritti [sic] Tag vor dn Calende, während der 31. Dezember dr Vortag (pridie Kal. Ian.) vo de Calende vom kommende neue Jahr isch.

[ändere] S gregorianische Schaltjahr Null  (≈ 1 v. Chr.)

E umstritteni Feschtlegig hät di International Standard Organisation mit ihrer Norm ISO 8601 gschaffe:1988, übernaah 1992 vo dr EN 28 601. Die weltwiit gültig, aber – zumindescht i dem Teil – auch weltwiit ignorierti Norm offizialisiert en „proleptischen (rückwirkend gültige) gregorianische Kalender“, wo si es Schaltjahr Null zuegordnet händ. Daas Jahr Null fangt aa am 3. Januar 1 vor und endet am 2. Januar 1 nach Chrischtus. Dr tatsächlich gregorianisch Kalender verschtaat sich aber, im Gegesatz zum Julianische, als uusdrücklich nöd proleptisch.
Au d ISO 8601 i dr Version us em Jahr 2000 gseeht es Jahr Null und Jahresaagabe mit negativem Vorzeiche vor.

[ändere] Kritik a dr Norm ISO 8601

• Für Aschtronome isch dr gregorianisch 400-Jahr-Zyklus ungünschtig, wo d Jahrhundert innerhalb ungliiche Längene händ. Aschtronomischi Berechnigen bruuched en gliichförmige Ziitablauf, worum Aschtronome hüt zerscht und schtets in julianische Jahrhunderte rechned (lueg Julianisches Datum JD) und erscht am Endi vo de Berechnige alli Date na em 4. Oktober 1582 in gregorianische Datum korrigiere. Si werde daher d Norm ISO 8601 = EN 28 601 au künftig chuum aawende.

• D Gschichtswüsseschaft hät s julianische Jahr Null nie verwendet. Sie benutzt für die Ziit de altbekannti, proleptisch, julianisch Kalender vo dr chrischtliche Ära, also ohni Jahr Null. Mit dem isch auch nöd z erwarte, dass d Hischtoriker d ISO Norm 8601 je umsetzed. E Umdatierig vo sämtliche hischtorische Ereigniss, wo dänn öppe de Julius Caesar schtatt am 15. März 44 v. Chr. jetzt plötzlich am 13. März vom Jahr -43 (in ISO-Schriibwiis: -0043-03-13) ermordet worde, würdi nume heillosi Verwirrung schtifte.

• Im Computerbereich werded Datums-Format immer in Bezug uf en bestimmte Ziitpunkt umgrechnet. Hüt ist das meischtens dr 1. Januar 1970, 00H00 UTC (lueg bi Unixziit). Daher hät au d Informatik kein Bedarf amene „proleptische gregorianische Kalender mit em Jahr Null“.

[ändere] Lueg au:

• Schtund null
• Jahreskalender: 1. Jhdt. v. Chr. und 1. Jhdt. n. Chr.
• Dekade: 0er Jahre v. Chr. und 0er Jahre n. Chr.
• Jahre: Jahr 1 v. Chr. und Jahr 1 n. Chr.
• Epocheschprung – Jahreszellig am Nullpunkt vo dr Chronologie
• Zeitenwende – Uusgewählti Pünkt vo dr Chronologie
• Zaunpfahlproblem – Zu allgemeine Problematike mit Nullpünkt
• Kalender:
  • Christliche Ära
  • Julianischer Kalender
  • Kalender (Römisches Riich)