Waschappel
Uut Wikipedia
Waschappel (Nederlands Westkapelle, op oare durpen Weskappel) is 'n stadje in de Zeêuwse gemeênte Ter Veere, glad in de westelikste punt van Walcheren, mee 2638 inweuners op 1 januaori 2007.
In'oud |
[bewerk] Geschiedenisse
Waschappel, is, net eênder as Oôskappel, vernoemd nae 'n kapel die-a ier stieng. Deêze tweê kapellen bediende 'n groôt deel van noordelik Walcheren, daer-a toen nog gin plekken van beteêkenisse en daedeu ok gin kerken waeren. In 1223 kreeg 't plekje stadsrechten, mae toet 'n echte stad zouw 't z'n eige noôit ontwikkele. In 1253 was ier de Slag bie Waschappel tussen Vlaemse en Ollandse legers, die deu de Ollanders overtugend gewonne wier en 'n belangrieke stap nae de Ollandse eerschappij in Zeêland was.
In 1944 wier de Zeêdiek deu de Britten gebombardeerd, waedeu de kreêke ontstoeng. Toet 1997 was Waschappel 'n eige gemeênte; in dat jaer goeng 't op in de gemeênte Ter Veere.
[bewerk] Cultuur en toerisme
[bewerk] Dialect
In Waschappel oor 'n dialekt gesproke dat-a vee verschilt van 't aore Walchers en vò vee Zeêuwen zelfs moeilik te verstaen is. Dat komt deu de isolaotie daerin de plekke eêuwenlank gelegen ei. 't Kent vee woôrden die in 't aore Walchers naebie of elemaele onbekend bin en doet vedders de g- in voltooide deêlwoorden wiglaete: emaekt vò gemaekt. Dat komt wè dikkelder vò in Zeêland, mae nie in de omgevienge van Waschappel.
[bewerk] Bienaemen
De ouwe gewoonte van plattelandsgemeênschappen om mekaore bienaemen te geven ei in Waschappel toet d'n dag van vandaeg standg'ouwe. Dit ei voraol te maeken mee 't kleine antal fermieljenaemen t'r plekke.
[bewerk] Bezienwaerdeg'eden
't Meêst opvallende is nog altoos d'n viertoren, bekend as Waschappel 'Oôg. Dit is 'n 38 meter oôgen toren, die is overgebleve van 'n vuuftiende-eêuwse kerke (die-a in de achttiende eêuwse bie brand verlore goeng). D'r stae nog 'n kleinder iesderen viertorentje an d'n diek: Waschappel Laeg. De meer as 4 kilometer lange Waschappelse Zeêdiek wier begonne in 1540 en brak deu in 1684 en 1944 (ziet bove). Waschappel is, neffens Hondsbos in Noord-Olland, d'n eênege natuurlike zeêkuste daer-a gin dunen bin om 't land te beschermen; daerom wier 't mee de zeêspiegelstiegienge noôjeg dien diek an te leien. 'n Vèddere bezienswaerdeg'eid is Meulen De Noorman, daer-a 'n museumpje over meulen in gevestegd is.
[bewerk] Recreaotie
De vloed van 1944-45 ei 'n weêle of kreêke achtergelaete, die-a nog vò waetersport en aore recreatie gebruukt oor. Waschappel leit an de lange wandelroute E9, die an van Frankriek nae de Baltische landen loôpt. Bie Waschappel staet ok de Hooizolder, 'n populairen discotheek.
