Taeye (di bwès)
Èn årtike di Wikipedia.
Ene taeye (on dit eto: ene rasse, ene virêye, ene håye), c' est on bwès avou bråmint des sôres d' åbes (côrîs, beyôles, tchinnes, sås, tchårnales, des bwès d' poye, havurna, evnd., mins nén des faws, metans) k' on-z abate tos les trinte cwarante ans, tot leyant sacwants beas åbes å mitan.
Istoricmint, les taeyes, c' esteut l' prumî sistinme po dner les manêyes ås djins. Li mot "virêye" mostere ki ci pårt di bwès la esteut eployeye troes ans å long, li deujhinme anêye pol sårtaedje, li troejhinme anêye pol soyaedje des djnesses.
Ecolodjicmint, c' est l' meyeu des ecosistinmes des bwès, ki leye viker onk astok di l' ôte toplin des sôres di plantes et d' biesses.
Ene boune taeye, ça dene ene coide di bwès a l' åre. Mins economicmint, ça n' rapoite nén assez, et end a todi moens, do moens el Walonreye.
El Walonreye, li bén-fond des taeyes, c' est å pus sovint dås comenes, mins end a eto da des pårticulîs.
Les mots "taeye", virêye et rasse rivnèt cobén dins les nos d' plaeces del Walonreye, tot come li mot håye.
Alez s' vey e splitchant motî po des racsegnes linwistikes so les mots "rasse", "taeye", et "virêye".