Notru-Dame des Avéns
Èn årtike di Wikipedia.
Notru-Dame des Avéns est ene fiesse del Aviedje Mareye ki tchait li 8 ou 9 di decimbe, tofer å timp des Avéns, et ki fiestixhe li djoû ki l' mame da Mareye l' a yeu leye e s' vinte.
Cisse fiesse la a cmincî a esse fiesteye å 8inme sieke pås Greks, el 9 di decimbe, so l' modeye del Notru-Dame do pretins, et esse lomêye "Li Cocevaedje dal Sinte Ane, cwand k' ele a yeu e s' vinte li Foirt Sinte Mame do Bon Diu". Li Notru-Dame do pretins, c' est l' 25 di måss, pår nouf moes divant Noyé. Come po nén dner al Aviedje tolminme li minme oneur k' å Crisse, les Greks n' ont nén fiestî l' Notru-Dame do pretins li 8 di decimbe (nouf moes divant l' 8 do setime, li fiesse cwand k' ele åreut skepyî), mins on djoû pus tård, el 9.
Après les croejhådes, a Nåpe en Italeye ey a Liyon ons a cmincî a fiestî l' Notru-Dame des Avéns eto, li 8 di decimbe, et l' lomer "Li Cocepcion di Notru-Dame". Mins c' esteut ene fiesse nén pattavå å Coutchant, minme s' ele a prins des racenes en Inglutere et a Båle e Swisse.
Li påpe Peye V, e 1570, a tapé evoye bråmint des fiesses del Aviedje: Notru-Dame del Plovinete, Notru-Dame d' Awousse, etch etch.
Pus tård, en 1854, cwand l' påpe Peye IX a declaré l' idêye do cocevaedje sins tatche del Aviedje, il a rmetou so pîs li fiesse del Notru-Dame des Avéns, la k' tolminme ele n'aveut nén disparexhou, mågré Peye V. Asteure ele a divnou ene grande fiesse.
Notru-Dame des Avéns est paralele a Notru-Dame do pretins. Li prumire tchait e cwareme avår li dimegne Lætare, et c' est ces deus djoûs la do cwareme k' ons eploye li coleur roze. Li deujhinme tchait ez Avéns avår li dimegne Gaudete, et c' est co ces deus djoûs la des Avéns k' ons eploye li roze.
