Steven Spielberg
Se Vükiped: sikloped libik
Hiel Steven Allan Spielberg (pämotöl tü 1946 dekul 8) binom biomagodemidilekan, -prodan ä -lautan Lamerikänik. Ya egetom kilna premi: Oscar e binom dilekan benosekikün jenotema biomagodemas: vobots omik ägetons dolaris za 8 000-balions bevünetiko. Gased: Forbes cedom völadi dalabotas omik as dolars 3 000-balions. Ün 2006, gased: Premiere älecedon omi as pösod nämädikün ä flunilabikün dustoda biomagodemas. Gased: Time älisedon i nemi omik as balan Pösodas Gretikün Tumyela. Finü tumyel 20id, gased: Life änemon omi pösodi flunilabikün menäda omik.
Pö karier, kel ya edulon degyels za fols, biomagodems ela Spielberg etefons yegädis e stülis mödikis. Dü degyels: 1970, 1980 e 1990, biomagodems kil omik: el Jaws („Maxüls“; sevädik id as: „Jak“), el E. T. („Plödatalan“) ed el „Jurassic Park“ („Legad Yuratik“) ävedons biomagodems benosekikün timäda oksik. Biomagodems ventürik se prim kariera omik suvo palelogons as sams patedik biomagodemas pöpätik benosekik. Ün yels lätik, el Spielberg äbevobom yegädis fäkädikum äs yuanipöjut, slaf, krig e jekälim.
