Leon Spilliaert
Uit Wikipedia
Leon Spilliaert (Ostende, 28 juli 1881 – Brussel 23 november 1946) was een West-Vlamsche kunstschilder en têkenoare.
[bewerkn] Leven
In zyn puberteit sukkelde Leon Spilliaert me zyn gezoundeit. Je was styf gevoelig, een bitje weireldvrimde en ip z’n eigen. Zyn middeboare schoolschriftn stoundn al vul me schetsn, z’n têkentalent manifesteerde em ton al. J’ad ook een grôte passie vo literateure en filosofie, surtout vo de symbolistn Nietzsche en Schopenhauer. In 1899 was Spilliaert ingeschreven in de Academie vo Schône Kunstn in Brugge moar achter een poar moanden al geschrapt deur ziekte. J’ad last van astma. In 1900 giengt’n tegoare me z’n voader noa de weireldtentôonstellienge in Parys en je kwaam doar in contact me ‘t werk van symbolische kunstnoars lik Gustav Klimt, Jan Toorop… In 1902 giengt’n in dienst by de Brusselse uutgever Edmond Deman, die em intoduceerde by z’n vriendn en zoaknreloaties. By Deman kwoamn d’r vele kunstnoars over de vloer. In da milieu voelde Spilliaert em thuus. Je wierd styf angemoedigd deur de dichter en kunstcriticus Emile Verhaeren. In 1907 gieng z’n gezoundeid styf achteruut. J’ad last van moagzweiren woadeure dat’n nie koste sloapn en azo giengt’n dikwils ’s nachts wandeln in Ostende. De melancholische beeldn van ’t sloapende Ostende zyn verwerkt in zyn werkn. In die periode et ’n ook vele zelfportrettn gemakt. Spilliaert weunde de latste tien joar van zyn leven in Brussel. J'is doar ook gestorvn (angina pectoris), moa je ligt begroavn in Ostende.
[bewerkn] Werk
Spilliaert was mêer têkenoare of schilder en je werkte surtout met Chinese inte, krytjes, fyne busteltjes en pensêeltjes. Zyn werkn woaren roadselachtig, spiritueel en styf persôonlik. Olieverfschilderyen et ’n nie vele gemakt. Zyn vôorkeure gieng noar aquarel, gouache, inte, pastel en kleurcrayongs. De kunst van Spilliaert ligt tusschn ‘t symbolisme, ‘t expressionisme en ‘t surrealisme. Je schilderde surtout ‘t verloatn strange en de zêedyk, stillevens, sombere interieurs me spegels, vrouwen en de latste joaren ook bomen. Je makte ook illustroaties vo boekn.
In 1944 organiseerde ‘t Paleis vo Schône Kunstn de grôte Spilliaert-expositie in Brussel.
