Bandoneong
Uit Wikipedia
De bandoneong is e muziekinstrument, familie van den accordeong en trekzak. 't Is in 1854 deur den Duutscher Heinrich Band ountworpn. De vôorlôper van de bandoneong is de concertina.
Ne bestoat lik en accordeong en e trekzak uut e boge mit ol weersekantn e kasse mi knoptjes up. De boge is langer dan van en accordeong en e trekzak en 't is de bedoeling daj em ol speeln up je knie brikt vo zwoare accentn te kunn geevn. 't Is e wisseltônig instrument lik de trekzak en 't mondmuzik, da wilt zeggn da duuwn en trekkn en andere tône geevn by dezelste knoop. In tegenstellinge tot den accordeong en de trekzak, ej by de bandoneong gin basnootn en gin akkôordn, mor e je ol weersekantn melodienootn. De knoopn stoan ôok up 't êeste zicht willekeurig, wuk da't e vrêe moeilik instrument makt vo te speeln. Doadeure wos den accordeong vele populairder. Deur zyn warme klank en zwoare accentn is 't surtout populair vo tango's te speeln. 't Wos ton ook vrêe populair in Argentinië. De bekenste bandoneonspeler is Astor Piazolla.
