Nubia
Da Wikipedia, ła ençiclopedia libara.
La Nubia la xe na region a caval de el sud de l’Egito e del nord Sudan. Ne i tempi antichi la Nubia la xe sta on regno indipendente e anca parte de l’Egito. Ne i tempi de la nostra era, la Nubia la xera divisa en tre regni cristiani fin a l’arivo de l’Islam. El nome de la Nubia el vien da l’egizsiano antico nub, che vol dir oro.
[modifica] Storia
Da i ricatamenti archeologici se sa che en te la region ciamà Nubia le ghera varie popolazsioni anca prima del Neolitico. Megaliti a Nabta Playa i xe esempi de i pi veci strumenti de misurazsion astronomica, pi veci de Stonehenge de almanco 1000 ani. La prima cultura che se conose da i ricatamenti la xe ciamada Grupo-A. Contemporanea de la cultura Naqada de l’antico Egito, la se pol datar del 3800 a.c. Da i ogeti del 3300 a.C. se pol pensar che la Nubia la xera n’entità politegha unica che la gavea on contato continuo co l’Egito. El Grupo-A gha perso el control de la region verso el 2800, co se vede l’arivo del Grupo-B. Na olta se pensaa che el Grupo-B el fuse formà da zente che la gavea invaso la Nubia. Ancò i studiosi i dixe che el Grupo-B el xera formà da i disendenti del Grupo-A, ma che i xera pi poareti a causa de le invasioni egizsiane. El Grupo-B el xe stà bon de far cresar el marcà co i egizsiani. En tel XXIV secolo, oro, avorio, incenso, e animali de l’Africa tropicale i xera portà en Egito pasando par la Nubia. El comercio el gha dato stabilità e richeza a i nubiani, che i se xera divisi in picoli stati autonomi. I archeologi i parla de sti nubiani come el Grupo-C. Durante el Regno de Mezso (2040-1640 a.C.), i egizsiani gha costruio vari forti longo el Nilo par controlar la trata comerciale. I egizsiani se contentava de controlar el pasagio de le merci, e gavea on bon raporto co la popolazsion locale. I nubiani del Grupo-C i sa organizà e fondà el Regno de Kerma, da el nome de la cavedal. Nel 1750 a.C. i re de Kerma xera boni de costruir na cavedal co grose struture de matoni crui. I fabri e i fabricadori de vasi xera pi bravi de i egizsiani. El regno de Kerma se sa oposto al poder egizsiano con suceso. Xe solo co el faraon Thutmose I che l’Egito xe stà bon de piegare el regno de Kerma e de anetere tuta la Nubia (1520 a.C.). Quando l’influenzsa egizsiana xe diminuida, la cultura gha continuà a influenzsar la vita de la Nubia. Se conta piassé piramidi en Nubia che en Egito. En tel VIII secolo, Piye - re de Kush (antico nome de le Nubia) - gha invaso l’Egito. Par on secolo, i faraoni xera neri nubiani, finché i asiri gha invaso l’Egito e parà indrio le forzse nubiane.
[modifica] Meroe
A dozento km a nord de Khartoum se cata le roine de Meroe. Meroe (800 a.C. – 350 d.C.) xera la cavedal del novo regno de la Nubia. Le dinastie meroane gha svilupà la loro scritura, prima a partir da i geroglifici egizsiani, e dopo usando 23 letere de loro invenzsion. I soldai de Meroe xe stà boni de tegnar lontan Alesandro el Grande e i romani. Ma gha dovesto ripiegare soto l’ataco de Ezana, re de l’Etiopia. El dominio etiopico xe ndà scomparendo co l’arivo de i noab, on popolo che vegnea da el Darfur o forse da el Kordofan de ancò. Da qua el nome Nobatia che i romani usava par stà region.
[modifica] Cristianità
Dopo la partenzsa de i etiopici, la Nubia la sa organizsà en tre regni: Nobatia, con cavedal a Pachoras; Makuria, con cavedal a Dongora; e Alodia, con cavedal a Soba. En sti ani, el cristianesimo xe rivà da l’Egito. Se tratava de na forma monofisita (che credea en ona sola natura de Cristo). L’evangelizazsion de la region xe ndà vanti par tre secoli. En tel VII secolo, co le trupe islamiche gha ocupà l’Egito, el re de Makuria xe stà bon de fermare l’avanzata islamica a sud. Par sie secoli, i musulmani no ga podesto penetrar la region. L’influenzsa islamica xe penetrà on poco a la olta co i marcanti. En tel 1350, la catedral de Dongola la xe stà trasformà en na moschea, segno che la religion islamica xera diventà la vera forzsa del regno de Makuria. On secolo dopo, el regno de Makuria xe diventà parte de l’Egito. A sud de Makuria, Senanr gha resistio par altri dozento ani, prima de cascar soto l’influenzsa egizsiana. Co l’indipendenzsa de l’Egito e del Sudan, la Nubia la xe stà divisa tra i do paexi. Ancò se cata Nubiani al Cairo come a Khartoum. I studi su le vecie cavedali nubiane xe stà portà avnti dal studioso veronexe padre Giuseppe Vantini.
