Matteo Bragadin
Da Wikipedia, ła ençiclopedia libara.
Matteo Giovanni Bragadin (Venezsia 1689 - 1767) el xe sta on patrizsio venezsian.
Fioło cadeto de Andrea Bragadin, el faxeva parte de una dełe quatro fameje, cosidete evangełiche (Bembo, Bragadin, Corner, Giustinian) de più vecia nobiltà de Venezsia. Insieme al fradeo magior Daniele (1683-1755, Procuratore de S.Marco 'ntel 1735) el ga eredità łe fortune deła fameja, de orixine dalmata, e el ne xe sta ł'ultimo disendente.
Matteo (o Mattio) III Giovanni (Zuanne) Bragadin de Santa Marina el xe nato 'ntel 1689 e el xe morto el 14 de otobre 1767. El xe sta senador deła Republica e menbro del Consejo del Doge (o Consejo Minor) che el gera composto de siè menbri, uno par ogni sestiere. In st'ultima quałità el xe sta anca dexignà Inquixidor de Stato, in quanto uno dei siè consijeri el vegneva destinà a ricoverzsare tałe carica e vegneva denominà Inquisidore roso.
'Ntel 1735 el xe sta acuxà davanti al Consejo dei Diexe, dal fradeo majore, de aver tentà de coparlo col vełen ma el xe sta prosiolto dopo 'na longa indaxine durà oto mexi.
Omo molto pio, ma incurioxio dałe arti magiche, insieme ai nobiłi Marco Dandolo e Marco Barbaro el xe sta uno dei protetori de Giacomo Casanova. Ł'incontro fra i du el xe suceso el 29 de apriłe 1746, durante 'na festa de nozse a palazzo Soranzo de San Polo, a cauxa de małor che gaveva colpìo el Bragadin: el xe sta infati Casanova a riaconpagnarlo a caxa e a curarlo, a dispeto dełe indicazsion del dotore de fiducia del Bragadin, tałe Ludovico Ferro, che pare el ne avese pejorà łe condizsion con medicamenti inaproprià. Esendose in seguito ristabiłìo, el nobiłomo el se ga convinto de esare sta salvà dal tenpestivo intervento del Caxanova e di doverghe ła vita.
In seguito, a xe sta ła cabała a zsementare el raporto fra el pio devoto e el sanguigno aventuriero. Ła rełazsion fra i tre nobiłi e Casanova ła ga susità on scandało fra i benpensanti, che i acuxava el Casanova de carpire ła bona fede del Bragadin atraverso pratiche magiche. A xe restà parece riferte (raporti dełe spie dei Inquisidori de Stato) che i documenta quanto i magistrati i seguise con preocupazsion ła vicenda che con ogni probabiłità a xe sta uno dei motivi de ł'aresto e deła carcerazsion del Casanova.
A xe zserto che Bragadin el xe sta sinceramente afezsionà al Casanova, che el considerava ała stregua on fioło, e el ne xe sta fin ała morte el pì fedełe benefator.