Ałergia
Da Wikipedia, ła ençiclopedia libara.
Ł' ałergia ła xe na reaxion infiamatoria scadenà dal sistema imunitario contro sostanse foreste entrà nel' organismo (ałergeni) e che no łe fa mal par gnente, de suo, nei sogeti normali (polini, acari, mufe, magnari ecetera). Ła paroła ła xe sta doparà par la prima volta dal pediatra vienese Von Pirquet nel 1906 e ła deriva dal greco, nel senso de "axion o reaxion contro l'altro, queło che vien da fora". Łe reaxion del'organismo contro "queło che vien da fora", anca se nol fa mal, łe porta dani anca seri al'organismo steso, fin ała morte (in te l'anafiłasi). Se ga visto che i mecanismi coi quałi el sistema imunitario el risponde in maniera sbalià, "ipersensibiłe", i xe diversi e i xe sta identificà neła clasificaxion de Gell e Coombs. Par convenzsion, doramai, se riserva el termine "ałergia" in senso streto ałe reaxion de 1° tipo o imediato, anca se ghe xe łe ałergie de 4° tipo o ritardà (łe dermatiti da contato). Ł'ałergia imediata o de 1° tipo ła xe scadenà, nei sogeti predisposti geneticamente, da dełe imunoglobułine discoverte nel 1966 a Denver dai sposi giaponesi Ishizaka: łe imunoglobułine E o IgE.
