పిల్లల పాటలు

వికీపీడియా నుండి

విషయ సూచిక 1 ఆటలు ఆడీ పాటలు పాడీ 2 కాళ్ళాగజ్జీ కంకాలమ్మ 3 కొండ మీది 4 చిమడకే చిమడకే 5 చిట్టి చిట్టి మిరియాలు 6 తప్పెట్లోయ్ తాళాలోయ్ 7 నారింజ కాయ 8 వంకరటింకర ఒ 9 వానల్లు కురవాలి 10 చిట్టి చిలకమ్మా... 11 హాయీ హాయీ 12 చందమామ రావె 12.1 జానపద గీతాలు

[మార్చు] ఆటలు ఆడీ పాటలు పాడీ

ఆటలు ఆడీ పాటలు పాడీ

అలసీ వచ్చానే- తియ్యాతియ్యని

తాయిలమేదో తీసీ పెట్టమ్మా

పిల్లిపిల్లా కళ్ళు మూసి పీట ఎక్కిందీ

కుక్కపిల్లా తోకాడిస్తూ గుమ్మమెక్కిందీ

కడుపులోని కాకి పిల్ల గంతులేస్తోందీ

తియ్యా తియ్యని తాయిలమేదో తీసీ పెట్టమ్మా

గూట్లో ఉన్నా బెల్లమ్ముక్కా కొంచెం పెట్టమ్మా

చేటలొ ఉన్న కొబ్బరి కోరు చారెడు పెట్టమ్మా

అటకా మీడి అటుకుల కుండా అమ్మా దింపమ్మా

తియ్యా తియ్యని తాయిలమేదో తీసీ పెట్టమ్మా

ఆటలు ఆడీ పాటలు పాడీ

అలసీ వచ్చానే- తియ్యాతియ్యని

తాయిలమేదో తీసీ పెట్టమ్మా

[మార్చు] కాళ్ళాగజ్జీ కంకాలమ్మ

కాళ్ళాగజ్జీ కంకాలమ్మ

వేగు చుక్కా వెలగామొగ్గా

మొగ్గా కాదూ మోదుగబావీ

నీరూ కాదూ నిమ్మల వారీ

వారీ కాదూ వావింటాకు

ఆకూ కాదూ గుమ్మడి పండూ

కాల్దీసి కడగా పెట్టు.

(గజ్జి వచ్చినప్పుడు కంకోలం అనే ఆకును రుబ్బి పూయాలి. తగ్గక పోతే వేకువ ఝామున లేత వెలక్కాయలోని గుజ్జును పూయాలి. దానికీ తగ్గక పోతే మోదుగ ఆకును రుబ్బి పూయాలి. తగ్గడమ్ ప్రారంభించాక నిమ్మరసాన్ని బాగా పలచన చేసి కడగాలి. ఇంకా మాడక పోతే వావింటాకు పూయాలి. గుమ్మడి పండులోని గుజ్జు కూడా గజ్జికి మందే. ఈ చికిత్సా విధానాలన్నిటినీ సూక్ష్మంలో మోక్షం లాగ వివరించే పాట ఇది. కాలు తీసి కడగా పెట్టు అనడంలో గజ్జి అంటు వ్యాధి కాబట్టి జాగ్రత్తగా ఉండమనే సూచన ఉంది.)

[మార్చు] కొండ మీది

కొండ మీది గుండు జారి

కొక్కిరాయి కాలు విరిగె

దానికేమ్మందు?

వేపాకు పసుపూ, వెల్లుల్లి పాయ

నూనెమ్మ బొట్టు - నూటొక్కసారి నూరి

పూటకొక్కసారి పూయవోయ్

[మార్చు] చిమడకే చిమడకే

చిమడకే చిమడకే ఓ చింతకాయ

నీవెంత చిమిడినా నీ పులుపు పోదు

ఉడకకే ఉడకకే ఓ ఉల్లి పాయ

ఎంతెంత ఉడికినా నీ కంపు పోదు

[మార్చు] చిట్టి చిట్టి మిరియాలు

చిట్టి చిట్టి మిరియాలు,

చెట్టుకింద పోసి,

పుట్టమన్ను తెచ్చి,

బొమ్మరిల్లు కట్టి,

అల్లవారి కోడలు నీళ్ళకెళితే,

కల్లవారి కుక్క భౌ--భౌ అనెను,

నా కళ్ళ గజ్జెలు ఘల్లుమనె.

[మార్చు] తప్పెట్లోయ్ తాళాలోయ్

తప్పెట్లోయ్ తాళాలోయ్

దేవుడి గుళ్ళో బాజాలోయ్

పప్పూ బెల్లం దేవుడికోయ్

పాలూ నెయ్యి పాపడికోయ్

[మార్చు] నారింజ కాయ

నారింజ కాయ నిన్ను చూడగానె నా నోరూరు

తొక్కవిప్పి తినగ అబ్బబ్బ పులుపు తిననె తినను,

తీసి నేలకేసి కొడ్తాను.

[మార్చు] వంకరటింకర ఒ

వంకరటింకర ఒ--ఒంటె

వాణితమ్ముడు సొ--సొంఠి

నల్లగుడ్ల మి--మిరియాలు

నాలుగు కాళ్ళ మే--మేక.

[మార్చు] వానల్లు కురవాలి

వానల్లు కురవాలి వాన దేవుడా

వరిచేలు పండాలి వాన దేవుడా

నల్లనీ మేఘాలు వాన దేవుడా

చల్లగా కురవాలి వాన దేవుడా

మా ఊరి చెరువంత వాన దేవుడా

ముంచెత్తి పోవాలి వాన దేవుడా

కప్పలకు పెండ్లిళ్ళు వాన దేవుడా

గొప్పగా చేస్తాము వాన దేవుడా

పచ్చగా చేలంత వాన దేవుడా

పంటల్లు పండాలి వాన దేవుడా

వానల్లు కురవాలి వాన దేవుడా

వరిచేలు పండాలి వాన దేవుడా

[మార్చు] చిట్టి చిలకమ్మా...

చిట్టి చిలకమ్మా

అమ్మ కొట్టిందా

తోటకెళ్ళావా

పండు తెచ్చావా

గూట్లో పెట్టావా

గుటుక్కు మింగావా

[మార్చు] హాయీ హాయీ

ఇది చిన్న పిల్లలను నిద్రబుచ్చేటప్పుడు పాడే పాట

హాయీ....చిచ్చిళుళుళుళువ హాయీ
హాయి హాయి హాయి ఆపదలు గాయీ
చిన్నివాళ్ళనుగాయి శ్రీ వెంకటేశా-హాయ్
హాయమ్మ బాయమ్మ అక్క జెల్లెళ్ళు
తొలి ఒక్క జన్మాన తోడి కోడళ్ళు  ||హాయి||

[మార్చు] చందమామ రావె

పిల్లలు కొద్ది కొద్దిగా మారం చేసే వయసు వచ్చి, మొండిఘటాలైతే చందమామను చూపిస్తూ ఇలా పాడతారు

చందమామ రావె - జాబిల్లి రావె
కొండెక్కి రావె - కోటి వేలు తేవె
పరుగెత్తి రావె - పాలు పెరుగు తేవె
అన్నింటిని తేవె - అబ్బాయికీవె