Nùvula
Di Wikipedia, la nciclupidìa lìbbira.
La nùvula è n'ammassu visìbbuli di particeddi lìquiti o sòlidi suspisi nta l'ariu, di spissuri tali d'uffuscari la limpidizza di l'atmusfera, ca pò dari orìggini a chioggia, nivi o grànnula.
[cancia] La furmazzioni di li nùvula
.jpg)
Li nùvula, a secunna di li cunnizzioni mitirològgichi, sunnu ‘n cuntìnuu mutamentu pi furma e pi culura, e supra a chissu iddi vèninu crassificati. Nu ditirminatu tipu di nùvula si furma sulu nta certi cunnizzioni atmosfèrici: li cunnizzioni mitirològgichi sunnu nùnca li principali rispunzàbbili di li diversi furmazzioni di li nùvula. Ci sunnu uccasioni unni, grazzi a la grannìssima variabbilità e a la ncustanza di lu crima, si fùrmanu nùvula strani pi furma e beddi pi culura.
Ci sunnu quattru tipi prinzipali di furmazzioni nuvulusi: cirrus, palora latina ca voli diri stratu suttili; stratus, ca signìfica ammassu; e nimbus, ca sunnu li cràssichi nùvula di li timpurali.
- Li cirri (cirrus) hannu n’aspettu filamintusu, suttili, comu spittinatu dô ventu; li cùmuli di cirri a sviluppu virticali, hannu n’aspettu lanusu e sòffici e spissu fòrmanu lu cusidittu “celu a picureddi”;
- li strati sunnu furmazzioni orizzuntali, bassi, senza na furma difinita e spissu, spizzànnusi, fùrmanu di li agglumirati a forma di discu o lenti;
- li nembi, pi finiri, sunnu li scuri e pisanti nùvula di li timpurali.
Li nùvula sunnu aggrigati di gutti nichi di acqua suspisi nta l’aria. S’hâ diri, pirò, ca non tutta l’umidità ca s’attrova nta l’aria si vidi, e ca addiventa visìbbili sulamenti nta ditirminati circustanzi.
Li fonti di vapuri àcquiu nta l’aria sunnu tanti: li chianti cu la traspirazzioni, li geyser, li vurcani, li cintrali alèttrichi, e lu vupuri criatu di li pignati; tuttu chissu cuntribbuisci a l’accùmulu di vapuri nta l’atmusfera.
Li funti cchiù granni di vapuri àcquiu sunnu pirò li mari, li ucèani e li laghi, ca, quadiati di lu suli, evàpuranu spiciarmenti ntê riggiuni trupicali.
Chiù granni è la timpiratura di l’aria, tantu chiù granni è la quantità di vapuri ca idda pò cuntèniri. Quannu la quantità di vapuri addiventa màssima, l’aria si satura, ma accamora lu vapuri non è ancora addivintatu visìbbili. Si succedi ca, mentri ca s’agghìca a la màssima saturazzioni di vapuri, l’aria s’arrifridda mpruvvisamenti, l’acqua si cundenza e si trasforma nta gutti nichi-nichi ca arrèstanu suspisi nta l’aria. Quannu chissu succedi vicinu a la supirfici di la terra, nnùnca si furma la negghia o fuschia, mentri si chissu succedi nta zoni chiù àuti, unni l’atmusfera è chiù rarifatta, allura si fùrmanu li nùvula.
Cu n’àutru raffriddamentu di l’aria, li gutti nichi di acqua s’addènzanu ancora chiù assai, finu a quannu li gutti addivèntanu troppu pisanti pi ristari suspisi nta l’aria e pirciò càscanu nta la terra comu chioggia, grànnula o nivi.
