La praja di Catania
Di Wikipedia, la nciclupidìa lìbbira.
La Praja (ditta macari Plaja ) , è lu nomu dû liturali, fattu tuttu di rina, ca si stenni pi 18 chilòmitri accuminciannu dû portu di Catania e, jiènnu versu Sarausa, nfìnu a la lucalità di Agnuni Bagni (frazioni di Augusta, nta pruvinza di Sarausa). La praja (scritta macari Playa ‘n talianu) è, ntâ astati, la lucalitati barniari cchiù friquintata dê catanisi, unni, tra iddi, sarausani e turisti, ogni jornu è affuddata di migghiaia di cristiani.
La Praja òffri na bona quantitati di stabbilimenti barniari, arberghi, villaggi turìstichi, acquapark e diversi spiaggi lìbbiri gistiti di lu cumuni; ci sunu macari tanti discutechi.
A li spaddi di la spiaggia, nta la parti nizziali di Catania, c’è lu buschettu dâ Praja, ca è granni quarchi 280 Kmq; chistu è cumpostu di na macchia virdi, ca fu fatta cu nu rimbuscamentu ntô piriudu tra li dui guerri munniali: ci sunu chiantati maggiurmenti àrbiri di pini marìttimi e di quarchi deci anni di oggi è statu trasfurmatu in ària attrizzata, unni spissu ci fannu manifistazziuni spurtivi agunìstici e amaturiali; c’è nu lachettu cu li cigni e li pàpiri, ci sunu jòca pi li picciriddi, ci sunu tàvuli e seggi di lignu pi la scampagnata e, tanticchia chiù dda, c’è nu maniggiu unni cuegghè si po’ scrìviri e carvarcari macari ammenzu a la rina di la Praja, quannu nun è pirìudu barniari.
Chiù avanti di quarchi 10 chilòmitri, unni finìsciunu li stabbilimenti barniari e li strutturi turìstichi, sempri ntô liturali, c’è n’ària risidenziali chiamata Villaggiu Paradisu di l’Aranci, unni ci foru fatti cintinara di abbitazziuni pi villiggiatura, senza nudda cunziddirazziuni pi li vìnculi tirriturriali e ambientali: tantìssimi casi sunu custruiti, si po’ diri, a riva dû mari.
Ancora chiù avanti, c’è la foci dû ciumi Simetu: macari ccà stàvanu custruennu abbitazziuni nzichiatanza, ma, siccomu, pi furtuna, na granni ària attornu a lu ciumi addivintau oasi naturali, ntirvìnnuru li naturalisti e l’ambientalisti ca custrìnsiru lu cumuni a tàliari ddòcu e tanti abbitaziuni foru sdirubbati.
Tutti chiddi ca hannu visitatu la Praja, hannu dittu ca idda rapprisenta n’uccasiuni persa pi la citati: la sò rina durata, la biddizza dô mari, lu crima, puteva fari addivintari sta zona na vera e propia “rivera rumagnola” siciliana. Pi stu mutivu, s’hà circatu di riqualificari la zona, ma, purtroppu, î migghiuramenti, pi chiddu ca si putìa fari, sunu picca e nenti.