Bannera Siciliana
Di Wikipedia, la nciclupidìa lìbbira.
Lu vissiddu ufficiali dâ riggiuni Siciliana è custituiutu d'un drappu biculuri giarnurussu, ca diacunarmenti esprimi lu giarnu dâ bannera cìvica di Palemmu e lu russu dâ bannera cìvica di Curliuni, ca fu lu primu cumuni sicilianu a sèquiri l'asempiu di Palemmu ntâ vicurusa rivota antifrancisi dû Vèspiru sicilianu, scattata ntâ ginirusa citati di Palemmu lu 30 Marzu dû 1282.
La bannera siciliana raffigura l'unioni spirituali di li siciliani; e ô centru rica lu vecchiu sìmmulu triscèlicu dâ Trinacria.
'N tèmpura ricenti, stu vissiddu fu la nzegna ufficiali dû Muvimentu Nnipinnintista Sicilianu (MIS), funnatu ntô 1943 a Palemmu di l'on. Annirìa Finucchiaru Aprili; e oi è lu vissiddu ufficiali dâ Riggiuni Siciliana, ca, propiu, pi lu mpulsu pulìticu datu dû MIS, lu 15 Maiu 1946 ottinni la sò autunumìa a statutu spiciali.
La bannera fu ufficiarmenti aduttata dâ Riggiuni Siciliana ntô 2000 comu sìmmulu dâ riggiuni. E' la Liggi Riggiunali L.R. 4-1-2000 n. 1 supra l'Aduzzioni dâ bannera dâ Riggiuni e la Dispusizzioni supra li mudalitati d'usu e d'espusizzioni.