Questione Ladina
Ord la Wikipedia
Questione Ladina numn'ins la dumonda, sch'il rumantsch dal Grischun, il Ladin da las Dolomitas ed il Furlan en il Friul sajan parentas e sch'i saja giustifitgà dad unir questas trais linguas sut l'expressiun rumantsch da las Alps.
Dapi l'entschatta dal 20avel tschientaner ed enfin oz èn ils scienziads da linguas betg perina en questa dumonda. Cunzunt las consequenzas politicas ord questa dumonda cuntegnan ina tscherta brisanza.
Cuntegn |
[editar] Opiniun dals Ascolians
La prima gruppa sa basa sin ina lavur publitgada l'onn 1873 dal linguist Graziadio Isaia Ascoli (1829-1907). La vista da questa publicaziun è vegnida cumplettada ils onns suandants intensivamain da Theodor Gartner (1843-1925).
Ils dus scienziads postuleschan ch'i existian talamain bleras cuminaivladads tranter il Retorumantsch, il Ladin ed il Furlan ch'i stoppia avair existì ina "lingua oriunda" tranter il Pass Alpsu en Svizra ed il Friul en l'Italia.
Questa unitad saja scrudada sco consequenza da las circumstanzas geograficas en differents dialects e vegnida stgarpada entras las influenzas talianas dal sid e tudestgas dal nord.
[editar] Opiniun dals Battistians
La segunda gruppa – basond sin Carlo Battisti (1882-1977) e Carlo Salvioni (1858-1920) – chapescha sut il Retorumantsch be il rumantsch discurrì en il Grischun cun ses tschintg idioms. Ina parentella cun il Ladin u il Furlan saja be in construct da linguists senza colliaziun a la realitad.
Ils tratgs caracteristics cuminaivels dal Rumantsch, Ladin ed Furlan sajan era da chattar tar dialects galloitalics al sid da las Alps en la Lumbardia fin al Veneto, che vegnan quintads tar il talian; ina part da quests tratgs cuminaivels è era da chattar en la regiun dal Po. Perquai sajan las "cuminaivladads" be rests dad in dialect vegl da l'Italia dal nord.
[editar] Consequenzas politicas
Il cumbat tranter ils Ascolians ed ils Battistians è l’entschatta vegnì manà sin il livel da la scienza. Dapi l’entschatta dal 20avel tschientaner èn las posiziuns da Battisti era vegnidas surprendidas da represchentants da l'irredentissem talian. Els han vesì l'avis da Battisti sco sustegn da lur teoria che di ch'ils Rumantschs dal Grischun, ils Ladins ed ils Furlans discurrian en sasez talian e sajan perquai Talians che duessan vegnir unids en il stadi talian. Perquai avess il Tessin ed ina gronda part dal Grischun stuì s'unir cun l’Italia.
Il problem fundamental ord la vista dad oz è che la politica na dastga betg utilisar enconuschientschas da la linguistica istorica per valitar problems d'ozendi: Tuttina sch'il Rumantsch, Ladin e Furlan sajan istoricamain dialects da l'Italia dal nord u betg; la gronda part dals pledaders da questas linguas na senta ozendi nagina tala colliaziun.
[editar] Discussiuns novas
Ils professurs Roland Bauer e Hans Goebl da l'Universitad Salzburg han sviluppà cun lur metoda da la 'Dialectometria' in nov utensil da la perscrutaziun e dal studi da las sumeglientschas da linguas e dialects. Ils resultats da lur perscrutaziun mussan plitost en direcziun da l'unitad ladina (guarda: [[Dialectometria]]). L'ultim temp hai dà emprovas da schlargiar la discussiun: Uschia han intgins da la Val da Non pretendì da discurrer ina varianta rumantscha u ladina. Quai ord il motiv ch'ils Ladins en il Tirol dal sid possedan in'autonomia speziala.
